យុទ្ធនាការអាមេរិក កម្ចាត់ក្រុមគ្រឿងញៀន ធ្លាយដល់មហាសមុទ្រប៉ាស៊ីហ្វិក សម្លាប់មនុស្ស១៤នាក់ទៀត

យុទ្ធនាការរបស់អាមេរិក កម្ចាត់ក្រុមជួញដូរគ្រឿងញៀនកាន់តែពង្រីកធំទៅៗ ដោយរាលដាលមកដល់មហាសមុទ្រប៉ាស៊ីហ្វិក ខណៈកាលពីថ្ងៃអង្គារទី២៨ខែតុលាឆ្នាំ២០២៥ រដ្ឋមន្ត្រីក្រសួងការពារជាតិអាមេរិក Pete Hegseth អះអាងពីការសម្លាប់មនុស្សចំនួន១៤នាក់ ក្នុងការវាយប្រហារទូកចំនួន៤គ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Hegseth បញ្ជាក់ថា ការវាយប្រហារនេះគឺជាបញ្ជារបស់លោកប្រធានាធិបតីដូណាល់ ត្រាំ ដើម្បីកម្ចាត់ក្រុមជួញដូរគ្រឿងមិនឲ្យចូលអាមេរិក។ លោកបន្តថា ក្នុងប្រតិបត្តិការនោះ, ការវាយប្រហារលើកដំបូងបានផ្តាច់ជីវិតពួកគ្រឿងញៀន៧នាក់ ខណៈការវាយប្រហារពីរលើកបន្តបន្ទាប់សម្លាប់មនុស្ស៤និង៣នាក់ទៀត។ 

យោងតាមសេចក្តីរាយការណ៍របស់ BBC, ការវាយប្រហារនេះកើតឡើងនៅចម្ងាត ៦៤៣គីឡូម៉ែត្រ ពីទីក្រុងឆ្នេរមហាសមុទ្រប៉ាស៊ីហ្វិក Acapulco ប្រទេសម៉ិកស៊ិក។

សូមជម្រាបថា គិតត្រឹមពេលនេះ​ យុទ្ធនាការអាមេរិក បានសម្លាប់មនុស្ស ៥៧នាក់ហើយ ស្របពេលការវាយប្រហារទាំងនេះ បានរុញភាពតានតឹងឲ្យកាន់តែឡើងកម្តៅខ្លាំងរវាងសហរដ្ឋអាមេរិក និងរដ្ឋាភិបាលនៃប្រទេសកូឡុំប៊ី និងវ៉េណេស៊ុយអេឡា។

ក្នុងនោះ មានការវាយប្រហារចំនួន៤លើក ត្រូវបានធ្វើឡើងនៅក្នុងតំបន់មហាសមុទ្រប៉ាស៊ីហ្វិក ដែលជាច្រកសម្រាប់ការជួញដូរគ្រឿងញៀនដ៏ធំ បំផុត៕

អត្ថបទ​៖ សុខ សុវណ្ណ

ចុចអាន៖ ជាលើកទីមួយអាមេរិក ​បើកការវាយប្រហារកម្ទេច​ទូកសង្ស័យដឹក​គ្រឿងញៀន​មហាសមុទ្រប៉ាស៊ីហ្វិក