កីឡា

លោក Muñoz ចាត់ទុកជ័យជម្នះលើ ទ័ព ៧-០ ជាការប្រកួតដ៏អស្ចារ្យ

បានផុស

២ years មុន

នៅ

ថ្ងៃចន្ទ ១២ សីហា ២០២៤

ដោយ

ព្រះខ័នរាជស្វាយរៀងធ្វើបានល្អជាងគេសម្រាប់ការប្រកួតបើកឆាកក្នុងសប្តាហ៍ទី១ ខេមបូឌានព្រីមៀរលីគ២០២៤-២៥ ដោយបានយកឈ្នះក្រុមក្រសួងការពារជាតិមិនឲ្យតដៃរួចក្នុងលទ្ធផល ៧-០ នៅកីឡដ្ឋានខេត្តស្វាយរៀង ថ្ងៃអាទិត្យ ទី១១ ខែសីហា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជ័យជម្នះដ៏ធំធេងនេះត្រូវបានលោក Josep Muñoz គ្រូបង្វឹកព្រះខ័នរាជស្វាយរៀយចាត់ទុកជាការប្រកួតដ៏អស្ចារ្យ។ លោកបាននិយាយថា លោកបានខកចិត្តតិចតួចសម្រាប់ការប្រកួតនៅវគ្គទី១ ពីព្រោះក្រុមរបស់លោករកបានតែ២គ្រាប់ប៉ុណ្ណោះ។ តាមពិតនៅវគ្គទី១ក្រុមរបស់លោកបង្ហាញទម្រង់លេងយ៉ាងល្អ និងបង្កើតឱកាសបានច្រើន ប៉ុន្តែបែរជារកបានគ្រាប់បាល់តិចទៅវិញ។

បុរសសញ្ជាតិអេស្ប៉ាញបាននិយាយថា ៖«ខ្ញុំគិតថា នេះជាការប្រកួតដ៏អស្ចារ្យសម្រាប់យើង តែការលេង៣០នាទីដំបូងក្នុងវគ្គទី១មិនសមតាមផែនការទេ។ យើងមានឱកាសហើយ តែមិនអាចរកបានគ្រាប់បាល់។ វគ្គទី១ យើងរកបានតែ២គ្រាប់ តែនេះជាបាល់ទាត់ យើងគួររកបានឲ្យច្រើនគ្រាប់ជាងនេះដើម្បីអ្នកគាំទ្ររីករាយ»។

លោកបានលើកឡើងថា ការប្តូរកីឡាករថ្មីពីរនាក់ចូលចុងវគ្គទី១របស់លោក ភា សុភក្ត្រា គ្រូបង្វឹករបស់ក្រសួងការពារជាតិ បានធ្វើឲ្យក្រុមល្អ ហើយនៅដើមវគ្គទី២ ក្រសួងការពារជាតិនៅតែបង្ហាញទម្រង់លេងយ៉ាងល្អ។ ទោះបីជាយ៉ាងណា ការប្តូរកីឡាករមួយចំនួនចូលបានធ្វើឲ្យព្រះខ័នរាជស្វាយរៀងកាន់តែល្អប្រសើររហូតរកបាន៥គ្រាប់ក្នុងវគ្គទី២។

លោក Josep Muñoz បានរៀបរាប់ថា ៖«នៅពេលយើងប្តូរកីឡាករថ្មីមួយចំនួនចូលបានធ្វើឲ្យទម្រង់លេងរបស់យើងកាន់តែល្អប្រសើរ។ កីឡាកររបស់យើងមានគុណភាពអាចរកគ្រាប់បាល់បាន។ និយាយរួមគឺលេងបានល្អ»។

៧គ្រាប់របស់ព្រះខ័នរាជស្វាយរៀងរកបានដោយកីឡាករ៦រូប។ ខ្សែប្រយុទ្ធប្រេស៊ីល Cristian រកបាន២គ្រាប់នៅនាទី៨ និងនាទី៦៣។ កីឡាករវ័យក្មេង មិន រតនៈ រកបាននៅនាទី១៧។ ខ្សែបម្រើប្រយុទ្ធសញ្ជាតិឡាវ Bounkong Bounphanchan រកបាននៅនាទី៥៦។ ខ្សែការពារទើបទទួលបានសញ្ជាតិកម្ពុជា មីហ្ស៊ូណូ ហ៊ីការ៉ុ រកបាននៅនាទី៦១។ ខ្សែប្រយុទ្ធប្រេស៊ីល Pablo រកបាននៅនាទី៩០+៥ និងខ្សែបម្រើ គឹម សុខយុទ្ធ រកបាននៅនាទី៩០+៥ដែរ។