ភ្ញៀវទេសចរម៉ាឡេស៊ីលុបចោលដំណើរកម្សាន្តទៅភាគខាងត្បូងថៃ ដោយសារទឹកជំនន់ធ្ងន់ធ្ងរ

​អាជ្ញាធរទេសចរណ៍ថៃ (TAT) បាន​និយាយថា ការធ្វើដំណើរ​កម្សាន្តរបស់ពលរដ្ឋម៉ាឡេស៊ី​ទៅកាន់ភាគខាងត្បូង​នៃប្រទេសថៃ រំំពឹងថានឹង​ត្រូវលុបចោលទាំងស្រុងនៅសប្តាហ៍នេះ ដោយសារតែទឹកជំនន់ធ្ងន់ធ្ងរ ជាពិសេសនៅក្រុងហាតយ៉ៃ នៃខេត្តសុងក្លា។ នេះបើតាមការចុះផ្សាយរបស់កាសែតបាងកកប៉ុស្តិ៍។

​ប្រធាន TAT លោកស្រី Thapanee Kiatphaibool ​បានថ្លែងថា ក្តីបារម្ភអំពីទឹកជំនន់​អូសបន្លាយរយៈពេលយូរ ដែលបង្ក​ឱ្យ​​ភ្ញៀវទេសចរម៉ាឡេស៊ីជាង ៤ ០០០ នាក់ជាប់គាំងនៅក្នុងសណ្ឋាគារ និងនៅអាកាសយានដ្ឋាន Hat Yai ទំនង​នឹង​បណ្តាលឱ្យមានការលុបចោលការធ្វើដំណើរទាំងស្រុងពីទីផ្សារម៉ាឡេស៊ីនៅសប្តាហ៍នេះ។

គួរគូសបញ្ជាក់ថា តំបន់់ភាគត្បូងនៃប្រទេសថៃកំពុងរងគ្រោះដោយសារទឹកជំនន់ធ្ងន់ធ្ងរ ដោយសារតែភ្លៀងធ្លាក់ខ្លាំងមិនដាច់រាប់តាំងពីសប្ដាហ៍មុនមក។ ទីក្រុងហាត់យ៉ៃ រងគ្រោះខ្លាំងដោយទទួលកម្រិតទឹកភ្លៀងខ្ពស់បំផុតមិនធ្លាប់មាន​ក្នុងរយៈពេល ៣០០ ឆ្នាំ។

លោកស្រី Thapanee បាននិយាយថា ប្រព័ន្ធផ្សព្វផ្សាយម៉ាឡេស៊ីនៅតែបន្តរាយការណ៍អំពីស្ថានភាពទឹកជំនន់​ដែលប៉ះពាល់ដល់ភ្ញៀវទេសចរ ​ដោយ​ជំរុញឱ្យមានការព្រួយបារម្ភយ៉ាង​ខ្លាំងក្នុងចំណោម​ភ្ញៀវដែលមាន​គម្រោងទៅភាគខាងត្បូងថៃនៅសប្ដាហ៍នេះ។ ​

ក្រៅពីនេះ រដ្ឋាភិបាលម៉ាឡេស៊ីឯណោះវិញ ក៏បានចេញសេចក្តី​ព្រមានអំពីទឹកជំនន់ផងដែរ ដោយណែនាំប្រជាពលរដ្ឋរបស់ខ្លួនឱ្យជៀសវាងការទៅទស្សនាភាគខាងត្បូង​ថៃ។

លោក Siwat Suwanwong ប្រធានក្រុមប្រឹក្សាទេសចរណ៍ខេត្ត សុងក្លា របស់ថៃ បាននិយាយថា បន្ទាប់ពីទឹកជំនន់ដំបូងបានស្រក ​ក្រុងហាត់យ៉ៃបានរងវាយប្រហារម្តងទៀតដោយទឹកជំនន់ពីស្រុក Sadao ដែលរារាំងផ្លូវហាយវេសំខាន់ៗដូចជាផ្លូវ Sripoovanart និងប៉ះពាល់ដល់សណ្ឋាគារ ទីផ្សារ និងផ្សារទំនើបជាដើម។

លោក Siwat បាននិយាយថា ប្រជាជនរាប់ពាន់នាក់ក្នុងតំបន់ ​និងភ្ញៀវទេសចរម៉ាឡេស៊ី​ ត្រូវជាប់គាំងក្នុងផ្ទះ ឬកន្លែងស្នាក់នៅដោយគ្មានអាហាររយៈពេល ២ ថ្ងៃ រួមទាំងកុមារ និងមនុស្សចាស់ផងដែរ។

ឥឡូវនេះ ប្រតិបត្តិករទេសចរណ៍ថៃកំពុងអំពាវនាវ​វិធានការសង្គ្រោះបន្ទាន់របស់រដ្ឋាភិបាល រួមទាំងការផ្គត់ផ្គង់អាហារ និងទឹក ក៏ដូចជាការដឹកជញ្ជូនបន្ថែមដើម្បីផ្តល់ជំនួយ ឬផ្លាស់ប្តូរទីលំនៅប្រជាជនទៅកាន់តំបន់សុវត្ថិភាព។

ដោយសារតែភាពធ្ងន់ធ្ងរនៃទឹកជំនន់ លោកបាននិយាយថា អាជីវកម្មនៅក្រុងហាត់យ៉ៃ ​ដែលជាមជ្ឈមណ្ឌលទេសចរណ៍ដ៏សំខាន់មួយរបស់​ថៃ ​រំពឹងថានឹងត្រូវបិទយ៉ាងហោចណាស់ ២ សប្តាហ៍ ដែលនឹងប៉ះពាល់ដល់រដូវកាលទេសចរណ៍ដ៏មមាញឹក។ ​ពេលនេះ មិនទាន់មានការប៉ាន់ស្មានពីការខូចខាតសរុបទេ៕