UEFA ពន្យារការ​ប្រកួត​បាល់ទាត់ទាំងអស់នៅអ៊ីស្រាអែល ដោយសារ​សង្គ្រាមកំពុង​បន្ត

សហភាពសហព័ន្ធបាល់ទាត់អឺរ៉ុប (UEFA) បានពន្យារពេលការប្រកួតកីឡា​បាល់ទាត់​ទាំងអស់ដែលគ្រោងទុកក្នុងប្រទេស​អ៉ីស្រាអែល ក្នុងរយៈពេលពីរសប្តាហ៍ខាងមុខ ដោយសារជម្លោះកំពុងបន្តនៅក្នុងប្រទេស។

UEFA បាននិយាយនៅក្នុងសេចក្តីថ្លែងការណ៍មួយថា ៖«ដោយគិតពីស្ថានភាពសន្តិសុខបច្ចុប្បន្ន​ក្នុងប្រទេស​អ៉ីស្រាអែល​ ​UEFA បានសម្រេចពន្យារពេលការប្រកួតទាំងអស់ដែលបានគ្រោងទុកក្នុងប្រទេស​​​រយៈពេលពីរបីសប្តាហ៍ខាងមុខ។ កាលបរិច្ឆេទថ្មី​នឹងបញ្ជាក់​នៅពេលសមស្រប»។

ការប្រកួតដែលរងផលប៉ះពាល់រួមមានការប្រកួតជម្រុះ Euro 2024 នៅថ្ងៃព្រហស្បតិ៍ រវាង​អ៉ីស្រាអែល និងស្វីស ក៏ដូចជាការប្រកួតជើងឯកយូរ៉ូអាយុក្រោម ២១ឆ្នាំរបស់​អ៉ីស្រាអែលជាមួយអេស្តូនី និងអាល្លឺម៉ង់។

ការប្រកួត​កម្រិត​យុវជន​ដែលគ្រោងធ្វើឡើងចាប់ពីថ្ងៃទី១០ ដល់ថ្ងៃទី១៧ ខែតុលា ដែលមានការប្រកួតរបស់យុវជនអាយុក្រោម ១៧ឆ្នាំ មកពីប្រទេស​អ៉ីស្រាអែល បែលហ្ស៊ិក ហ្គីប្រាលតា និងវែលស៍ ក៏ត្រូវបានពន្យារពេលផងដែរ។

UEFA បានព្រមានថា ការប្រកួតជម្រុះ Euro 2024 មួយទៀតរវាងអ៉ីស្រាអែល និងកូសូវ៉ូ ដែលគ្រោងធ្វើនៅថ្ងៃទី១៥ ខែតុលា ក៏អាចត្រូវបានពន្យារពេល ដោយ UEFA បានព្រមានដោយបន្ថែមថា ពួកគេនឹងរង់ចាំពីរបីថ្ងៃទៀតដើម្បីសម្រេច។

ការប្រកាសពន្យារ​ពេល​​ធ្វើឡើង បន្ទាប់​ពី​ការប្រយុទ្ធគ្នាក្នុងប្រទេសអ៉ីស្រាអែល បានផ្ទុះឡើង ដោយ​ក្រុមយុទ្ធជនហាម៉ាស់ បានរំលោភព្រំដែនពីតំបន់ហ្គាហ្សា ក្នុងការវាយប្រហារដ៏ភ្ញាក់ផ្អើលមិនធ្លាប់មានពីមុនមកកាលពីថ្ងៃសៅរ៍។ អ៉ីស្រាអែល​​បានវាយលុកតំបន់ហ្កាហ្សាដោយការវាយប្រហារតាមអាកាស និងបានប្រកាសជាផ្លូវការនូវសង្រ្គាមនៅថ្ងៃអាទិត្យជាមួយក្រុមហាម៉ាស។

ក្រុមមន្ត្រីបាននិយាយថា ចំនួនអ្នកស្លាប់នៅក្នុងប្រទេសអ៉ីស្រាអែល បានឡើងដល់ ៧០០នាក់ ហើយប្រជាជន ប៉ាឡេស្ទីនជាង ៤០០នាក់បានស្លាប់ នេះបើយោងតាមក្រសួងសុខាភិបាលនៅហ្គាហ្សា៕

ប្រែសម្រួល៖ មន្នីរ័ត្ន
ប្រភព៖ cnn.com