ផែនដីកើតបាតុភូតមហាកម្រ! ផ្កាយដុះកន្ទុយចំនួន២ បង្ហាញខ្លួនដំណាលគ្នា

គឺជារឿងមហាកម្រ ដែលពិភពលោកកើតមានបាតុភូតផ្កាយដុះកន្ទុយចំនួន២បង្ហាញខ្លួនដំណាលគ្នា ដោយវាហោះមកកៀកផែនដីបំផុតកាលពីចន្លោះថ្ងៃទី២០-២៦ខែតុលា ហើយវាត្រូវចំណាយមហាសែនយូរទៀត ទើបបង្ហាញវត្តមានជិតផែនដីសាជាថ្មី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមគេហទំព័រ Space ផ្សាយកាលពីថ្ងៃអង្គារទី២១ខែតុលាឆ្នាំ២០២៥, ផ្កាយដុះកន្ទុយ Lemmon (C/2025 A6) នឹងបង្ហាញខ្លួននៅអឌ្ឍគោលខាងជើងនៃតំបន់អាមេរិកខាងជើង អឺរ៉ុប អាស៊ីភាគច្រើន និងអាស៊ីអាគ្នេយ៍ ខណៈផ្កាយដុះកន្ទុយ SWAN (C/2025 R2) នឹងបង្ហាញវត្តមាននៅអឌ្ឍគោលខាងត្បូងនៃតំបន់អាហ្វ្រិកខាងត្បូង អាមេរិកខាងត្បូងនិងប្រទេសអូស្រ្តាលី។

☄️ផ្កាយដុះកន្ទុយ Lemmon

នៅថ្ងៃទី២១ ផ្កាយដុះកន្ទុយនេះ បានធ្វើដំណើរមកកៀកផែនដីក្នុងចម្ងាយប្រហែល ៨៩លានគីឡូម៉ែត្រ ជាមួយពន្លឺពណ៌បៃតង។ វាអាចមើលឃើញដោយភ្នែកទទេ ក្នុងលក្ខខណ្ឌអាកាសធាតុអំណោយផល និយាយទៅគឺបើមេឃស្រឡះល្អ។ 

រកឃើញដោយគម្រោង Mount Lemmon Observatory ក្នុងខែមករា ឆ្នាំ២០២៥, Lemmon ជាផ្កាយដុះកន្ទុយដែលបង្ហាញខ្លួនយូរ ប៉ុន្តែបើអ្នកខកខានទស្សនាបាតុភូតលើកនេះ អ្នកត្រូវចាំដល់ ១ ៣៥០ឆ្នាំ ទើបអាចមើលវាឃើញម្តងទៀត។  

☄️ផ្កាយដុះកន្ទុយ SWAN

នៅថ្ងៃទី២០ ផ្កាយដុះកន្ទុយនេះ បានធ្វើដំណើរមកកៀកផែនដីក្នុងចម្ងាយប្រហែល ៣៩លានគីឡូម៉ែត្រ ហើយដ្បិតវាមានចម្ងាយជិតជាង តែវាមិនភ្លឺជាង Lemmon ទេ។ ម្យ៉ាង វាក៏មិនអាចមើលឃើញដោយភ្នែកទទេដែរ ដូច្នេះវាតម្រូវឲ្យប្រើកែវយឹតឬតេលេទស្សន៍តូច ដើម្បីមើលឃើញច្បាស់ ព្រោះវាកំពុងស្រអាប់ទៅវិញហើយ។ 

រកឃើញដោយគម្រោង តារាវិទូស្ម័គ្រចិត្តឈ្មោះ Vladimir Bezugly តាមរយៈទិន្នន័យពីឧបករណ៍ SWAN (Solar Wind Anisotropies) លើយាន SOHO ក្នុងខែកញ្ញា ឆ្នាំ២០២៥, ផ្កាយដុះកន្ទុយ SWAN ក៏បង្ហាញខ្លួនយូរដែរ ប៉ុន្តែបើអ្នកខកខានទស្សនាបាតុភូតលើកនេះ អ្នកត្រូវចាំដល់ជាង ២០ ០០០ឆ្នាំទៀត ទើបអាចមើលវាឃើញជាថ្មី៕

អត្ថបទ៖ សុខ សុវណ្ណ

ចុចអាន៖ ផ្កាយដុះកន្ទុយ បង្ហាញខ្លួននៅ ថៃ