គ្រោះ​ធម្មជាតិនៅថៃ បង្កហានិភ័យកាន់តែខ្លាំងសម្រាប់ធនាគារប្រទេសនេះ

ប្រធានសមាគមធនាគារថៃ (TBA) បាន​ព្រមានថា គ្រោះមហន្តរាយធម្មជាតិកំពុងកើនឡើងកាន់តែច្រើន ​ដែល​បង្កបញ្ហាប្រឈមកាន់តែខ្លាំងឡើងដល់ប្រតិបត្តិការធនាគារ និងទាមទារឱ្យធនាគារបញ្ចូល​បញ្ហានេះ​ទៅក្នុងវិធីសាស្រ្តគ្រប់គ្រងហានិភ័យរបស់ពួកគេ។ នេះបើតាមការចុះផ្សាយរបស់កាសែតបាងកកប៉ុស្តិ៍នៅថ្ងៃចន្ទនេះ។

លោក Payong Srivanich ប្រធាន TBA បាន​ថ្លែងថា គ្រោះមហន្តរាយធម្មជាតិគឺជាហានិភ័យកាន់តែខ្លាំងឡើងសម្រាប់ស្ថាប័នហិរញ្ញវត្ថុ ដែលទាមទារឱ្យពួកគេអនុម័តស្តង់ដារកាន់តែតឹងរ៉ឹងសម្រាប់ការវាយតម្លៃ និងការគ្រប់គ្រងហានិភ័យ ខណៈ​សម្ពាធបរិស្ថានកើនឡើង​កាន់តែខ្លាំង​។

ដើម្បីឆ្លើយតបទៅនឹងបញ្ហាប្រឈមទាំងនេះ ធនាគារកណ្តាលថៃបានណែនាំធនាគារពាណិជ្ជកម្មឱ្យធ្វើ «តេស្ត​ហានិភ័យ»​ទាក់ទងនឹងអាកាសធាតុ ដើម្បីធានាថាពួកគេមានភាពធន់នឹងព្រឹត្តិការណ៍អាកាសធាតុ​ប្រែប្រួលខ្លាំង និងហានិភ័យបរិស្ថានផ្សេងទៀត។

ធនាគារថៃនានាបានធ្វើ «តេស្ត​ហានិភ័យ» បែបនេះ តាំងពីឆ្នាំ ២០២៤ មក​ ស្របតាមតម្រូវការរបស់ធនាគារកណ្តាល ក៏ដូចជាកំណើន​ហានិភ័យ​ទាំងក្នុងស្រុក និងទូទាំងពិភពលោក។

តួយ៉ាង ទឹកជំនន់ថ្មីៗនេះនៅ​ភាគខាងត្បូងនៃប្រទេសថៃបានរំខានដល់ប្រតិបត្តិការ ជាពិសេសប្រតិបត្តិការធនាគារនៅតាមសាខាជាក់ស្តែង​ក្នុងតំបន់ដែលរងផលប៉ះពាល់។ ប៉ុន្តែ លោក Payong បាន​និយាយយ៉ាងដូច្នេះថា៖ «ជាធម្មតាធនាគារចូលរួមក្នុងការជួយជនរងគ្រោះដែលរងផលប៉ះពាល់ដោយគ្រោះមហន្តរាយធម្មជាតិ ដោយផ្តល់ការគាំទ្រទាំងផ្នែកហិរញ្ញវត្ថុ និងមិនមែនហិរញ្ញវត្ថុ»។ ការផ្ដល់ជំនួយដូចគ្នាក៏ធ្វើតាមរយៈធនាគារ អំឡុងគ្រោះរញ្ជួយដីនៅក្រុងបាងកកកាលពីខែមីនា ឆ្នាំ ២០២៤ ផងដែរ។

​លោក Payong ​បន្តថា នៅពេល​ហានិភ័យអាកាសធាតុកាន់តែកើនឡើង អ្នកពាក់ព័ន្ធទាំងអស់ត្រូវពិចារណា ថាតើធនធានសេដ្ឋកិច្ច និងយន្តការសុវត្ថិភាពដែលមានស្រាប់ ដូចជាគម្រោងធានារ៉ាប់រងជាសកល និងកម្មវិធីសុខុមាលភាពដែលផ្តល់មូលនិធិដោយអ្នកជាប់ពន្ធនោះ គឺគ្រប់គ្រាន់ដើម្បីការពារក្រុមងាយរងគ្រោះដែរឬយ៉ាងណា៕