គ្រិស្តសាសនិកនៅនីហ្សេរីយ៉ា អង្វរករលោក ត្រាំ ឲ្យធ្វើអន្តរាគមន៍យោធាលឿនបំផុត

ដោយកំពុងរស់នៅទាំងភាពភ័យខ្លាច គ្រិស្តសាសនិកក្នុងប្រទេសនីហ្សេរីយ៉ា បានអង្វរករដល់ប្រធានាធិបតីអាមេរិក​ ដូណាល់ ត្រាំ សុំឲ្យចូលធ្វើអន្តរាគមន៍ឲ្យបានឆាប់បំផុត ព្រោះជីវិតរបស់ពួកគេកំពុងរងការធ្វើទុកបុកម្នេញពីសំណាក់ក្រុមភេរវករ។ នេះបើតាមការផ្សាយរបស់ Daily Mail កាលពីថ្ងៃអាទិត្យទី៩ខែវិច្ឆិកាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជម្លោះសាសនានៅនីហ្សេរីយ៉ា ឈានដល់ការវាយប្រហារបង្ហូរឈាមលើគ្រិស្តសាសនិក ធ្វើឲ្យមនុស្សជាច្រើនត្រូវរត់រករួចជីវិតឯខ្លះទៀត សំងំលាក់ខ្លួនមិនហ៊ានចេញទៅណាទាល់តែសោះ។

ក្រុមនានាដូចជា Boko Haram និង Islamic State West Africa Province (ISWAP) តែងតែវា​យប្រហារសហគមន៍គ្រិស្តសាសនិកនៅភាគឦសាននិងតំបន់ផ្សេងទៀតនៃប្រទេស ដោយពួកគេមានគោលដៅបង្កើតរដ្ឋឥស្លាមនិយមជ្រុល។ ទន្ទឹមនោះ ការចាប់ជំរិតដោយក្រុមប្រដាប់អាវុធ ក៏បានកើនឡើងយ៉ាងគំហុកនៅទូទាំងប្រទេសនេះផងដែរ។

ដោយមើលឃើញស្ថានការណ៍វិវត្តកាន់តែធ្ងន់ធ្ងរទៅៗ ប្រធានាធិបតីអាមេរិក ដូណាល់ ត្រាំ ក៏គំរាមធ្វើសកម្មភាពយោធា វាយប្រហារប្រទេសនីហ្សេរីយ៉ា ដោយចោទថា រដ្ឋាភិបាលទីក្រុងអាប៊ូហ្សា មិនអើពើនឹងការសម្លាប់គ្រិស្តសាសនិក ពីសំណាក់ក្រុមភេរវករឥស្លាម។

លោកព្រមានថា ប្រសិនបើរដ្ឋាភិបាលនីហ្សេរីយ៉ា បន្តបើកដៃឲ្យមានការសម្លាប់គ្រិស្តសាសនិកទៀតនោះ សហរដ្ឋអាមេរិក នឹងបញ្ឈប់ជាបន្ទាន់នូវជំនួយនិងការឧបត្ថម្ភទាំងអស់ដល់នីហ្សេរីយ៉ា ហើយប្រហែលជានឹងចូលធ្វើអន្តរាគមន៍យោធានៅក្នុងប្រទេសនេះ ទៀតផង។ 

ដំណឹងនៃការលូកដៃរបស់លោកត្រាំនេះ ហាក់ផ្តល់ក្តីសង្ឃឹមដល់គ្រិស្តសាសនិកនៅនីហ្សេរីយ៉ា ដោយមេដឹកនាំសហគមន៍គ្រិស្ត Bamshak Daniel ប្រាប់សារព័ត៌មាន Wall Street Journal ថា «យើងចា​ត់ទុកប្រធានាធិបតីត្រាំ គឺជាព្រះទី២របស់យើង។ យើងអធិស្ឋានឲ្យមានអន្តរាគមន៍អព្ភូតហេតុ ដើម្បីសង្គ្រោះជីវិតប្រជាជនរបស់យើង។ លោកប្រធានាធិបតី ត្រាំ ត្រូវតែប្រញាប់ និងធ្វើអន្តរាគមន៍យោធា»។ 

យោងតាមប្រភពពីអង្គការក្រៅរដ្ឋាភិបាល Intersociety, បើគិតចាប់ពីឆ្នាំ២០០៩ដល់ខែសីហាឆ្នាំ២០២៥ គ្រិស្តសាសនិក ១២៥ ០០៩នាក់ ត្រូវបានសម្លាប់នៅនីហ្សេរីយ៉ា៕

អត្ថបទ៖ សុខ សុវណ្ណ

ចុចអាន៖ ត្រាំ គំរាមវាយប្រហារនីហ្សេរីយ៉ា បើនៅតែបើកដៃឲ្យក្រុមឥស្លាម សម្លាប់គ្រិស្តសាសនិក