Dani Alves ត្រូវបានដោះលែងឱ្យនៅក្រៅឃុំ ក្រោយ​តម្កល់ប្រាក់ធានាជាង១លានដុល្លារ​

អតីត​កីឡាករជម្រើសជាតិប្រេស៊ីល Dani Alves ត្រូវបានដោះលែងឱ្យនៅក្រៅឃុំ បន្ទាប់ពីបានបង់ប្រាក់ចំនួន ១លានអឺរ៉ូ (១.០៨​លាន​ដុល្លារ​អាមេរិក) ក្រោយ​ចំណាយពេល១៤ខែក្នុងការឃុំឃាំងពី​ការ​កាត់ទោសឲ្យ​ជាប់ពន្ធនាការ​៤​ឆ្នាំ​កន្លះ​​​ពីបទរំលោភសេពសន្ថវៈ។

អតីតកីឡាកររបស់ក្លិប Barcelona ត្រូវបានដោះលែង បន្ទាប់ពីត្រូវបានអនុញ្ញាតឱ្យបន្តការកាត់ក្តីរបស់គេដោយសេរីភាព ទោះបីជាត្រូវបានកាត់ទោសតាំងពីដំបូងក៏ដោយ។ ការមិនបានសម្រេចនៃការកាត់ទោសជាប់ពន្ធនាគាររយៈពេ​ល​៤ឆ្នាំកន្លះ និងរយៈពេល ១៤ខែដែល​គាត់​បានចំណាយពេលនៅក្នុងការឃុំឃាំង បាននាំឱ្យតុលាការផ្តល់ការធានាឱ្យនៅក្រៅឃុំ​តាម​រយៈ​ការ​ដាក់​ប្រាក់​ធានា​ចំនួន ១លានអឺរ៉ូ និងវិធានការណ៍ផ្សេងទៀត។

Dani Alves បានដើរចេញពីពន្ធនាគារក្បែរ Barcelona កាលពីថ្ងៃច័ន្ទ បន្ទាប់ពីតម្កល់​ប្រាក់​ធានា​។

Alves បានជាប់ពន្ធនាគារចាប់តាំងពីការចាប់ខ្លួនរបស់គេនៅក្នុងខែមករា ឆ្នាំ២០២៣ ពីបទសង្ស័យ​រំលោភនារីវ័យក្មេងនៅក្នុងបន្ទប់ទឹក VIP ​ក្នុង​ក្លឹបរាត្រី Barcelona នៅព្រឹកព្រលឹម​ថ្ងៃទី៣១ ខែធ្នូ ឆ្នាំ២០២២។

ការសង្ស័យនេះត្រូវបានបញ្ជាក់ដោយសាលក្រមដំបូងដែលបច្ចុប្បន្នកំពុងត្រូវបានប្តឹងឧទ្ធរណ៍ដោយអតីតកីឡាករជម្រើសជាតិប្រេស៊ីល​ដើម្បី​រក្សាភាពគ្មានកំហុសរបស់ខ្លួន។

ក៏ដូចជាការ​បង់​ប្រាក់ត្រឹមតែជាង ១លានអឺរ៉ូ កីឡាករវ័យ ៤០ឆ្នាំរូបនេះ ក៏ត្រូវបោះបង់លិខិត​ឆ្លង​ដែន​ប្រេស៊ីល និងអេស្ប៉ាញ ស្នាក់នៅក្នុងប្រទេសអេស្ប៉ាញ ហើយរាយការណ៍ទៅតុលាការជារៀងរាល់សប្តាហ៍ ហើយត្រូវបានហាមឃាត់មិនឱ្យមានទំនាក់ទំនងជាមួយជនរងគ្រោះ។ មេធាវីរបស់ Alves កំពុងស្វែងរកការដោះលែងអចិន្ត្រៃយ៍ ហើយដំណើរការបណ្តឹងឧទ្ធរណ៍អាចចំណាយពេលច្រើនខែ។ ខាងអយ្យការ វិញចង់ឲ្យការជាប់ពន្ធនាគារ​កើនឡើងទ្វេដងដល់ ៩ឆ្នាំ៕

ប្រែសម្រួល៖ មន្នីរ័ត្ន
ប្រភព៖ Reuters