ភ្លៀងធ្លាក់យ៉ាងគំហុកសម្លាប់មនុស្ស៤៤នាក់ និងបង្កការបំផ្លិចបំផ្លាញធ្ងន់ធ្ងរក្នុងប្រទេសម៉ិកស៊ិក

ភ្លៀងធ្លាក់ខ្លាំងបានបង្កជាគ្រោះមហន្តរាយទឹកជំនន់ និងបំណាក់នៅទូទាំងភាគកណ្តាល និងភាគខាងកើតប្រទេសម៉ិកស៊ិក ដោយបានសម្លាប់មនុស្សយ៉ាងហោចណាស់ ៤៤នាក់ និងបំផ្លាញផ្ទះរាប់រយខ្នង។ នេះបើយោងតាមការចេញផ្សាយរបស់សារព័ត៌មានCNA នៅថ្ងៃទី១២ខែ តុលា។

រដ្ឋដែលរងគ្រោះខ្លាំងជាងគេគឺរដ្ឋ Hidalgo, Puebla, Queretaro និង Veracruz។ ក្នុងនោះ ទីក្រុងHuauchinango ក្នុងរដ្ឋ Puebla គឺជាទីក្រុងភ្នំដែលរងផលប៉ះពាល់ខ្លាំងបំផុត ជាពិសេសនៅតំបន់ជួរភ្នំ Sierra Madre Oriental។ អ្នកស្រុកនៅទីនោះបានពណ៌នាអំពីទិដ្ឋភាពដ៏រន្ធត់ ខណៈដែលទឹកទន្លេហក់ឡើងហូរចេញជាភក់ពេញតំបន់មួយរំពេច។ ផ្ទះរាប់សិបខ្នងនិងផ្លូវថ្នល់ត្រូវបំផ្លាញក្រោមទឹកជំនន់ភ្លាមៗ។

គ្រោះមហន្តរាយនេះបានធ្វើឱ្យសហគមន៍ជនបទដាច់ស្រយាលប្រហែល ១០០ រងគ្រោះដាច់ផ្លូវនិងដាច់ចរន្តអគ្គិសនី ដែលរារាំងដល់កិច្ចខិតខំប្រឹងប្រែងជួយសង្គ្រោះ។ ជាការឆ្លើយតបទាហាន​ត្រូវ​បាន​​ដាក់​ពង្រាយ​ដើម្បី​បោសសម្អាត​កម្ទេចកម្ទី និង​ជួយ​ប្រជាជនរងគ្រោះ។ រដ្ឋាភិបាលម៉ិកស៊ិកក៏​បាន​ប្រកាស​អាសន្ន​ក្នុង​តំបន់​ដែល​រង​គ្រោះ ខណៈ​ប្រតិបត្តិការ​ជួយ​សង្គ្រោះ​នៅ​តែ​បន្ត​ចំពេល​មាន​ការ​ភ័យ​ខ្លាច​ថា​នឹង​មាន​ភ្លៀង​ធ្លាក់​បន្ថែម​ទៀត និង​បំណាក់ដីនៅ​ប៉ុន្មាន​ថ្ងៃ​ខាង​មុខ។

បើតាមអ្នក​ជំនាញ​អាកាសធាតុ​បាននិយាយ​ថា ភ្លៀង​ធ្លាក់​ខ្លាំង​នេះ​បណ្តាល​មក​ពី​ការ​ប្រែប្រួល​អាកាសធាតុ​តាម​រដូវ។ ខ្យល់​ក្តៅ និង​សំណើម​ពី​ឈូង​សមុទ្រ​ម៉ិកស៊ិក​បាន​ហក់​មក​ប៉ះ​ភ្នំ Sierra Madre បង្កើត​ជា​ពពក​ក្រាស់ និង​ភ្លៀង​ធ្លាក់​ខ្លាំង។ ជាមួយគ្នានេះម៉ិកស៊ិកក៏បានឃើញថាមានភ្លៀងធ្លាក់ខ្លាំងបំផុតរបស់ខ្លួនក្នុងប៉ុន្មានទសវត្សរ៍នេះ ហើយឆ្នាំ២០២៥ គឺជាឆ្នាំសើមបំផុតដែលប្រទេសនេះមិនធា្លប់ជួបប្រទះ៕

អត្ថបទ៖ ប៊ុន សុភាព