ត្រាំ ប្រកាសថា អាមេរិក គាំទ្រអាស៊ាន ១០០%

ក្នុងសុន្ទរកថាបើកកិច្ចប្រជុំកំពូលអាស៊ាន-អាមេរិកលើកទី១៤ នៅទីក្រុងគូឡាឡាំពួ នៃប្រទេសម៉ាឡេស៊ី កាលពីថ្ងៃអាទិត្យទី២៦ខែតុលាឆ្នាំ២០២៥ ប្រមុខសេតវិមានលោក ដូណាល់ ត្រាំ បានបញ្ជាក់ពីការប្តេជ្ញាចិត្តរបស់ទីក្រុងវ៉ាស៊ីនក្នុងការគាំទ្រអាស៊ាន ១០០%។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន The Star បានដកស្រង់សម្តីលោកត្រាំ ដែលនិយាយថា៖ «សហរដ្ឋអាមេរិក​ប្តេជ្ញាចិត្ត​ធ្វើជា​ដៃគូ​រឹងមាំនិង​ជា​មិត្ត​របស់​បណ្តា​ប្រទេស​អាស៊ាន​ ច្រើន​ជំនាន់​តទៅ​មុខ​ទៀត។ ​ ​ឆ្នាំមុន យើង​ស្ថិតក្នុង​ជំហរ​ផ្សេងគ្នា ប៉ុន្តែ​ឥឡូវយើងស្ថិតក្នុង​ជំហរ​ល្អ​បំផុត​​មិន​ធ្លាប់មាន។ គ្រប់​ភាគី​ទាំងអស់​អាច​បង្កើត​ភាព​រុងរឿង​នៅ​សងខាង​មហាសមុទ្រ​ប៉ាស៊ីហ្វិក និង​ចាប់យក​ឱកាស​ថ្មីៗ​សម្រាប់​ប្រជាជន​របស់​ពួកគេ»។

សូមជម្រាបថា លោកត្រាំ បានអញ្ចើញមកចូលរួមកិច្ចប្រជុំអាស៊ាននៅប្រទេសម៉ាឡេស៊ី កាលពីថ្ងៃអាទិត្យទី២៧ ដោយក្នុងនោះប្រធានាធិបតីអាមេរិក ក៏បានធ្វើជាអធិបតីក្នុងពិធីចុះកិច្ចព្រមព្រៀងសន្តិភាពកម្ពុជា-ថៃផងដែរ។

ក្រៅពីនេះលោកក៏បានចូលរួមកិច្ចប្រជុំពាក់ព័ន្ធ, ចុះកិច្ចព្រមព្រៀងពាណិជ្ជកម្ម និងសកម្មភាពការទូតផ្សេងៗផងដែរ។

នៅ​ក្រៅ​កិច្ចប្រជុំ​កំពូល លោកត្រាំបាន​ជួបពិភាក្សា​ជាមួយ​មេដឹកនាំ​ដទៃទៀតដូចជា​នាយករដ្ឋមន្ត្រី​ម៉ាឡេស៊ី Anwar Ibrahim)និង​ប្រធានាធិបតី​ប្រេស៊ីល Luiz Inacio Lula da Silva។ 

ដំណើរ​ទស្សនកិច្ច​របស់​លោក ត្រាំ នៅឆ្នាំ២០២៥ គឺជា​លើកដំបូង​ដែល​លោក​បាន​ចូលរួម​កិច្ចប្រជុំ​កំពូល​អាស៊ាន​ចាប់តាំងពី​ឆ្នាំ២០១៧។ ប្រធានាធិបតី​អាមេរិកមុនៗ រួមទាំង​លោក បារ៉ាក់ អូបាម៉ា ផងនោះ ក៏ធ្លាប់​ចូលរួមដែរដើម្បី​ភ្ជាប់ទំនាក់ទំនង​ជាមួយ​តំបន់​នេះ៕

អត្ថបទ៖ សុខ សុវណ្ណ

ចុចអាន៖ ​​[វិចារណកថា​] ព្រឹត្តិការណ៍​​​​​​​ចុះហត្ថលេខា​កិច្ចព្រមព្រៀងសន្តិភាព​​​​កម្ពុជា-ថៃ​ គ្របដណ្តប​​មាតិកាព័ត៌មាន​សកលលោក​