កីឡា

តើកីឡាការិនី Imane Khelif មានក្រូម៉ូសូមចម្លែកមានប្រវត្តិយ៉ាងណា?

បានផុស

៨ ខែ មុន

នៅ

ថ្ងៃអង្គារ ១៣ សីហា ២០២៤

ដោយ

កីឡាការិនី Khelif កើតនៅឆ្នាំ១៩៩៩ ក្នុងតំបន់ដាច់ស្រយាល ភាគខាងជើងប្រទេសអាល់ហ្សេរី។ ឪពុកមិនអនុញ្ញាតឲ្យកូនស្រីហ្វឹកហាត់ប្រដាល់ទេ ប៉ុន្តែគាត់បានបោះបង់ចោលកីឡាបាល់ទាត់កាលពីក្មេងដើម្បីស្វែងរកឱកាសហ្វឹកហាត់ប្រដាល់។ គាត់ត្រូវធ្វើដំណើរចម្ងាយ១០គីឡូម៉ែត្រទៅហ្វឹកហាត់ប្រដាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការតស៊ូរបស់គាត់បានធ្វើឲ្យគ្រូបង្វឹកជម្រើសជាតិចាប់អារម្មណ៍ និងបានកោះហៅចូលជម្រើសជាតិក្នុងឆ្នាំ២០១៨។ ការប្រកួតអន្តរជាតិដំបូងរបស់គាត់នៅស្ថាប័នប្រដាល់សកលអន្តរជាតិ AIBA (ឥឡូវសមាគមកីឡាប្រដាល់អន្តរជាតិ IBA) បានចាញ់ក្នុងទឹកទី១។ គាត់បានចាញ់៥លើកក្នុងការប្រកួតអាជីព៦លើកដំបូង ប៉ុន្តែក្រោយមកគាត់បានអភិវឌ្ឍខ្លួនយ៉ាងល្អ។

Khelif ជាកីឡាការិនី១រូបក្នុងចំណោមកីឡាការិនីអាល់ហ្សេរី៣រូបបានទៅប្រកួតកីឡាអូឡាំពិក ឆ្នាំ២០២០ នៅជប៉ុន។ នាងបានឈ្នះកីឡាការិនីទុយនេស៊ី Mariem Horani នៅវគ្គ១៦រូបចុងក្រោយ ប៉ុន្តែបានចាញ់កីឡាការិនីអៀរឡង់ Kellie Harrington នៅវគ្គ៨រូបចុងក្រោយ។

កីឡាការិនីរូបនេះធ្វើបានល្អក្នុងការប្រកួតប្រដាល់សកលជើងឯកពិភពលោក២លើកចុងក្រោយ និងបានក្លាយជាទូតសុច្ឆន្ទរបស់ UNICEF កាលពីខែមករា ឆ្នាំ២០២៤។

ហេតុអ្វីបានជាគាត់ត្រូវបានដកសិទ្ធិពីការប្រកួតកីឡាប្រដាល់សកលពិភពលោក ឆ្នាំ២០២៣?

កីឡាការិនី Khelif បានឈានដល់វគ្គផ្តាច់ព្រ័ត្រដណ្តើមមេដាយមាស ក្នុងការប្រកួតជើងឯកពិភពលោក ឆ្នាំ២០២៣ ប៉ុន្តែស្ថាប័ន IBA បានដកសិទ្ធិនាងចេញពីការប្រកូត បន្ទាប់ពីធ្វើតេស្តរកឃើញក្រូម៉ូសូមបែបបុរស (XY) ។ នាងបានចាត់ទុកការដកសិទ្ធិគឺ«ជាការឃុមឃិតដ៏ធំ»។

កីឡាការិនីរូបនេះធ្លាប់បានប្រកួតជាច្រើនកន្លងមក ប៉ុន្តែមិនធ្លាប់មានបញ្ហាទេ ហើយទើបតែត្រូវបានដកសិទ្ធិលើកនេះ បន្ទាប់ពីនាងបានយកឈ្នះកីឡាការិនីរុស្ស៊ី Azalia Amineva។ ស្ថាប័នប្រដាល់សកលអន្តរជាតិ IBA ដឹកនាំដោយលោក Umar Kremlev ជាជនជាតិរុស្ស៊ី និងក្រុមហ៊ុនរដ្ឋរុស្ស៊ី Gazprom ជាម្ចាស់ឧបត្ថម្ភធំថែមទៀត។

នៅក្នុងសប្តាហ៍នេះ គណៈកម្មាធិការអូឡាំពិកអន្តរជាតិ (IOC) បានចាត់ទុកការដកសិទ្ធិរបស់ IBA ជា«ការសម្រេចចិត្តភ្លាមៗ និងតាមអំពើចិត្ត»ទៅលើកីឡាការិនី Khelif និង Lin Yu-ting ពីការប្រកួតអន្តរជាតិ។

IOC បានលើកឡើងថា ហេតុផលសម្រេចទៅលើកីឡាការិនីទាំងពីរគឺស្រពិចស្រពិលដូចករណីជាច្រើនដែលស្ថាប័ន IBA បានធ្វើ។ ស្ថាប័ននេះបង្ហាញភស្តុតាងតិចតូចពីការធ្វើតេស្ត រាប់បញ្ចូលទាំងការធ្វើតេស្តពីអ្វី និងតេស្តនរណា។ នេះជាកង្វះតម្លាភាពដែលមិនអាចទទួលយកបានក្នុងកីឡាអូឡាំពិក ហើយ IBA ត្រូវបានហាមពីកីឡាអូឡាំពិកតាំងពីឆ្នាំ២០១៩។

ហេតុអ្វីបានជារិះគន់លើកីឡាការិនី Khelif ប្រកួតនៅអូឡាំពិក២០២៤?

មនុស្សជាច្រើនទូទាំងពិភពលោកដូចបុគ្គលល្បីៗ Trump, Meloni និងអ្នកនិពន្ធរឿង “Harry Potter” លោក J.K. Rowling បានរិះគន់ជុំវិញការអនុញ្ញាតឲ្យ Khelif ប្រកួត។ ការផ្ទុះរិះគន់នេះបានកើតឡើង បន្ទាប់ពីនាងបានយកឈ្នះកីឡាការិនីអ៉ីតាលី Angela Carini ដោយប្រើពេលត្រឹមតែ៤៦វិនាទីប៉ុណ្ណោះក្នុងវគ្គ១៦រូបចុងក្រោយ។

ពេលនោះ កីឡាការិនី Angela Carini បានប្រាប់អ្នកសារព័ត៌មានថា នាងឈឺខ្លាំងណាស់ បន្ទាប់ពីត្រូវកណ្តាប់ដៃលើច្រមុះ ហើយជាការឈឺមិនធ្លាប់ជួបឡើយ។ ពេលនោះ រឿងរ៉ាវជុំវិញភេទរបស់កីឡាការិនី Khelif ក៏ត្រូវបាននិយាយតៗគ្នា។ ទោះបីជាយ៉ាងណា គណៈកម្មាធិការអូឡាំពិកអន្តរជាតិ (IOC) នៅតែអនុញ្ញាតឲ្យប្រកួត ហើយនាងទទួលបានមេដាយមាស បន្ទាប់ពីយកឈ្នះកីឡាការិនីចិន Yang Liu ដោយពិន្ទុនៅវគ្គផ្តាច់ព្រ័ត្រ។

ករណីនេះ Khelif បានដាក់ពាក្យបណ្តឹងជាផ្លូវការប្រឆាំងទៅលើបណ្តាញទំនាក់ទំនងសង្គម X ពីបទយាយីពាក់ព័ន្ធនឹងសិទ្ធិភេទ។

ជុំវិញការរិះគន់ អ្នកនាំពាក្យ IOC លោក Mark Adams បាននិយាយថា មានព័ត៌មានយល់ច្រឡំជាច្រើនតាមបណ្តាញទំនាក់ទំនងសង្គម។ កីឡាប្រដាល់សកលនៅកីឡាអូឡាំពិកក្នុងទីក្រុងបារីស គ្រប់គ្រងដោយអង្គភាពពិសេសមួយរបស់ IOC ដែលអនុវត្តតាមច្បាប់ រាប់ទាំងការសម្រេចចិត្តអំពីសិទ្ធិភេទត្រឹមត្រូវ ផ្អែកតាមកីឡាអូឡាំពិក ឆ្នាំ២០១៦ បន្ទាប់ពីបំបែកខ្លួនចេញពីស្ថាប័នគ្រប់គ្រងកីឡាប្រដាល់សកលអន្តរជាតិ។

រហូតដល់ពេលនេះ កីឡាការិនី Imane Khelif អាយុ២៧ឆ្នាំ ធ្លាប់ប្រកួតអាជីព៥៦ដង ក្នុងនោះឈ្នះ៤៧ដង (ការឈ្នះ៤លើកត្រូវបានចាត់ទុកជាមោឃៈ) និងចាញ់៩លើក។ កាលពីឆ្នាំ២០២២ នាងបានឈ្នះមេដាយមាស ក្នុងព្រឹត្តិការណ៍ Mediterranean Games, ឈ្នះមេដាយមាសពីការប្រកួតជើងឯកទ្វីបអាហ្វ្រិក និងឈ្នះមេដាយប្រាក់ ក្នុងការប្រកួតជើងឯកពិភពលោក។ ឆ្នាំ២០២៣ នាងបានឈ្នះមេដាយមាសក្នុងការប្រកួត Arab Games និងកាលពីខែមេសា ឆ្នាំ២០២៤ នាងបានឈ្នះជើងឯក World Boxing Cup នៅសហរដ្ឋអាមេរិក និងបានឈ្នះមេដាយមាសកីឡាអូឡាំពិក នៅបារាំង៕