កីឡា

កីឡាករសិង្ហបុរី Goh J.H. សរសើរ វឿន វាសនា និង ផល រតនៈ ល្អខ្លាំង

បានផុស

២ years មុន

នៅ

ថ្ងៃព្រហស្បតិ៍ ៥ កញ្ញា ២០២៤

ដោយ

កីឡាករលេខ១២របស់ក្រុមបាល់ទះជម្រើសជាតិសិង្ហបុរី Goh J.H. បានសរសើរក្រុមបាល់ទះជម្រើសជាតិកម្ពុជាពីសមត្ថភាពដ៏អស្ចារ្យ ប៉ុន្តែបើនិយាយពីកីឡាករម្នាក់ៗរូបគេចាប់អារម្មណ៍ខ្លាំងលើកីឡាករកម្ពុជា២រូប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសជាមួយសារព័ត៌មាន«កម្ពុជាថ្មី» បុរសសង្ហាសក់វែង Goh ដែលមានអ្នកគាំទ្រកម្ពុជាច្រើនថតរូបជាមួយបាននិយាយថា រូបគេពិតជារីករាយណាស់ដែលបានមកប្រកួតនៅទឹកដីកម្ពុជា ទោះបីជាលទ្ធផលមិនសូវល្អប្រសើរក៏ដោយ។ អ្វីដែលធ្វើឲ្យរូបគេចង់ចាំបំផុតគឺការលេងតទល់ជាមួយក្រុមខ្លាំងៗដែលបានធ្វើឲ្យពួកគេបង្ហាញអស់ពីសមត្ថភាព និងដឹងពីកម្រិតខ្លួនឯង។

កីឡាករបាននិយាយថា ៖«ពេលខ្ញុំលេងនៅសិង្ហបុរី ខ្ញុំមានអារម្មណ៍ថា ខ្លួនឯងល្អ តែពេលមកប្រកួតនៅទីនេះទើបដឹងថា វ៉ូវៗ ក្រុមគេពិតជាមិនធម្មតា។ បើនិយាយពីក្រុមកម្ពុជាវិញពិតជាខ្លាំង។ កីឡាករកម្ពុជាខ្ពស់ ធំ លោតបានខ្ពស់ ហើយវ៉ៃផ្តាច់ល្អ។ អូ! ខ្ញុំបានប្រឹងប្រែងអស់ពីសមត្ថភាពហើយ តែមិនអាចទៅរួចទេ ពីព្រោះក្រុមកម្ពុជាខ្ពស់ៗណាស់»។

នៅពេលសួរថា តើកីឡាករកម្ពុជារូបណាដែលលោកស្គាល់សម្រាប់ការមកប្រកួតនៅកម្ពុជាលើកដំបូងនេះ? Goh J.H. បានឆ្លើយយ៉ាងច្បាស់ថា ៖«ខ្ញុំស្គាល់ច្បាស់គឺ វាសនា! គាត់ពិតជាល្អខ្លាំងណាស់។ ម្នាក់ទៀតគឺកីឡាករបិទកណ្តាល ផល រតនៈ ក៏មិនធម្មតាដែរ។ ខ្ញុំពិតជារីករាយដែលបានលេងតទល់ជាមួយពួកគាត់»។

កីឡាករសិង្ហបុរីរូបនេះបានចាត់ទុកការបង្កើតឲ្យមានពានរង្វាន់ SEA V. League Challenge ពិតជាមានសារៈសំខាន់សម្រាប់វិស័យកីឡាបាល់ទះនៅក្នុងតំបន់អាស៊ាន។ កន្លងមកមិនសូវមានកម្មវិធីប្រកួត ដូច្នេះកីឡាករនៅប្រទេសអាស៊ាននីមួយៗមិនសូវមានឱកាសបង្ហាញសមត្ថភាពក្នុងការប្រកួតអន្តរជាតិឡើយ។ នៅតំបន់ផ្សេងៗមានកម្មវិធីប្រកួតច្រើន ហើយក្រុមជម្រើសជាតិ ឬក្លិបរបស់គេខ្លាំង។ នៅពេលនេះមានកម្មវិធីប្រកួតនៅតំបន់អាស៊ានគឺពិតជាល្អខ្លាំង។

សូមបញ្ជាក់ថា ក្រុមបាល់ទះជម្រើសជាតិសិង្ហបុរីទទួលបានចំណាត់ថ្នាក់លេខ៣ក្នុងពានរង្វាន់សម្តេចធិបតី SEA V. League Challenge 2024 បន្ទាប់ពីឈ្នះឡាវ២ដង ប៉ុន្តែចាញ់ម្ចាស់ផ្ទះកម្ពុជា១ដង និងចាញ់ម៉ាឡេស៊ី២ដង៕