កសិដ្ឋាន មូមូ ហ្វាមនឹងផលិតទឹកដោះគោស្រស់ឱ្យបាន ៣ពាន់លីត្រក្នុង១ថ្ងៃ នៅឆ្នាំ២០២៦នេះ

ចូលដើមឆ្នាំ ២០២៦នេះ កសិដ្ឋាន មូមូ ហ្វាម ផលិតទឹកដោះគោស្រស់បាន ៣ពាន់លីត្រក្នុង១ថ្ងៃ ខណៈកសិដ្ឋានមានគោសរុបជាង ៥០០ក្បាល។

លោក យន់ សុផាត ម្ចាស់កសិដ្ឋាន មូមូ ហ្វាម ប្រាប់ កម្ពុជាថ្មី ថា សម្រាប់ដើមឆ្នាំ ២០២៦នេះ កសិដ្ឋានរបស់លោកអាចបង្កើនការផលិតទឹកដោះគោស្រស់បានរហូត ៣ពាន់លីត្រ ក្នុងថ្ងៃ ខណៈកសិដ្ឋានក៏បានដាក់បន្ថែមប្រភេទពូជគោយកទឹកដោះថ្មីៗជាបន្តបន្ទាប់។

លោក បានឱ្យដឹងទៀតថា ទាក់ទងនឹងគោយកទឹកដោះនេះ កសិដ្ឋាន មូមូ ហ្វាម បច្ចុប្បន្នមានគោសរុបជាង៥០០ក្បាល និងមានគោដែលអាចយកទឹកដោះបានប្រហែល ២៥០ក្បាល។

ម្ចាស់កសិដ្ឋានរូបនេះក៏បានបញ្ជាក់ដែរថា ចំពោះតម្រូវការទឹកដោះគោស្រស់​នៅកម្ពុជា ភាគច្រើន ៩០% មានតម្រូវការទឹកដោះគោស្រស់យកទៅតាមបណ្ដាហាងកាហ្វេ ចំណែក១០%ទៀត គឺសម្រាប់ផ្គត់ផ្គង់ទៅកាន់អតិថិជនដែលនិយមទទួលទានទឹកដោះគោស្រស់។

លោក​ យន់ សុផាត សង្កត់ធ្ងន់ថា ក្នុងចំណោមតម្រូវការទឹកដោះស្រស់នេះដែរ និយាយជារួម ប្រជាជនខ្មែរមានត្រឹមតែរាជធានីភ្នំពេញ និងបណ្ដាខេត្តមួយចំនួនដូចជា៖ ព្រះសីហនុ កំពត និងខេត្តជាប់ព្រំដែន ពិសេសខេត្តដែលសម្បូរសណ្ឋាគារ និងភោគជនីយដ្ឋានតែប៉ុណ្ណោះដែលមានតម្រូវការទឹកដោះគោស្រស់សម្រាប់ការបរិភោគ ជារៀងរាល់ថ្ងៃ។

យ៉ាងណាមិញ ស្របពេលប្រជាជនខ្មែរបន្តពហិការផលិតថៃ លោក យន់ សុផាត មើលឃើញថា តម្រូវការនៃទឹកដោះគោស្រស់ក្នុងស្រុកកាន់តែសន្ទុះខ្លាំងឡើងៗ ហើយកសិដ្ឋាន មូមូ ហ្វាម របស់លោកក៏នឹងព្យាយាមដាក់គោបន្ថែមទៀត ដើម្បីធ្វើយ៉ាងណាអាចឱ្យកម្ពុជាកាន់តែសម្បូរទឹកដោះគោស្រស់ដែលមានគុណភាព ដូចទៅនឹងបណ្ដាប្រទេសនៅលើសកលលោក ផងដែរ។

គួរឱ្យដឹងថា តាមរបាយការណ៍គិតត្រឹមខែមីនា ឆ្នាំ ២០២៤ ប្រទេសកម្ពុជាមានកសិដ្ឋានចិញ្ចឹមគោយកទឹកដោះចំនួន៤ និងមានគោយកទឹកដោះចំនួន ១.១៧៦ ក្បាល ដែលអាចផលិតទឹកដោះគោស្រស់ ជាង ១៣ ពាន់លីត្រក្នុងមួយថ្ងៃ ​ស្មើនឹងជាង ៥ លានលីត្រក្នុង១ ឆ្នាំ ឬ ១៧ ភាគរយ នៃតម្រូវការទឹកដោះគោ​ស្រស់ក្នុងស្រុកជាង ៣០ លានលីត្រ៕

អត្ថបទ ៖ សួស សិត