រកឃើញ១០ក្រុមឡើងទៅវគ្គ១៦ក្រុមជើងឯកអាស៊ី AFC Asian Cup

ការប្រកួតសន្សំពិន្ទុក្នុងពូលពានរង្វាន់ AFC Asian Cup នឹង​បញ្ចប់​នា​ថ្ងៃព្រហស្បតិ៍ ទី២៥ ខែមករា ឆ្នាំ២០២៤ បន្ទាប់ពីចាប់ផ្ដើមការប្រកួតតាំងពីថ្ងៃទី១២ ខែមករា។

គិតត្រឹមថ្ងៃទី២៤ ខែមករា រកឃើញក្រុមចំនួន១០ ដែលបានឡើងទៅវគ្គ១៦ក្រុមចុងក្រោយ​ជើង​ឯក​លំដាប់ទី១​អាស៊ី​ AFC Asian Cup ​នៅប្រទេសកាតារ។ ក្រុមទាំង១០រួមមាន តាជីគីស្ថាន អារ៉ាប់រួម អុីរ៉ាក់ អូស្ត្រាលី អុីរ៉ង់ ស៊ីរី កាតារ អ៊ូសបេគីស្ថាន ប៉ាឡេស្ទីន និង អារ៉ាប៊ីសាអ៊ូឌីត។

ក្រុមតាជីគីស្ថាន ឡើងទៅវគ្គបន្តជាក្រុម​លេខ២​ក្នុង​ពូល A ដោយប្រកួតឈ្នះ១ ចាញ់១ ស្មើ១ មាន​៤​ពិន្ទុ។ ចំពោះម្ចាស់កាតារវិញជាក្រុមលេខ១ក្នុងពូល A ប្រកួត៣លើក ឈ្នះទាំង៣ មាន៩ពិន្ទុ។ ក្នុងពូល B មានក្រុមចំនួន៣ បានឡើងទៅវគ្គបន្ត ក្នុងនោះក្រុមអូស្ត្រាលី ជាក្រុម​លេខ១ក្នុងពូល ប្រកួត៣លើក ឈ្នះ២ ស្មើ១ មាន៧ពិន្ទុ ហើយក្រុមអ៊ូសបេគីស្ថាន ជាក្រុមលេខ២ ប្រកួត៣លើក ឈ្នះ១ ស្មើ២ មាន៥ពិន្ទុ។ ដោយឡែកក្រុមស៊ីរី បានឡើងទៅវគ្គបន្តក្នុងនាមជាក្រុម​លេខ​៣​​ ដោយ​ប្រកួត ៣លើក ឈ្នះ១​ ស្មើ១ ចាញ់១ មាន៤ពិន្ទុ។

ពូល C ក៏មាន៣ក្រុមឡើងទៅវគ្គបន្តដែរ ក្នុងនោះក្រុមអុីរ៉ង់ ជាក្រុម​លេខ១​ក្នុងពូលដោយប្រកួត​៣លើក ឈ្នះទាំង៣ មាន៩ពិន្ទុ  ហើយក្រុមអារ៉ាប់រួម ជាក្រុមលេខ២ ដោយប្រកួត៣លើក ឈ្នះ១ ស្មើ១ ចាញ់១ មាន៤ពិន្ទុ ខណៈក្រុមប៉ាឡេស្ទីន ជាក្រុមលេខ៣ល្អក្នុងពូល ដោយប្រកួត៣លើក ឈ្នះ១ ស្មើ១ ចាញ់១ មាន៤ពិន្ទុដូចគ្នាជាមួយក្រុមប៉ាឡេស្ទីន ប៉ុន្តែមានគ្រាប់ចំណេញតិចជាង។ ចំពោះក្រុមអុីរ៉ាក់ និង អារ៉ាប៊ីសាអ៊ូឌីត​ ក៏បានកក់កៅអីឡើងទៅវគ្គបន្តដែរទោះបីពួកគេនៅសល់១ប្រកួតក្នុងដៃទៀតក៏ដោយ។

ក្រោយ​ការ​ប្រកួត​សន្សំពិន្ទុ​ក្នុង​ពូល​ចប់ ក្រុមលេខ១ និងលេខ២ ក្នុង​ពូលនីមួយ​ៗ​ រួម​ជា​មួយ​​​ក្រុមលេខ៣​ល្អ​បំផុត​​ក្នុងពូល​ចំនួន​៤ក្រុម​ទៀត​បាន​ឡើង​ទៅ​កាន់​វគ្គ​១៦​ក្រុម​ចុង​ក្រោយ។ ការប្រកួតក្នុងវគ្គ១៦ក្រុម ចុងក្រោយនឹងធ្វើឡើងនៅថ្ងៃទី២៨ ខែមករា ឆ្នាំ២០២៤៕

អត្ថបទ៖ ផា រតនា