រដ្ឋបាលខេត្តស្វាយរៀង ជួបពិភាក្សាការងារជាមួយគណៈកម្មការទី១០ នៃព្រឹទ្ធសភា

ស្វាយរៀង ៖ នៅរសៀលថ្ងៃទី០៣ ខែកុម្ភៈ ឆ្នាំ២០២៦ លោក ប៉េង ពោធិ៍សា អភិបាលខេត្តស្វាយរៀង រួមជាមួយ លោក ប៊ុន សាវ៉ាន់ សមាជិកក្រុមប្រឹក្សាខេត្ត (តំណាងលោក ម៉ែន វិបុល ប្រធានក្រុមប្រឹក្សាខេត្ត) បានអញ្ជើញដឹកនាំកិច្ចប្រជុំពិភាក្សាការងារជាមួយគណៈប្រតិភូគណៈកម្មការអង្កេត បោសសម្អាត និងប្រឆាំងអំពើពុករលួយនៃព្រឹទ្ធសភា (គណៈកម្មការទី១០) ដឹកនាំដោយ លោក ម៉ម ប៊ុននាង ប្រធានគណៈប្រតិភូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចជំនួបនេះធ្វើឡើងក្នុងគោលបំណងសំខាន់ៗ រួមមាន៖

១.សិក្សាឈ្វេងយល់៖ ពិនិត្យលើប្រសិទ្ធភាព និងវឌ្ឍនភាពនៃការអនុវត្តច្បាប់ស្តីពី “ការប្រឆាំងអំពើពុករលួយ” នៅក្នុងមូលដ្ឋានខេត្តស្វាយរៀង។

២.ដោះស្រាយបញ្ហាប្រឈម៖ បើកវេទិកាពិភាក្សាដើម្បីលើកឡើងនូវបញ្ហាប្រឈមនានាដែលបានជួបប្រទះក្នុងពេលអនុវត្តការងារកន្លងមក។

៣.ពង្រឹងអភិបាលកិច្ច៖ ជំរុញការងាររដ្ឋបាលឱ្យកាន់តែមានតម្លាភាព គណនេយ្យភាព និងស័ក្តិសិទ្ធភាព ស្របតាមគោលនយោបាយរបស់រាជរដ្ឋាភិបាល។

ក្នុងឱកាសនោះ ថ្នាក់ដឹកនាំបានធ្វើការផ្លាស់ប្តូរមតិយោបល់យ៉ាងផុសផុល ដើម្បីស្វែងរកដំណោះស្រាយ និងពង្រឹងកិច្ចសហប្រតិបត្តិការរវាងស្ថាប័ននីតិប្បញ្ញត្តិ និងស្ថាប័ននីតិប្រតិបត្តិថ្នាក់ក្រោមជាតិ ឱ្យកាន់តែរឹងមាំបន្ថែមទៀត ក្នុងគោលដៅបម្រើសេវាសាធារណៈជូនប្រជាពលរដ្ឋឱ្យបានកាន់តែល្អប្រសើរ៕

ដោយ ៖ ភក្ដី