ចរាចរណ៍

បង្កគ្រោះថ្នាក់ចរាចរហើយបើករត់បាត់ សង្ស័យមិនដឹងធ្លាក់ស្លាកលេខនៅកន្លែងកើតហេតុ

បានផុស

៥ years មុន

នៅ

ថ្ងៃសៅរ៍ ៦ វិច្ឆិកា ២០២១

ដោយ

រថយន្តFORD RANGER មួយគ្រឿងបើកបរក្នុងល្បឿនលឿនបង្កគ្រោះថ្នាក់ចរាចរណ៍បុករថយន្ត4RUNNER ពេញទំហឹងបណ្តាលឱ្យរងការខូចខាតយ៉ាងដំណំ ហើយរថយន្តបង្កបើកគេចខ្លួនបាត់ស្រមោល បន្សល់ទុកតែស្លាកលេខនៅកន្លែងកើតហេតុ។

ហេតុការណ៍នេះបានកើតឡើងកាលពីវេលាម៉ោង១០និង០០នាទីយប់ ថ្ងៃទី០៥ ខែវិច្ឆិកា ឆ្នាំ២០២១ ស្ថិតនៅតាមបណ្ដោយផ្លូវR8 ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេបានឃើញរថយន្តមួយគ្រឿងម៉ាក4RUNNERពណ៌ទឹកប្រាក់ស៊េរីចាស់ពាក់ស្លាកលេខសៀមរាប2A 3895បើកបរដោយបុរសម្នាក់ នឹងរួមដំណើរដោយបុរសម្នាក់ទៀតដែលធ្វើដំណើរក្នុងទិសដៅពីលិចទៅកើត ខណៈមកដល់ត្រង់ចំណុចកើតហេតុផ្លូវបែកជាបួន ស្រាប់តែមានរថយន្តមួយគ្រឿងម៉ាកFORD RANGER ពណ៌ទឹកប្រាក់ ពាក់ស្លាកលេខភ្នំពេញ 2AQ 2335 បើកបរដោយបុរសម្នាក់ធ្វើដំណើរក្នុងទិសដៅពីត្បូងទៅជើងក្នុងល្បឿនលឿន ជ្រុលទៅបុករថយន្ត4RUNNERពេញទំហឹងបណ្ដាលឱ្យរថយន្ត4RUNNERវិល២ ទៅ៣ជុំរួចបន្តទៅបុកផ្ទប់នឹងជញ្ជាំងដីឡូត៍មួយកន្លែងរងការខូចខាតយ៉ាងដំណំ ចំណែករថយន្តបង្ក បានបន្តដំណើររត់គេចខ្លួនបាត់ស្រមោល បន្សល់តែស្លាកលេខនៅកន្លែងកើតហេតុ តែសំណាងល្អមិនបណ្ដាលឱ្យមានអ្នកណារងរបួសនោះទេ។

ក្រោយកើតហេតុសមត្ថកិច្ចមូលដ្ឋានបានមកដល់រួចបានទំនាក់ទំនងទៅសមត្ថកិច្ចជំនាញចរាចរណ៍នៃស្នងការដ្ឋាននគរបាលរាជធានីភ្នំពេញ ចុះធ្វើការវាស់វែងយករថយន្តនិងស្លាកលេខរថយន្តបង្កទៅរក្សាទុករង់ចាំធ្វើការស្រាវជ្រាវរករថយន្តបង្កមកធ្វើការដោះស្រាយគ្នានៅពេលក្រោយតាមផ្លូវច្បាប់៕

អត្ថបទ៖ សុខា