វៀតណាម ថា ពលរដ្ឋ​ខ្លួនមានសុវត្ថិភាពក្រោយការជម្លៀសចេញពីតំបន់ប្រយុទ្ធកម្ពុជា–ថៃ

ក្រសួងការបរទេសវៀតណាម បានចេញ​សេចក្ដី​ថ្លែងការណ៍​​នា​ថ្ងៃព្រហស្បតិ៍​ទី​១១​ខែ​ធ្នូ​ឆ្នាំ​២០២៥​នេះ​ថា ពលរដ្ឋវៀតណាមដែលរស់នៅក្បែរព្រំដែនកម្ពុជា–ថៃ ត្រូវបានជម្លៀសទៅកាន់ទីកន្លែងមានសុវត្ថិភាព ឬលែងស្ថិតនៅក្នុងតំបន់ដែលរងផលប៉ះពាល់​ព្រោះ​ការ​​ប្រយុទ្ធគ្នារវាងប្រទេសទាំងពីរ​ទៀត​ហើយ។

យោង​តាម​ Viet Nam News អ្នកនាំពាក្យក្រសួងការបរទេស លោកស្រី Phạm Thu Hằng បាន​និយាយ​​ថា ស្ថានទូតវៀតណាមប្រចាំនៅទីក្រុងភ្នំពេញ និងបាងកក បានចេញសេចក្តីណែនាំអំពីការធ្វើដំណើរនៅថ្ងៃទី​៩​ខែធ្នូ ដោយជំរុញ​ឲ្យ​ពលរដ្ឋជៀសវាងតំបន់ជម្លោះ និងផ្លាស់ទីទៅកាន់តំបន់ដែលមានសុវត្ថិភាពយ៉ាងឆាប់រហ័ស ស្របតាមការណែនាំរបស់អាជ្ញាធរមូលដ្ឋាន។

លោកស្រី បានបន្ថែម​ថា «ព័ត៌មានចុងក្រោយពីបេសកជន​របស់យើងនៅក្នុងប្រទេសថៃ និងកម្ពុជាបង្ហាញថា ពលរដ្ឋវៀតណាមភាគច្រើននៅក្នុងតំបន់នោះ ត្រូវបានជម្លៀសទៅកាន់ទីតាំងមានសុវត្ថិភាព ឆ្ងាយពីតំបន់ប្រយុទ្ធ»។

អ្នក​នាំ​ពាក្យ​​ក្រសួង​ការបទេស​រូប​នេះ បាន​បន្ត​ថា ក្រសួងបានស្នើដល់ភ្នាក់ងារវៀតណាមពាក់ព័ន្ធ​ឲ្យ​វាយតម្លៃយ៉ាងដិតដល់នូវការវិវត្តនៃស្ថានការណ៍ ខណៈដែល​ខ្លួន​កំពុងរក្សាទំនាក់ទំនងជាមួយអាជ្ញាធរមូលដ្ឋាន និងបណ្តាញសហគមន៍វៀតណាម ដើម្បីត្រៀមរៀបចំវិធានការការពារបន្ថែមទៀត ប្រសិនបើចាំបាច់។

កាល​ពី​ថ្ងៃ​ទី​៨​ធ្នូ ប្រទេសវៀតណាមបានសម្តែងនូវ«ការព្រួយបារម្ភយ៉ាងខ្លាំង» ចំពោះការបន្តអរិភាពរវាងកម្ពុជានិងថៃ ដោយអំពាវនាវ​ឲ្យ​ភាគីទាំងពីរបង្ហាញ «ការអត់ធ្មត់ខ្ពស់បំផុត» ចៀសវាងការប្រើប្រាស់កម្លាំង គោរពការប្តេជ្ញាចិត្តឈប់បាញ់ និងដោះស្រាយជម្លោះដោយសន្តិវិធីក្រោមច្បាប់អន្តរជាតិ៕

ប្រែសម្រួល៖ ឈាង