​សាលាតិចណូ​ ចាប់ដៃជាមួយកសិករ ​សិក្សាស្រាវជ្រាវផលិតថាមពលអគ្គិសនី​ពីសំបកគ្រាប់ស្វាយចន្ទី​

អ្នកជំនាញនៅ វិទ្យាស្ថានបច្ចេកវិទ្យាកម្ពុជា (ITC) ដែលជាស្ថាប័នស្រាវជ្រាវវិទ្យាសាស្ត្រឈានមុខគេ​បានស្នើសុំសហការជាមួយ​សមាគមស្វាយចន្ទីកម្ពុជា ​ផ្តោតលើការផលិត ថាមពលអគ្គិសនី​ចេញពី​សំបក​គ្រាប់ស្វាយចន្ទី និង​ផលិតផលបន្ទាប់​បន្សំពីស្វាយចន្ទីមួយចំនួនទៀត។

​អ្នកស្រាវជ្រាវរបស់វិទ្យាស្ថានបច្ចេកវិទ្យាកម្ពុជា កំពុងវាយតម្លៃ និងប្រៀបធៀបអត្ថប្រយោជន៍​រវាង​ការចម្រាញ់យកប្រេងចេញពីសំបកស្វាយចន្ទី និងការប្រើប្រាស់សំបកទាំងនោះ​ផ្ទាល់សម្រាប់​ការ​ផលិតថាមពល។​ ​​

លោក អួន ស៊ីឡុត ប្រធានសមាគមស្វាយចន្ទីកម្ពុជា មានប្រសាសន៍ថា គម្រោងនេះមានគោលបំណងកំណត់ការប្រើប្រាស់កាកសំណល់សំបកស្វាយចន្ទីឱ្យមានប្រសិទ្ធភាព និងនិរន្តរភាពបំផុត ហើយគ្រោងនឹងចាប់ផ្តើមនៅពាក់កណ្តាលឆ្នាំ ២០២៦ ក្នុងខេត្តកំពង់ធំ ក្រោមការដឹក​នាំរបស់លោកបណ្ឌិត អោ ច័ន្ទម៉ូលី។

​រីឯគម្រោងទី២ គឺគម្រោងផលិតទឹកខ្មេះឈើពីមែកស្វាយចន្ទីដែលកាត់ចោលក្នុងរដូវតែងមែក។ គម្រោងនេះ ​ផ្តោតលើការ​សិក្សាអំពី ទឹកខ្មេះឈើ ​ដែលផលិតចេញពីមែក​ស្វាយចន្ទី​ដែលបានកាត់​លះចោលក្នុងរដូវតែងមែក ក្នុងអំឡុងពេលថែទាំ​ចម្ការ​ជាប្រចាំ។​

ទឹកខ្មេះឈើមានសក្តានុពលក្នុងការកាត់បន្ថយ​ថ្លៃដើមផលិតកម្មសរុបសម្រាប់កសិករយ៉ាងច្រើន។ គម្រោងនេះគ្រោងនឹងចាប់ផ្តើម​នៅពាក់​កណ្តាលឆ្នាំ ២០២៦ ក្នុងខេត្ត ត្បូងឃ្មុំ ក្រចេះ និងកំពង់ធំ។

​ចំណែកឯគម្រោងទី៣ ការកែច្នៃផ្លែស្វាយចន្ទីទៅជាជីទឹក និងចំណីសត្វ​ ដែលនឹងជួយដោះស្រាយបញ្ហា​ការប្រើប្រាស់ផ្លែស្វាយចន្ទីមិនទាន់អស់សក្តានុពល ដែលជាធម្មតាត្រូវបានបោះចោល ទោះបីជាមានបរិមាណច្រើនក៏ដោយ។

ទឹកផ្លែស្វាយចន្ទីអាចកែច្នៃទៅជាស្ករ ទឹកខ្មេះ ឬស្រា ការស្រាវជ្រាវនេះនឹងស្វែងយល់អំពីការបំប្លែងវាទៅជា ជីទឹកសរីរាង្គ​សម្រាប់បាញ់តាមស្លឹក ដែលស័ក្តិសមសម្រាប់ដំណាំបន្លែគ្រប់ប្រភេទ។

គម្រោងនេះគ្រោងនឹងចាប់ផ្តើម​នៅពាក់កណ្តាលឆ្នាំ ២០២៦ ក្នុងខេត្តកំពង់ធំ ក្រោមការដឹកនាំរបស់លោកបណ្ឌិត អេឡែន ម៉ម។

យោងតាមសមាគមស្វាយចន្ទីកម្ពុជា នៅក្នុងឆ្នាំ ២០២៥ កម្ពុជារកប្រាក់ចំណូលបាន ​១,៥ ​ពាន់លានដុល្លារ ​ពីការនាំចេញគ្រាប់ស្វាយចន្ទីឆៅប្រមាណ ១ លានតោន​កើនឡើង ២៧% ធៀបនឹងឆ្នាំ ២០២៤​៕

អត្ថបទ៖ ឡេង ដេត