​គម្រោង​អភិវឌ្ឍន៍​ឆ្នេរ​តេជោសន្តិភាពកែប ​បញ្ចប់​ការ​សាង​សង់ ត្រៀម​​ស្វាគមន៍​ភ្ញៀវទេសចរ​ក្នុង​ឱកាស​បុណ្យ​អុំទូក

គម្រោងអភិវឌ្ឍន៍ឆ្នេរតេជោសន្តិភាពកែបប្រវែង ២ ៧០០ ម៉ែត្រ បញ្ចប់ការសាងសង់ នឹងបើកឲ្យប្រជាពលរដ្ឋ និងភ្ញៀវទេសចរជាតិ និងអន្តជាតិចូលលេងកម្សាន្តក្នុងអំឡុងពិធីបុណ្យអុំទូកនាខាងមុខ។

លោក សោម ពិសិដ្ឋ អភិបាលខេត្តកែប នៅថ្ងៃទី ២៧ ខែតុលា ឆ្នាំ២០២៥ បានចុះត្រួតពិនិត្យមើលវឌ្ឍនភាព និងជំរុញការសាងសង់ឱ្យរួចរាល់នូវរង្វង់មូលគយគន់ទេសភាពនៃគម្រោងឆ្នេរខ្សាច់កម្សាន្តសាធារណៈកម្រិតខ្ពស់ ឆ្នេរតេជោសន្តិភាពកែប ឲ្យរួចរាល់មុន ដើម្បីទទួលស្វាគមន៍ដំណើរកម្សាន្តរបស់បងប្អូនប្រជាពលរដ្ឋនៅក្នុងឱកាសព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នាពេលខាងមុខនេះ។

លោកអភិបាលខេត្តកែបបានជំរុញឲ្យក្រុមការងារបញ្ចប់ការសាងសង់រង្វង់មូលនៅក្រោយផ្សារក្តាម ខណៈរង្វង់មូលលោកយាយជំទាវម៉ៅឲ្យរួចរាល់ប៉ុន្តែនៅសល់រូបចម្លាក់កម្ពស់ ២១ ម៉ែត្រ។

លោក សោម ពិសិដ្ឋ បានចុះត្រួតពិនិត្យឆ្នេរតេជោសន្តិភាពត្រូវបញ្ចប់ការសាងសង់រង្វង់មូលសម្រាប់គយគន់មើលទេស​ភាពដូចក្នុងគម្រោង រួមទាំងពយទប់ទឹករលកឲ្យបានមុនពិធីបុណ្យអុំទូក ខណៈជំហានបន្តទៀតដូចជាការសាងសង់ផ្លូវថ្មើរជើង ផ្លូវជិះកង់ និងហេដ្ឋារចនាសម្ព័ន្ធផ្សេងទៀតនឹងបញ្ចប់បន្តបន្ទាប់តាមគម្រោងនាពេលខាងមុខ។

លោក សោម ពិសិដ្ឋ អភិបាលខេត្តកែបបានលើកឡើងថា គម្រោងអភិវឌ្ឍរមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់ ឆ្នេរតេជោសន្តិភាពខេត្តកែប ធ្វើឡើងក្រោមទម្រង់នៃកិច្ចសន្យាអភិវឌ្ឍន៍រួមគ្នារវាងរដ្ឋ និងឯកជន ក្នុងគោល​ដៅកែលម្អ និងបង្កើតឆ្នេរខ្សាច់កម្សាន្តសាធារណៈដ៏ល្អប្រណីតមួយនេះ សម្រាប់បម្រើការកម្សាន្តរបស់ភ្ញៀវទេសចរណ៍ជាតិ និងភ្ញៀវទេសចរណ៍អន្តរជាតិមកទស្សនាលម្ហែកម្សាន្តនៅខេត្តកែបនៅថ្ងៃអនាគតខាងមុខ។

ការអភិវឌ្ឍឆ្នេរតេជោសន្តិភាពដ៍ល្អប្រណីតកម្រិតខ្ពស់នៅខេត្តកែបចំណាយរយៈពេល ២ ឆ្នាំ មកនេះតបតាមគំរូប្លង់ ការអភិវឌ្ឍឆ្នេរកម្សាន្តខេត្តកែប ត្រូវបានចាត់ទុកជាគម្រោងអភិវឌ្ឍ (ឆ្នេរ២៧០០ម៉ែត្រ) ដ៏ល្អប្រណីតដំបូងគេក្នុងប្រទេស​កម្ពុជា៕

អត្ថបទ៖ សឹង រ៉ាត់