ផ្កាយដុះកន្ទុះនៅថៃ ជាជំនឿថា ប្រទេសជាតិកំពុងវឹកវរឬយ៉ាងណា?

ការមើលឃើញផ្កាយដុះកន្ទុះនៅក្នុងប្រទេសថៃកាលពីថ្ងៃទី២៦តុលា បានធ្វើឲ្យប្រជាជនថៃជាច្រើនលើកករណីដ៏កម្រនេះមកពិភាក្សានៅលើបណ្តាញសង្គម សូម្បីតែកាសែតធំៗក្នុងស្រុកក៏ចុះផ្សាយព្រោងព្រាត ដោយភ្ជាប់នឹងអបិយជំនឿបុរាណជាច្រើន ដោយជឿថា «ប្រទេសជាតិកំពុងឆ្ពោះទៅកាន់ការផ្លាស់ប្តូរធំ»។

ជាក់ស្ដែង តាមរបាយការណ៍ពីប្រជាជននៅខេត្ត Chiang Mai, Nakhon Ratchasima និងក្រុង Bangkok សុទ្ធតែបានឃើញផ្កាយដុះកន្ទុះធំៗនៅលើមេឃព្រមៗគ្នា។ ប៉ុន្តែបណ្ដាផ្សាយព័ត៌មានក្នុងស្រុកដូចជា Thai Rath និង Bangkok Post បានរាយការណ៍ថា បាតុភូតនេះជាផ្នែកនៃភ្លៀងធ្លាក់អាចម៍ផ្កាយ មិនមែនជារឿងអស្ចារ្យនយោបាយទេ។ ទោះជាយ៉ាងណា អ្នកសាសនា និងអ្នកជឿអបិយជំនឿមួយចំនួន នៅតែយកវាជាសញ្ញាថា «ប្រទេសខ្លួនកំពុងឆ្ពោះទៅកាន់ការផ្លាស់ប្តូរធំ»។

ពាក់ព័ន្ធនឹងព្រឹត្តិការណ៍ផ្កាយដុះកន្ទុយនៅក្នុងប្រទេសថៃ បើតាមវិទ្យាស្ថានស្រាវជ្រាវតារាសាស្ត្រជាតិថៃ និងអ្នកវិភាគបានលើកបញ្ចាក់ថា ផ្កាយដុះកន្ទុះគ្រាន់តែជាផ្នែកមួយនៃភពតូចៗ ដែលឆ្លងចូលមកបរិយាកាសផែនដី ហើយឆេះដោយកំដៅខ្លាំង។ វាជាបាតុភូតធម្មជាតិដែលកើតឡើងជារឿយៗ ពិសេសនៅរដូវដែលមានភ្លៀងធ្លាក់អាចម៍ផ្កាយ (Orionid meteor shower)។

វិទ្យាស្ថាននេះបាននិយាយទៀតថា ដោយផ្អែកលើរូបរាងរបស់អាចម៍ផ្កាយដែលលេចឡើងនៅក្នុងវីដេអូប្រព័ន្ធផ្សព្វផ្សាយសង្គមទាំងនេះ វាត្រូវបានគេរំពឹងថានឹងជាប្រភេទផ្ទុះ (Bolide) ដែលមានពន្លឺភ្លឺជាងព្រះច័ន្ទពេញវង់តែប៉ុណ្ណោះ។

ដោយឡែក សម្រាប់តាមអបិយជំនឿប្រពៃណីថៃ ប្រជាជនមួយចំនួនជឿថា ផ្កាយដុះកន្ទុះជាសញ្ញាមិនល្អ ជាសញ្ញានៃការវឹកវរនយោបាយ ឬការផ្លាស់ប្តូរអំណាច។ បើចាស់ៗពីជំនាន់ដើមនៃជនជាតិថៃជឿថា វាបង្ហាញពី ការស្លាប់របស់មនុស្សមានឋានៈធំ ឬអ្នកមានសក្ដិជាសាធារណៈ។ ចំណែកមួយចំនួនផ្សេងទៀតនិយាយថា វាជាសញ្ញានៃសេចក្ដីផ្លាស់ប្តូរពីអាក្រក់ទៅល្អ បើបន្ទាប់មកមានភ្លៀងធ្លាក់ ឬព្រឹត្តិការណ៍ល្អៗកើតឡើង។

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

នៅថៃ ល្បីរឿងគ្រូពេទ្យចាក់​ទឹកក្តៅ​លើ​ក្មេងជនជាតិឡាវ ខណៈគេសង្ស័យថា កើតជំងឺផ្លូវចិត្ត