ល្ងាចនេះ អ្នកស្វាយរៀងនឹងឃើញតារាល្បីៗប៉ះថ្នាក់ដឹកនាំស្វាយរៀងក្នុងជំនួបសប្បុរសធម៌

ក្រុមបាល់ទាត់ប្រជុំ​ដោយតារាសម្តែង ចម្រៀងល្បីៗ Cambodian Football Super Stars នឹងប្រកួតជាមួយក្រុម​បាល់ទាត់​ថ្នាក់ដឹកនាំខេត្តស្វាយរៀង ក្នុងព្រឹត្តិការណ៍បាល់ទាត់នៃក្តីស្រឡាញ់ និងសប្បុរសធម៌ក្រោមប្លប់សន្តិភាព វេលាម៉ោង៥ល្ងាច ថ្ងៃទី១៣ ខែកុម្ភៈ ឆ្នាំ២០២៤ នៅកីឡដ្ឋានខេត្តស្វាយរៀង។

ព្រឹត្តិការណ៍បាល់ទាត់សប្បុរសធម៌ និងក្តីស្រឡាញ់នេះ អ្នកគាំទ្រផ្ទាល់នៅខេត្តស្វាយរៀង ទស្សនាតាម​ទូរទស្សន៍ ក៏ដូចជាបណ្តាញទំនាក់ទំនងសង្គមនឹងទទួលបានចំណីចក្ខុប្លែកនៅពេល​វត្តមានចូលរួមពីឯកឧត្តម ឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ និងជាប្រធាននាយកដ្ឋានកណ្តាលសន្តិសុខ និងឯកឧត្តម ប៉េង ពោធិ៍សា អភិបាលនៃគណៈអភិបាលខេត្តស្វាយរៀង ព្រមទាំងថ្នាក់ដឹកនាំខេត្តជាច្រើនរូបទៀត។

ជាពិសេសទៀតនោះ តារាសម្តែង និងតារា​ចម្រៀងល្បីៗជាច្រើនដែលសុទ្ធតែមានរូបរាង​សង្ហាបង្ហាញសមត្ថភាពនៅលើទីលានដូចជា លោក សេង មង្គល, លោក ហេង នរកក្កដា, លោក ចា ឬទ្ធី, តារាចម្រៀង ខេម តារាចម្រៀង គូម៉ា និងតារាល្បីៗជាច្រើនទៀត។

ការប្រកួតដែលនឹងចាប់ផ្តើមពីម៉ោង៥ល្ងាច ថ្ងៃទី១៣ ខែកុម្ភៈ ឆ្នាំ២០២៤ នៅកីឡដ្ឋានខេត្តស្វាយរៀងនឹងមានការផ្សាយផ្ទាល់តាមរយៈទូរទស្សន៍ BTV Cambodian។ អ្នកគាំទ្រអាចចូលរួមទស្សនាដោយសេរី៕

អត្ថបទ៖ វីរបុត្រ