ព្យុះសង្ឃរា Melissa នាំមកនូវទឹកជំនន់ដ៏សាហាវដល់តំបន់ការ៉ាបៀន

ព្យុះសង្ឃរា Melissa កាន់តែមានកម្លាំងខ្លាំងឡើងៗ ហើយឥឡូវនេះកំពុងវាយប្រហារប្រទេសក្នុងតំបន់ការ៉ាបៀនដូចជាហ្សាម៉ាអ៉ីក ហៃទី និងសាធារណរដ្ឋដូមីនីកែន ជាមួយនឹងភ្លៀងធ្លាក់ខ្លាំង ខ្យល់បក់ខ្លាំង និងទឹកជំនន់ដ៏សាហាវ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី២៦ខែតុលា។

ព្យុះនេះ មានល្បឿនខ្យល់រហូតដល់ ១២០ គីឡូម៉ែត្រក្នុងមួយម៉ោង ត្រូវបានព្យាករណ៍នឹងបង្កការខូចខាតធ្ងន់ធ្ងរ និងបំណាក់ដីក្នុងរយៈពេលប៉ុន្មានថ្ងៃខាងមុខ។ ព្យុះ Melissa ក៏កំពុងធ្វើដំណើរឆ្ពោះទៅកាន់ប្រទេសហ្សាម៉ាអ៉ីកកនៅចុងសប្តាហ៍នេះ ហើយអាចទៅដល់ភាគខាងកើតប្រទេសគុយបានៅកន្លះសប្តាហ៍ទៀត។ ជាការឆ្លើយតបរដ្ឋាភិបាលហ្សាម៉ាអ៉ីកបានបើកជម្រកជាង ៦៥០កន្លែង បិទអាកាសយានដ្ឋាន និងព្រមានប្រជាជនឲ្យត្រៀមបង្ការសុវត្ថិភាព។

រហូតមកដល់ពេលនេះ មនុស្សបួននាក់បានស្លាប់ បីនាក់នៅហៃទី និងម្នាក់នៅសាធារណរដ្ឋដូមីនីកែន។ ទឹកជំនន់នេះក៏បានបំផ្លាញផ្ទះជិត ២០០ ខ្នង កាត់ផ្តាច់សហគមន៍ជាច្រើន និងធ្វើឱ្យមនុស្សជាងកន្លះលាននាក់គ្មានទឹកស្អាតប្រើប្រាស់។ នៅប្រទេសហៃទីឯណោះវិញ ស្ថានភាពកាន់តែអាក្រក់ទៅៗចំពោះអ្នកដែលត្រូវបានផ្លាស់ទីលំនៅដោយសារអំពើហិង្សារបស់ក្រុមអ្នកលេង ហើយឥឡូវនេះកំពុងប្រឈមមុខនឹងព្យុះនៅក្នុងជម្រកមិនមានសុវត្ថិភាព។

អាជ្ញាធរព្រមានថា ព្យុះសង្ឃរា Melissa អាចនាំមកនូវទឹកជំនន់ដ៏មហន្តរាយដល់ផ្នែកខ្លះនៃតំបន់ការ៉ាបៀនក្នុងរយៈពេលប៉ុន្មានថ្ងៃខាងមុខ៕

អត្ថបទ៖ ប៊ុន សុភាព