ចរាចរណ៍

ជនជាតិចិនបើករថយន្ដបុករថយន្ដពីរគ្រឿងនៅចំណុចផ្លូវបំបែកជាបួន

បានផុស

៣ years មុន

នៅ

ថ្ងៃចន្ទ ១៤ កុម្ភៈ ២០២២

ដោយ

ជនជាតិចិនប្រុស ស្រី មួយក្រុមបើករថយន្តក្នុងល្បឿនលឿនមិនប្រយ័ត្នជ្រុលបុករថយន្តហាយលែនឌ័រមួយគ្រឿងដែលកំពុងបើកឆ្លងផ្លូវបំបែកជាបួន និងរុញទៅបុកផ្ទប់ពីក្រោយរថយន្តកាមរីបាលែន មួយគ្រឿងទៀត ដែលកំពុងឈប់ចតស្ងៀមនៅលើខឿនចិញ្ចើមផ្លូវបណ្ដាលឲ្យរងការខូចខាត។

ហេតុការណ៍នេះ បានកើតឡើងកាលពីវេលាម៉ោង១២និង១៥នាទី រំលងអាធ្រាត្រ ថ្ងៃទី១៤ ខែកុម្ភៈ ឆ្នាំ២០២២ត្រង់ចំណុចខាងមុខធនាគារ ហុង លីអុង តាមបណ្ដោយផ្លូវ២១៤កែងផ្លូវ៥១ ក្នុងសង្កាត់ បឹងរាំង ខណ្ឌដូនពេញ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញស្ត្រី៣នាក់បើករថយន្តមួយគ្រឿងម៉ាក ហាយលែនឌ័រ ពណ៌ស ពាក់ស្លាកលេខ ភ្នំពេញ 2AR-9223 ដែលធ្វើដំណើរ តាមបណ្ដោយផ្លូវ៥១ទិសដៅពីជើងទៅត្បូង លុះដល់ចំណុចកើតហេតុ ដែលជាផ្លូវបំបែកជាបួន បានបើកឆ្លងកាត់ផ្លូវ២១៤ តែពេលដែលឆ្លងជិតបានពាក់កណ្ដាលផ្លូវ ក៏ត្រូវរថយន្តមួយគ្រឿងទៀតម៉ាក ឡិចស៊ីស LX570 ពណ៌ ខ្មៅ ពាក់ស្លាកលេខ ភ្នំពេញ 2BG-2777 ដែលបើកបរដោយជនជាតិចិន ប្រុស ស្រី មួយក្រុមមានគ្នា៤ទៅ៥នាក់ តាមបណ្ដោយផ្លូវ២១៤ ទិសដៅពីលិចទៅកើត និងក្នុង ល្បឿនយ៉ាងលឿនខ្វះការប្រុងប្រយ័ត្ន ជ្រុលទៅបុកចំរថយន្តហាយលែនឌ័រចំហៀងខាងស្តាំ និងរុញទៅបុកផ្ទុបពីក្រោយរថយន្តមួយគ្រឿងទៀតម៉ាកកាមរីបាលែនមួយគ្រឿងទៀត ពណ៌ស ពាក់ស្លាកលេខភ្នំពេញ 2AN-0362 ដែលឈប់ចតស្ងៀមនៅលើខឿនតាមចិញ្ចើមផ្លូវ រួមជាមួយបង្គោលស្លាក សញ្ញាចរាចរណ៍ បាក់អស់មួយដើម និងបណ្ដាលឲ្យរថយន្តទាំង៣គ្រឿងរងការខូចខាតយ៉ាងដំណំ។

ក្រោយកើតហេតុ ដោយមិនអាចធ្វើការចរចាដោះស្រាយគ្នាបានទើប សមត្ថកិច្ចមូលដ្ឋាន និង សមត្ថកិច្ចជំនាញ ចុះមកធ្វើការវាស់វែងស្ទូចយករថយន្តទាំង៣គ្រឿងទៅរក្សាទុកនៅការិយាល័យ ចរាចរណ៍ផ្លូវគោក នៃស្នងការដ្ឋាននរគបាលរាជធានីភ្នំពេញ ដើម្បីរង់ចាំធ្វើការដោះស្រាយគ្នាទៅ តាមផ្លូវច្បាប់នៅពេលក្រោយ៕