រថយន្ត និងម៉ូតូបុកគ្នា បណ្ដាល​ឱ្យយុវជន ២ នាក់រងរបួសធ្ងន់ដាច់ជើង និងបាក់ភ្លៅ

ករណីគ្រោះថ្នាក់ចរាចរណ៍ រវាងរថយន្តឡិចស៊ីស និងម៉ូតូបុកគ្នាពេញទំហឹងក្នុងទិសដៅបញ្ច្រាស់ បណ្ដាលឱ្យយុវជនម្នាក់ដាច់កំភួនជើងម្ខាងផ្លោងជិត២០ម៉ែត្រទើលើដើមឈើ និងយុវជនម្នាក់ទៀតរងរបួសបាក់ភ្លៅ។

ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោង៥និង២០នាទីល្ងាច ថ្ងៃទី២៧ ខែមិថុនា ឆ្នាំ២០២១ តាមបណ្តោយផ្លូវជាតិលេខ៧៨ ត្រង់ចំណុចមុខផ្ទះជាងសេង ស្ថិតនៅក្នុងភូមិប្លង់ ឃុំប៉ាតេ ស្រុកអូរយ៉ាដាវ ខេត្តរតន គិរី។

របាយការណ៍សមត្ថកិច្ច បានឱ្យដឹងថា បុរសជនរងគ្រោះឈ្មោះ អួង សាក់ មានស្រុកកំណើតនៅខេត្តព្រៃវែង រងរបួសធ្ងន់ ដាច់កំភួនជើងខាងស្តាំផ្លោងជិត ២០ ម៉ែត្រ ចំណែកបុរសម្នាក់ទៀតឈ្មោះ បឿក អាយុ ២០ ឆ្នាំ របួសបាក់ភ្លៅខាងស្ដាំ។

ក្រោយកើតហេតុម្ចាស់រថយន្តឡិចស៊ីស ព្យាយាមបើករត់គេចចេញពីកន្លែងកើតហេតុ មកដល់ត្រង់ចំណុចភូមិប៉ាអរ ឃុំប៉ាតេ ស្រុកអូរយ៉ាដាវ បានផ្លុងរថយន្តចោលនៅលើចិញ្ចើមផ្លូវជាតិ មិនទទួលខុសត្រូវឡើយ ហើយចុះរត់គេចខ្លួនបាត់ស្រមោល។

ចំណែកជនរងគ្រោះត្រូវបញ្ជូនទៅសង្គ្រោះបន្ទាន់នៅមន្ទីរពេទ្យ។ សមត្ថកិច្ចកំពុងស្រាវជ្រាវរកម្ចាស់រថយន្ត ចាត់ការតាមច្បាប់៕ អត្ថបទ៖ វុទ្ធឦសាន