ត្រាំ គំរាមវាយប្រហារនីហ្សេរីយ៉ា បើនៅតែបើកដៃឲ្យក្រុមឥស្លាម សម្លាប់គ្រិស្តសាសនិក

ប្រធានាធិបតីអាមេរិក ដូណាល់ ត្រាំ បានគំរាមធ្វើសកម្មភាពយោធា វាយប្រហារប្រទេសនីហ្សេរីយ៉ា ដោយចោទថា រដ្ឋាភិបាលទីក្រុងអាប៊ូហ្សា មិនអើពើនឹងការសម្លាប់គ្រិស្តសាសនិក ពីសំណាក់ក្រុមភេរវករឥស្លាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Al Jazeera, ប្រធានាធិបតីអាមេរិក បានគំរាមបែបនេះនៅក្នុងការបង្ហោះលើបណ្តាញសង្គម Truth Social កាលពីថ្ងៃសៅរ៍ទី១ខែវិច្ឆិកាឆ្នាំ២០២៥ ដោយសរសេរថា ប្រសិនបើរដ្ឋាភិបាលនីហ្សេរីយ៉ា បន្តបើកដៃឲ្យមានការសម្លាប់គ្រិស្តសាសនិកទៀតនោះ សហរដ្ឋអាមេរិក នឹងបញ្ឈប់ជាបន្ទាន់នូវជំនួយនិងការឧបត្ថម្ភទាំងអស់ដល់នីហ្សេរីយ៉ា ហើយប្រហែលជានឹងចូលធ្វើអន្តរាគមន៍យោធានៅក្នុងប្រទេសនេះ ទៀតផង។ 

ស្របពេលជាមួយគ្នានោះ លោកត្រាំ បញ្ជាក់ថា «ខ្ញុំបានបញ្ជាឲ្យក្រសួងសង្គ្រាម ត្រៀមលក្ខណៈសម្រាប់ចាត់វិធានការ។ ប្រសិនបើយើងវាយប្រហារ វានឹងលឿន រហ័ស និងឃោរឃៅ ដូចជាពួកក្មេងទំនើងភេរវករវាយប្រហារលើគ្រិស្តសាសនិកជាទីស្រឡាញ់របស់យើងដែរ!»។

ប៉ុន្មានខែមុន សមាជិកសភាស្តាំនិយមនិងបុគ្គលលេចធ្លោជាច្រើននាក់នៅអាមេរិក បានចេញមុខអះអាងជាបន្តបន្ទាប់ថា ជម្លោះហិង្សាក្នុងប្រទេសនីហ្សេរីយ៉ា គឺជាយុទ្ធនាការ «ប្រល័យពូជសាសន៍គ្រិស្តសាសនិក»។

ក្រុមនានាដូចជា Boko Haram និង Islamic State West Africa Province (ISWAP) តែងតែវា​យប្រហារសហគមន៍គ្រិស្តសាសនិកនៅភាគឦសាននិងតំបន់ផ្សេងទៀតនៃប្រទេស។ ពួកគេមានគោលដៅបង្កើតរដ្ឋឥស្លាមនិយមជ្រុល ហើយបានសម្លាប់មនុស្សរាប់ពាន់នាក់ និងបំផ្លាញព្រះវិហារជាច្រើន។

ទន្ទឹមនោះ ការចាប់ជំរិតដោយក្រុមប្រដាប់អាវុធ បានកើនឡើងយ៉ាងគំហុកនៅទូទាំងប្រទេសនីហ្សេរីយ៉ា។ ក្រុមនេះចាប់ចំណាប់ខ្មាំងដើម្បីទារលុយលោះ ដោយរួមទាំងអាចារ្យនិងអ្នកកាន់សាសនាគ្រិស្តផងដែរ។

យោងតាមប្រភពពីអង្គការក្រៅរដ្ឋាភិបាល Intersociety, បើគិតចាប់ពីឆ្នាំ២០០៩ដល់ខែសីហាឆ្នាំ២០២៥ គ្រិស្តសាសនិក ១២៥ ០០៩នាក់ ត្រូវបានសម្លាប់នៅនីហ្សេរីយ៉ា៕

អត្ថបទ៖ សុខ សុវណ្ណ

ចុចអាន៖ ត្រាំ​បដិសេធ​បញ្ជាក់​ថាតើ​អាមេរិក​នឹង​ធ្វើ​តេស្ត​នុយក្លេអ៊ែរ​ក្រោម​ដី​ឬ​ក៏​យ៉ាង​ណា