កីឡា

នេះជាការរីកចម្រើនពិតប្រាកដ ក្លិបកម្ពុជាលេខ២៣ក្នុងចំណោម៤៧ប្រទេសនៅអាស៊ី

បានផុស

២៥ វិនាទី មុន

នៅ

ថ្ងៃពុធ ២១ ឧសភា ២០២៥

ដោយ

សហព័ន្ធកីឡាបាល់ទាត់អាស៊ី (AFC) បានចេញតារាងចំណាត់ថ្នាក់ក្លិបបាល់ទាត់អាស៊ីជាផ្លូវការហើយ បន្ទាប់ពីបញ្ចប់រដូវកាល ២០២៤-២៥ ខណៈក្លិបបាល់ទាត់នៃលីគបាល់ទាត់កំពូលកម្ពុជាបានស្ថិតនៅចំណាត់ថ្នាក់លេខ២៣ក្នុងចំណោម៤៧ប្រទេសទូទាំងទ្វីបអាស៊ី។

ព្រះខ័នរាជស្វាយរៀង ទទួលបានចំណាត់ថ្នាក់លេខ២ AFC Challenge League

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ចប់រដូវកាលនៅចំណាត់ថ្នាក់លេខ២៣នេះ បន្ទាប់ពីក្លិបបាល់ទាត់កម្ពុជាធ្វើបានយ៉ាងល្អក្នុងពីររដូវកាលចុងក្រោយ។ ក្លិបភ្នំពេញក្រោន បានក្លាយជាផ្នែកមួយក្នុងការសន្សំពិន្ទុសម្រាប់ក្លិបតំណាងកម្ពុជា តាមរយៈការប្រកួតពានរង្វាន់អាស៊ី AFC Cup ដោយបានយកឈ្នះក្លិបរបស់ប្រទេសហ្វីលីពីន មីយ៉ាន់ម៉ា និងអូស្ត្រាលី រហូតឈានដល់វគ្គពាក់កណ្តាលផ្តាច់ព្រ័ត្រក្នុងតំបន់។

ទោះបីជាយ៉ាងណា ការបញ្ចប់រដូវកាល ២០២៣-២៤ របស់ភ្នំពេញក្រោន នៅមិនទាន់ទទួលបានពិន្ទុគ្រប់គ្រាន់សម្រាប់ក្លិបកម្ពុជាទទួលបានកៅអីវគ្គសន្សំពិន្ទុក្នុងពូល ពានរង្វាន់ AFC Challenge League ឡើយដោយត្រូវប្រកួតជម្រុះដដែល។

ក្រុមព្រះខ័នរាជស្វាយរៀង និង FK Arkadag វគ្គផ្តាច់ព្រ័ត្រ

ក្លិបព្រះខ័នរាជស្វាយរៀង ក្នុងនាមជាម្ចាស់ជើងឯកលីគកំពូលកម្ពុជា រដូវកាល២០២៣-២៤ ត្រូវប្រកួតជម្រុះក្នុងពានរង្វាន់ AFC Challenge League រដូវកាល២០២៤-២៥ ប៉ុន្តែដោយសារក្លិបរបស់ប្រទេសកូរ៉េខាងជើងមិនបានបំពេញលក្ខខណ្ឌគ្រប់គ្រាប់ទើបមិនអាចចូលរួមប្រកួតបាន ហើយព្រះខ័នរាជស្វាយរៀងក៏ទទួលបានកៅវគ្គសន្សំពិន្ទុក្នុងពូលដោយស្វ័យប្រវត្តិ។

ព្រះខ័នរាជស្វាយរៀង ធ្វើបានយ៉ាងល្អ ក្នុងពានរង្វាន់ AFC Challenge League រដូវកាល ២០២៤-២៥ ដោយបានឈ្នះ១ប្រកួត ស្មើ១ប្រកួត និងចាញ់១ប្រកួតនៅវគ្គសន្សំពិន្ទុក្នុងពូល។ នៅវគ្គ៨ក្រុមចុងក្រោយ ក្លិបតំណាងកម្ពុជាបានយកឈ្នះក្លិបរបស់មីយ៉ាន់ម៉ា និងវគ្គពាក់កណ្តាលផ្តាច់ព្រ័ត្រ បានយកឈ្នះក្រុមឥណ្ឌូណេស៊ី បានឡើងដល់វគ្គផ្តាច់ព្រ័ត្រ ជួបក្រុមមកពីប្រទេសតួកមេនីស្ថាន ហើយទទួលបានចំណាត់ថ្នាក់លេខ២។

តាមរយៈលទ្ធផលនៃការប្រកួតដ៏ល្អរហូតឈានដល់វគ្គផ្តាច់ព្រ័ត្ររបស់ ព្រះខ័នរាជស្វាយរៀងនេះហើយដែលបានផ្តល់ឲ្យក្លិបលីគកម្ពុជាទទួលបានពិន្ទុកាន់តែច្រើន និងទទួលបានកៅអី វគ្គសន្សំពិន្ទុក្នុងពូល ព្រមទាំងទទួលបានកន្លះកៅអីទៀតសម្រាប់វគ្គជម្រុះ។ ដូច្នេះមានន័យថា រដូវកាល ២០២៥-២៦ ខាងមុខ ក្លិបរបស់កម្ពុជា២បានប្រកួតក្នុងពានរង្វាន់ AFC Challenge League គឺព្រះខ័នរាជស្វាយរៀង ក្នុងនាមជាជើងឯកលីគ នៅវគ្គសន្សំពិន្ទុក្នុងពូល និងភ្នំពេញក្រោន នៅវគ្គជម្រុះ។

ក្លិបលីគកំពូលកម្ពុជា ស្ថិតនៅលេខ២៣ ក្នុងចំណោម ៤៧ ប្រទេសដែលគិតទាំងតំបន់អាស៊ីខាងកើត និងអាស៊ីខាងលិច ប៉ុន្តែបើគិតតែនៅក្នុងតំបន់អាស៊ីខាងកើត កម្ពុជាស្ថិតនៅចំណាត់ថ្នាក់កំពូលទាំង១០ ដែលមានជប៉ុនលេខ១ កូរ៉េខាងត្បូងលេខ២ ថៃលេខ៣ ចិនលេខ៤ អូស្ត្រាលីលេខ៥ ម៉ាឡេស៊ីលេខ៦ វៀតណាមលេខ៧ សិង្ហបុរីលេខ៨ ហុងកុងលេខ៩ និងកម្ពុជាលេខ១០។ កម្ពុជាស្ថិតនៅលើ១២ប្រទេសផ្សេងទៀតនៅក្នុងតំបន់អាស៊ីខាងកើត។

នៅក្នុងតំបន់អាស៊ានវិញ កម្ពុជាស្ថិតនៅពីលើក្លិបរបស់ប្រទេស ឥណ្ឌូណេស៊ី ហ្វីលីពីន មីយ៉ាន់ម៉ា ឡាវ ទីម័រខាងកើត និង ព្រុយណេ ព្រមទាំងនៅលើប្រទេសជាច្រើនទៀតនៅតំបន់អាស៊ីទាំងមូល។ ទាំងនេះសបញ្ជាក់ឲ្យឃើញយ៉ាងច្បាស់ពីការរីកចម្រើនពីកម្រិតគុណភាពរបស់ក្លិបបាល់ទាត់នៃលីគកំពូលកម្ពុជា៕