ការ​ហោះហើរ​ប្រចាំថ្ងៃ ​របស់​យន្តហោះ ​Airbus មាន​សុវត្ថិភាព​ ១០០%​

​គិតរហូតមកដល់ពេលនេះ ​​កម្ពុជាមានយន្ហោះ ​Airbus ​ចុះបញ្ជីសរុប​ចំនួន ១៥ គ្រឿង ដែលកំពុង​ប្រើ​ប្រាស់​ក្នុងប្រតិបត្តការហោះហើររបស់ក្រុមហ៊ុនអាកាសចរណ៍។

​លោក ស៊ីន ចាន់សិរីវុត្ថា រដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរណ៍​ស៊ីវិល ​បានឱ្យដឹងថា បន្ទាប់ពីទទួលបានសេក្តីប្រកាសអាសន្ន ​(Emergency Airworthiness Directive–EAD) ​ពីអាជ្ញាធរ​អាកាស​ចរណ៍​សហគមន៍​អឺរ៉ុប (EASA) ស្តីពីកង្វល់ដល់លទ្ធភាព​ហោះហើរ​របស់​យន្តហោះ Airbus មួយចំនួនមក រដ្ឋលេខាធិការដ្ឋានអាកាសចរណ៍ស៊ីវិល (SSCA) បានចាត់ការ​បន្ទាន់​ក្នុងការបញ្ជូន និងផ្សព្វផ្សាយសេចក្ដីជូនដំណឹងនេះទៅកាន់ គ្រប់ក្រុមហ៊ុនអាកាសចរណ៍ ដែល​មានយន្តហោះ Airbus ចុះបញ្ជីនៅកម្ពុជា ដើម្បីអនុវត្តវិធានការទាន់ពេលវេលា។​

​លោក ស៊ីន ចាន់សិរីវុត្ថា បានបញ្ជាក់ថា ក្រុមហ៊ុនអាកាសចរណ៍នីមួយៗ (Operators) បានអនុវត្ត ការវាយតម្លៃ និងអនុវត្តវិធាន​ការបច្ចេក​ទេស ដោយឯករាជ្យលើយន្តហោះរបស់ខ្លួន ទៅតាមភាពលំដាប់លំដោយដូចជា៖

– ការវាយតម្លៃសុវត្ថិភាព (Safety Assessment)

– ការត្រួតពិនិត្យបច្ចេក ទេស ជាក់លាក់ (Technical Inspection)

– ការវាយតម្លៃហានិភ័យ និងផលប៉ះពាល់ (Risk Impact Assessment)

-ការអនុវត្តវិធានការអនុលោមភាព (Compliance Measures) ដោយផ្អែកលើតម្រូវការ EAD របស់ EASA។

​ក្នុងចំណោមយន្តហោះចុះបញ្ជី សរុប ១៥ គ្រឿង មានតែ ៣ គ្រឿងប៉ុណ្ណោះ ដែលត្រូវបានកំណត់ថា ទទួលរងផលប៉ះពាល់បន្ទាប់បន្សំ តាមប្រកាស EAD។

​ក្រុមហ៊ុនប្រតិបត្តិដែលពាក់ព័ន្ធនោះ បានអនុវត្តវិធានការបច្ចេកទេសចប់សព្វគ្រប់ រួចហើយ ដោយ​មានការត្រួតពិនិត្យ និងបញ្ជាក់ពីអ្នកបច្ចេកជំនាញរបស់ SSCA ត្រឹមត្រូវ។

​បើតាម ​លោក ស៊ីន ចាន់សិរីវុត្ថា គ្មានផលប៉ះពាល់ ឬការរំខានណាមួយ លើប្រតិបត្តការ ហោះហើរ​ប្រចាំថ្ងៃ ពាក់ព័ន្ធទៅនឹង​បញ្ហា​សុវត្ថិភាព​ឡើយ។​

​ក្រុមហ៊ុនក្រុមហ៊ុនអាកាសចរណ៍ទាំងអស់ នៅតែបន្តប្រតិបត្តការតាមស្ដង់ដារសុវវត្ថិភាពរបស់ ICAO, EASA និងក្រោមការត្រួតពិនិត្យរបស់ SSCA ដោយសុវត្ថិភាពជាអាទិភាពចម្បង៕