Lunin អាចនឹងចាកចេញ Real Madrid បើគ្មានឱកាសលេង

អ្នកចាំទី Andriy Lunin របស់ក្លិប Real Madrid អាចនឹងចាកចេញពីក្លិបក្នុងអំឡុងពេលទីផ្សារដោះដូរ​រដូវក្តៅនេះ ខណៈកុងត្រារបស់គេនឹងផុតនៅឆ្នាំ២០២៥។

យោងតាមសារព័ត៌មាន The Athletic កីឡាករ Lunin នឹង​សម្រេចចិត្តចុងក្រោយអំពីអនាគតរបស់ខ្លួនក្រោយថ្ងៃទី១៥ ខែកក្កដា នៅពេលក្លិប Real Madrid ចាប់ផ្តើមការហ្វឹកហាត់មុនបើករដូវកាល។ អ្នកចាំទីសញ្ជាតិអ៊ុយក្រែនចង់និយាយជាមួយគ្រូបង្វឹក Carlo Ancelotti ទាក់ទងនឹងការទទួលបាន​ឱកាស​ក្នុងការបង្ហាញខ្លួនលើទីលាន។

កីឡាករ Lunin ប្រាថ្នាចង់ក្លាយជាអ្នកចាំទីជម្រើសដំបូងរបស់ក្រុម Real Madrid ប៉ុន្តែប្រសិនបើគ្មានឱកាសនោះទេ រូបគេនឹង​ផ្លាស់​ទៅកាន់ក្លិបផ្សេង។ កីឡាករ​បានប្រគល់ភារកិច្ចនេះឲ្យភ្នាក់ងារថ្មីរបស់ខ្លួនរួចហើយគឺលោក Jorge Mendes ក្នុងការស្វែង​រក​ក្លិប​ថ្មី។

ក្លិប Real Madrid ចង់បន្តកុងត្រាឲ្យកីឡាករ Lunin រហូតដល់ឆ្នាំ២០២៩ ប៉ុន្តែកីឡាកររូបនេះមិនទាន់ផ្តល់ចម្លើយច្បាស់លាស់​នោះ​ទេ។ ប្រសិនបើ អ្នកចាំទី​រូប​នេះ​ចាកចេញ Real Madrid អាច​នឹង​នាំយកអ្នកចាំទី Kepa Arrizabalaga ពីក្លិប Chelsea។ កាល​ពី​រដូវ​កាល​មុន Lunin ​បាន​បង្ហាញខ្លួនបាន៣១ប្រកួត​ឲ្យក្លិប Real Madrid ហើយ​រក្សាសំណាញ់ទីមិនឲ្យគូប្រកួតស៊ុតបញ្ចូលទីចំនួន១២លើក៕

ប្រែសម្រួល៖ ផា រតនា