តម្លៃប្រេងហក់ឡើងជិត ៣% ពេលបិទការជួញដូរថ្ងៃសុក្រ ជុំវិញកង្វល់ផ្នែកផ្គត់ផ្គង់

តម្លៃប្រេងអន្តរជាតិ​បានកើនឡើងជិត ៣% នៅពេលបិទការជួញដូរនៅថ្ងៃសុក្រ ដែលជាថ្ងៃបិទការជួញដូរប្រចាំសប្ដាហ៍ បន្ទាប់ពីប្រធានាធិបតីអាមេរិក លោក​ ដូណាល់ ត្រាំ បានបង្កើនសម្ពាធលើអ៊ីរ៉ង់ ដោយដាក់ទណ្ឌកម្មថ្មីលើនាវាដឹកជញ្ជូនប្រេង និងបញ្ជាកងកម្លាំងជើងទឹកឱ្យ​ធ្វើដំណើរឆ្ពោះទៅកាន់ប្រទេសនេះ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

​

តម្លៃប្រេងឆៅនាពេលអនាគត ម៉ាក Brent បានកើនឡើង ១,៨២ ដុល្លារ ឬ ២,៨% ដល់ ៦៥,៨៨ ដុល្លារ/បារ៉ែល ដែលជាកម្រិតខ្ពស់បំផុតចាប់តាំងពីថ្ងៃទី ១៤ ខែមករា។ ប្រេងឆៅអាមេរិក ម៉ាក West Texas Intermediate ​(WTI) បានកើនឡើង ១,៧១ ដុល្លារ ឬ ២,៩% ដល់ ៦១,០៧ ដុល្លារ ដែលក៏ជាកម្រិតខ្ពស់បំផុតក្នុងរយៈពេលជាងមួយសប្តាហ៍ផងដែរ។

គិតជាអត្រាប្រចាំសប្ដាហ៍​ តម្លៃប្រេងទាំង ២ បាន​កើនឡើងប្រហែល ២,៥%។

គេមើលឃើញថា តម្លៃប្រេងកើនឡើងប៉ុន្មានថ្ងៃនេះ ដោយសារតែការផ្អាកផលិតកម្មប្រេងនៅវាលប្រេង ២ កន្លែងធំៗរបស់ប្រទេសកាហ្សាក់ស្ថាន។ ហើយចុងក្រោយនេះ ទៀតសោត​ គឺពាក់ព័ន្ធនឹង​ភាពតានតឹងសហរដ្ឋអាមេរិក-អ៊ីរ៉ង់ ដែលសុទ្ធសឹង​តែបង្កក្ដីបារម្ភពីការរំខានផ្នែកផ្គត់ផ្គង់។ ​

កាលពីថ្ងៃសុក្រ ក្រសួងរតនាគារសហរដ្ឋអាមេរិក​បាន​ប្រកាសពីការដាក់ទណ្ឌកម្មលើនាវាចំនួន ៩ គ្រឿង និងក្រុមហ៊ុនពាក់ព័ន្ធចំនួន ៨ ដែលពាក់ព័ន្ធនឹងការដឹកជញ្ជូនប្រេង និងផលិតផលប្រេងកាតរបស់អ៊ីរ៉ង់​។ បន្ថែមពីលើការដាក់ទណ្ធកម្ម មន្ត្រីអាមេរិកម្នាក់បាន​អះអាងថា អាមេរិក​កំពុងបញ្ជូននាវាចម្បាំង រួមទាំងនាវាផ្ទុកយន្តហោះ និងនាវាពិឃាតមីស៊ីលនាំផ្លូវ ទៅ​មជ្ឈិមបូព៌ា។

យោងតាមអង្គការនៃប្រទេសនាំចេញប្រេងកាត (OPEC) អ៊ីរ៉ង់ផលិតប្រេង ៣,២ លា​នបារ៉ែល/ថ្ងៃ ក្នុងនាមជាប្រទេសផលិតប្រេងធំបំផុតទី៤ របស់ OPEC ពីក្រោយអារ៉ាប៊ីសាអ៊ូឌីត អ៊ីរ៉ាក់ និងអារ៉ាប់រួម។ អ៊ីរ៉ង់ ក៏ជាប្រទេសផ្គត់ផ្គង់ប្រេងដ៏ធំសម្រាប់ចិន​ ដែលជាប្រទេសប្រើប្រាស់ប្រេងច្រើនជាងគេបំផុតលើលោក ផងដែរ៕​