កុំខកខាន! ប្រជាជនកម្ពុជា​ នឹងមើលឃើញផ្កាយដុះកន្ទុយមហាកម្រ ក្នុងខែនេះ

ចាប់ពីថ្ងៃសុក្រទី១១ដល់ចុងខែតុលា ផ្កាយដុះកន្ទុយ C/2023 A3 ឬ Tsuchinshan-ATLAS នឹងគោចរមកកៀកផែនដីបំផុត ហើយមិនត្រឹមតែប្រទេសមួយចំនួននៅលើពិភពលោកអាចមើលឃើញបាតុភូតតារាសាស្រ្តនេះទេ សូម្បីតែកម្ពុជាក៏អាចមើលឃើញដែរ ជាពិសេសគឺអាចមើលឃើញដោយភ្នែកទទេតែម្តង ដោយមិនចាំបាច់ប្រើតេឡេស្កុបឡើយ។ នេះបើយោងតាមការចុះផ្សាយរបស់គេហទំព័រ Sky Live។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមពិតទៅ ផ្កាយដុះកន្ទុយនេះត្រូវបានរកឃើញតាំងពីដើមឆ្នាំ២០២៣មកម្ល៉េះ ដោយស្ថានីយអាវកាស២កន្លែងផ្សេងគ្នា មួយគឺ Tsuchinshan (Purple Mountain Observatory) នៅក្នុងប្រទេសចិន និងមួយទៀតគឺ ATLAS (Asteroid Terrestrial-impact Last Alert System) នៅកោះហាវ៉ៃ សហរដ្ឋអាមេរិក ទើបគេសម្រេចឲ្យឈ្មោះវាបញ្ចូលគ្នាថា Tsuchinshan-ATLAS តែម្តងទៅ។

តាមការអះអាងពីក្រុមអ្នកវិទ្យាសាស្រ្ត ផ្កាយដុះកន្ទុយនេះស្ថិតនៅក្នុងគន្លងអវកាសជាយូរអង្វែងណាស់មកហើយ ពោលគេ​ប៉ាន់​ស្មាន​ថា​ អាចមានអាយុកាល​ប្រហែល ៨០ ០០០ ឆ្នាំឯណោះ ប៉ុន្តែទើបតែពេលនេះប៉ុណ្ណោះដែលវាគោចរមកជិតផែនដី ដូច្នេះទើបគេចាប់អារម្មណ៍ខ្លាំង និងហៅវាថាជាបាតុមហាកម្រ។

សម្រាប់នៅប្រទេសកម្ពុជា យើងក៏អាចមើលឃើញផ្កាយដុះកន្ទុយនេះដោយភ្នែកទទេបានដែរ ពោលគឺវានឹងបង្ហាញខ្លួននៅទិសខាងកើត ហើយពេលវេលាល្អបំផុតដើម្បីមើលបាតុភូតនេះគឺចាប់ពីម៉ោង២រំលងអធ្រាត្រដល់ម៉ោង៥ព្រឹក ចាប់ពីថ្ងៃសុក្រទី១១ដល់ចុងខែតុលា។

ទោះបីជាយ៉ាងណាក៏ដោយ ដើម្បីមើលបាតុភូតនេះបាន គឺមេឃត្រូវតែស្រឡះល្អ ប៉ុន្តែដោយសារខែនេះ ប្រទេសកម្ពុជាតែងតែធ្លាក់ភ្លៀងនោះ មានឱកាសមិនច្រើនទេ ដែលគេអាចមើលឃើញផ្កាយដុះកន្ទុយនេះបាន៕

អត្ថបទ៖ សុខ សុវណ្ណ

ចុចអាន៖ ក្រៅពីសូរ្យគ្រាសមហាកម្រ នៅមានព្រឹត្តិការណ៍តារាសាស្រ្ត ៣ទៀត កើតឡើងក្នុងខែមេសានេះ