ចរាចរណ៍

លោកយាយវ័យចំណាស់ម្នាក់ ដើរតាមទ្រូងផ្លូវជាតិ ត្រូវរថយន្តបុកពីក្រោយស្លាប់

បានផុស

១ year មុន

នៅ

ថ្ងៃព្រហស្បតិ៍ ២៤ មិថុនា ២០២១

ដោយ

លោកយាយវ័យចំណាស់ម្នាក់ ដើរតាមទ្រូងផ្លូវជាតិសុខៗ ត្រូវរថយន្តបើកមកបុកពីក្រោយពេញទំហឹងបណ្តាលឲ្យស្លាប់នៅនឹងកន្លែង នៅវេលាម៉ោង៥ ព្រឹកថ្ងៃទី២៤ ខែមិថុនា ឆ្នាំ២០២១ នៅលើកំណាត់ផ្លូវជាតិលេខ៥៨ ចំណុចចន្លោះបង្គោលគីឡូម៉ែត្រលេខ៣៧៦និង៣៧៧ ស្ថិតក្នុងភូមិសូរិយា ឃុំកូប ស្រុកអូរជ្រៅ ខេត្តបន្ទាយមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នគរបាលស្រុកអូរជ្រៅ បានឲ្យដឹងថា លោកយាយរងគ្រោះមាន ឈ្មោះ កុយ យ៉ង់ អាយុ៨៨ឆ្នាំ រស់នៅភូមិនិមិត្ត១ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។ នគរបាលស្រុកអូរជ្រៅ បានបញ្ជាក់ឲ្យដឹងបន្តទៀតថា មុនពេលកើតហេតុលោកយាយរងគ្រោះ បានដើរលើទ្រូងផ្លូវជាតិលេខ៥៨ ពីលិចទៅកើត ពេលដើរដល់ចំណុចកើតហេតុស្របពេលនេះ មានរថយន្ត១គ្រឿងម៉ាកតូយូតាពណ៌ស មិនចាំស្លាកលេខបើកស្របទិសគ្នា ស្រាប់តែបើកទៅបុកលោកយាយពីក្រោយពេញទំហឹងបណ្តាលឲ្យលោកយាយស្លាប់ភ្លាមៗមួយរំពេចនៅនឹងកន្លែង។

នគរបាលបានបញ្ជាក់បន្តថា បើតាមការបំភ្លឺពីកូនលោកយាយថា ម្តាយគាត់មានវ័យចំណាស់ហើយមានស្មារតីវង្វេងពេលបាត់រូបគាត់ពួកកូនចៅ បាននាំគ្នាដើររកដែរតែរកមិនឃើញទើបនៅព្រឹកនេះដឹងថា ម្តាយជួបគ្រោះថ្នាក់ចរាចរណ៍ស្លាប់ ចំណែករថយន្តបុកលោកយាយពីក្រោយស្លាប់បានបើករត់គេចខ្លួនបាត់ ពេលនេះសមត្ថកិច្ចកំពុងធ្វើការស្រាវជ្រាវតាមចាប់។ ចំពោះសពជនរងគ្រោះ ត្រូវបានប្រគល់ជូនក្រុមគ្រួសារយកទៅចាត់ចែងធ្វើបុណ្យតាមប្រពៃណី៕

អត្ថបទ៖ វ៉ាន់ណាង