រដ្ឋបាលខេត្តស្វាយរៀង សម្រេចបន្តបិទក្រុងបាវិតរយៈពេល១៤ ថ្ងៃបន្ថែមទៀត

រដ្ឋបាលខេត្តស្វាយរៀងបានសម្រេចបិទក្រុងបាវិតរយៈពេល១៤ថ្ងៃបន្ថែមទៀតបន្ទាប់ពីបានបិទរយៈពេល១២ថ្ងៃគឺចាប់ពីថ្ងៃទី០៧រហូតដល់ថ្ងៃទី១៨ខែមេសាឆ្នាំ២០២១រួចមក។

តាមរយៈសេចក្តីសម្រេចរបស់រដ្ឋបាលខេត្តស្វាយរៀងចុះថ្ងៃទី១៨មេសានេះបានឲ្យដឹងថារដ្ឋបាលខេត្តសម្រេចដាក់វិធានការរដ្ឋបាលជាបណ្ដោះអាសន្ននៅក្រុងបាវិតខេត្តស្វាយរៀងពេល១៤ថ្ងៃជាបន្តទៀតគឺចាប់ពីម៉ោងសូន្យថ្ងៃទី១៩ខែមេសារហូតដល់ថ្ងៃទ០២ខែឧសភាឆ្នាំ២០២១ដោយរឹតត្បិតចេញពីលំនៅឋានឬទីសំណាក់បច្ចុប្បន្នលែងលែងតែការធ្វើដំណើរទៅបំពេញការងារឬប្រកបមុខរបរឬអាជីវកម្មដែលមិនមានការរឹតត្បិតឬហាមឃាត់និងដោយមានការភ្ជាប់លិខិតបញ្ជាក់អំពីការងារមុខរបរឬអាជីវកម្ម។

ការធ្វើដំណើរទៅស្វែងរកគ្រឿងឧបភោគបរិភោគនិងសម្ភារៈប្រើប្រាស់ចាំបាច់ប្រចាំថ្ងៃ។ទៅមន្ទីរពេទ្យមណ្ឌលសុខភាពសម្ភពទីកន្លែងព្យាបាលឱសថស្ថានដោយមូលហេតុសុខភាពបន្ទាន់។បុគ្គលិកក្រុមគ្រូពេទ្យទាំងរដ្ឋនិងឯកជនមន្ត្រីរាជ​ការក្រុមពន្លត់អគ្គីភ័យកងកម្លាំងប្រដាប់អាវុធគ្រប់ប្រភេទដើម្បីបំពេញបេសកកម្មជូនស្ថាប័នអង្គភាពរថយន្តកុងតឺន័ររថយន្តដឹកទំនិញរថយន្តបាញ់បេតុងរថយន្តសម្រាប់បម្រើឲ្យការដឹកជញ្ជូនទំនិញផ្គត់ផ្គង់ការដ្ឋានសំណង់រថយន្តដឹកជញ្ជូនសំរាមសំណល់រឹងសំណល់វេជ្ជសាស្ត្រនិងការដឹកជញ្ជូនម្ហូបអាហាររបស់បុគ្គលិកបម្រើសេវាដឹកជញ្ជូនបុគ្គលិកនិយោជកនិងកម្មករកម្មការិនីទៅបំពេញការងារនៅក្នុងក្រុមហ៊ុនសហគ្រាសគ្រឹះស្ថានរោងចក្រឬទីតាំងអាជីវកម្មដែលអនុញ្ញាតឱ្យបើកដំណើរការជាធម្មតានិងការធ្វើដំណើរចាំបាច់ខ្ញុំផ្សេងដែលមានការអនុញ្ញាតពីអាជ្ញាធរមានសមត្ថកិច្ច។

ក្រៅពីនេះផ្អាករាល់ការធ្វើដំណើរចេញចូលក្នុងក្រុមហ៊ុនកំសាន្តអន្តរជាតិបាវិតម៊ុកបាយ ក្រុមហ៊ុនកាស៊ីណូពិភពថ្មី ក្រុមហ៊ុនកាស៊ីណូហ្គូដឡាក់និងក្រុមហ៊ុនអ៊ីម ភើរើដែលមានទីតាំងស្ថិតនៅក្នុងភូមិបាវិតកណ្ដាលសង្កាត់បាវិតក្រុងបាវិតលើកលែងតែការធ្វើដំណើរដើម្បីបំពេញមុខងារក្នុងការផ្ដល់សេវាសង្គ្រោះបន្ទាន់សេវាសាធារណៈចាំបាច់និងបន្ទាន់ឬសេវាដឹកជញ្ជូនទំនិញស្បៀង គ្រឿងឧបភោគបរិភោគនិងការចាំបាច់ផ្សេងទៀតដោយមានការអនុញ្ញាតពីអាជ្ញាធរមានសមត្ថកិច្ច៕

អត្ថបទ៖ សំអឿន