លោកត្រាំ៖ «ក្រុមប្រឹក្សាសន្តិភាព» អាចនឹងជំនួសអង្គការសហប្រជាជាតិ

ប្រធានាធិបតី​អាមេរិក លោក ដូណាល់ ត្រាំ បានមានប្រសាសន៍ថា «ក្រុមប្រឹក្សាសន្តិភាព (Board of Peace)» ដែលលោកបានស្នើឡើង អាចនឹងមានលទ្ធភាពជំនួសអង្គការសហប្រជាជាតិ (UN) ដោយលោកបានរិះគន់ស្ថាប័នពិភពលោកមួយនេះថា បានបរាជ័យក្នុងការដោះស្រាយជម្លោះនានា។

យោង​តាម​ Washington Times នៅពេលត្រូវបាន​អ្នក​កាសែត​សួរថាតើលោកមានចក្ខុវិស័យចង់​ឲ្យ​ស្ថាប័នថ្មីនេះជំនួសអង្គការសហប្រជាជាតិដែរឬទេ លោកត្រាំ​បានឆ្លើយកាលពីថ្ងៃ​អង្គារ​ទី​២០​មករា​​ថា «វាអាចទៅរួច» ដោយបន្ថែមថា ទោះបីជាលោកធ្លាប់គាំទ្រសក្ដានុពលរបស់អង្គការនេះក៏ដោយ ប៉ុន្តែវា«មិនដែលសម្រេចបានដូចអ្វីដែលគេរំពឹងទុកនោះឡើយ»។

លោកត្រាំ បានបញ្ជាក់ថា ដំបូងឡើយក្រុមប្រឹក្សានេះត្រូវបានបង្កើតឡើងដើម្បីអនុវត្តផែនការសន្តិភាព២០ចំណុចរបស់លោកសម្រាប់តំបន់ហ្គាហ្សា ប៉ុន្តែចាប់តាំងពីពេលនោះមក វិសាលភាពរបស់វាត្រូវបានពង្រីកកាន់តែធំ។ យោងតាមសេចក្តីព្រាងធម្មនុញ្ញ បណ្តាប្រទេសដែលស្វែងរកសមាជិកភាពអចិន្ត្រៃយ៍ ត្រូវបានស្នើ​ឲ្យ​ចូលរួមចំណែកជាថវិការហូតដល់​១​ពាន់លានដុល្លារ។

ឯកសារដដែលនេះ បានពិពណ៌នាថា ក្រុមប្រឹក្សាសន្តិភាព គឺជាស្ថាប័នអន្តរជាតិមួយដែលមានគោលបំណងស្តារស្ថិរភាព អភិបាលកិច្ច និងសន្តិភាពយូរអង្វែងនៅក្នុងតំបន់ដែលងាយរងគ្រោះដោយជម្លោះ។ ប្រទេសជាសមាជិកនឹងមានអាណត្តិរយៈពេល​៣​ឆ្នាំ ប៉ុន្តែសម្រាប់ប្រទេសដែលចូលរួមចំណែកហិរញ្ញវត្ថុធំៗ នឹងត្រូវបានលើកលែងពីការកំណត់អាណត្តិនេះ។

ប្រទេសមួយចំនួន រួមមានអារ៉ាប់រួម (UAE) ម៉ារ៉ុក វៀតណាម និងហុងគ្រី បានយល់ព្រមចូលរួម ខណៈដែលប្រទេសរុស្ស៊ីបាននិយាយថា ប្រធានាធិបតី វ៉្លាឌីមៀរ ពូទីន កំពុងពិនិត្យមើលសំណើនេះ។ ចំណែកមេដឹកនាំប្រទេសផ្សេងទៀត មិនទាន់បានប្តេជ្ញាចិត្តនៅឡើយទេ។

លោកត្រាំ បានរិះគន់អង្គការសហប្រជាជាតិជាយូរមកហើយ ហើយលោកបានមានប្រសាសន៍ថា សហរដ្ឋអាមេរិកបានដកខ្លួនចេញពីអង្គភាពដែលពាក់ព័ន្ធនឹង UN ជាង៣០ហើយ ដែលលោកយល់ថាមានសកម្មភាពផ្ទុយនឹងផលប្រយោជន៍របស់​អាមេរិក៕

ប្រែសម្រួល៖ ឈាង