ផ្កាយដុះកន្ទុយ បង្ហាញខ្លួននៅប្រទេស ថៃ

ផ្កាយដុះកន្ទុយមហាកម្រដែលមានឈ្មោះថា Zijinshan-Atlas ឬ C/2023 A3 បានបង្ហាញខ្លួនលើផ្ទៃមេឃនៃខេត្ត ឈៀងម៉ៃ ប្រទេសថៃ កាលពីថ្ងៃល្ងាចអាទិត្យទី១៣ខែតុលាឆ្នាំ២០២៤ ហើយទស្សនីយភាពដ៏អស្ចារ្យនេះ អាចមើលឃើញដោយភ្នែកទទេតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិដ្ឋភាពនេះត្រូវថតបាននៅឯឧទ្យានជាតិ Doi Inthanon ដោយវិទ្យាស្ថានស្រាវជ្រាវតារាសាស្ត្រជាតិនៃប្រទេសថៃ និងក្រសួងឧត្តមសិក្សា វិទ្យាសាស្ត្រ ស្រាវជ្រាវ និងនវានុវត្តន៍ (MHESI) នៅពេលផ្កាយដុះកន្ទុយ ធ្វើគោចរមកកៀកផែនដីបំផុតពោលគឺស្ថិតនៅចម្ងាយ ៧០.៦លានគីឡូម៉ែត្រពីផែនដី។

តាមសេចក្តីរាយការណ៍បានឲ្យដឹងថា ហេតុតែគេអាចមើលឃើញផ្កាយដុះកន្ទុយនេះបានដោយភ្នែកទទេគឺដោយសារតែផ្ទៃមេឃស្រឡះល្អ និងអាកាសធាតុអំណោយផល។

តាមពិតទៅ ផ្កាយដុះកន្ទុយនេះត្រូវបានរកឃើញតាំងពីដើមឆ្នាំ២០២៣មកម្ល៉េះ ដោយស្ថានីយអាវកាស២កន្លែងផ្សេងគ្នា មួយគឺ Tsuchinshan (Purple Mountain Observatory) នៅក្នុងប្រទេសចិន និងមួយទៀតគឺ ATLAS (Asteroid Terrestrial-impact Last Alert System) នៅកោះហាវ៉ៃ សហរដ្ឋអាមេរិក ទើបគេសម្រេចឲ្យឈ្មោះវាបញ្ចូលគ្នាថា Tsuchinshan-ATLAS តែម្តងទៅ។

តាមការអះអាងពីក្រុមអ្នកវិទ្យាសាស្រ្ត ផ្កាយដុះកន្ទុយនេះស្ថិតនៅក្នុងគន្លងអវកាសជាយូរអង្វែងណាស់មកហើយ ពោលគេ​ប៉ាន់​ស្មាន​ថា​ អាចមានអាយុកាល​ប្រហែល ៨០ ០០០ ឆ្នាំឯណោះ ប៉ុន្តែទើបតែពេលនេះប៉ុណ្ណោះដែលវាគោចរមកជិតផែនដី ដូច្នេះទើបគេចាប់អារម្មណ៍ខ្លាំង និងហៅវាថាជាបាតុមហាកម្រ៕

អត្ថបទ៖ សុខ សុវណ្ណ

ចុចអាន៖ កុំខកខាន! ប្រជាជនកម្ពុជា​ នឹងមើលឃើញផ្កាយដុះកន្ទុយមហាកម្រ ក្នុងខែនេះ