ទំនុកចិត្តទេសចរណ៍ថៃបន្តធ្លាក់ចុះ​នៅត្រីមាសចុងឆ្នាំមុន ដោយសារបញ្ហាព្រំដែន ទឹកជំនន់

ក្រុមប្រឹក្សាទេសចរណ៍ថៃ (TCT) បានឱ្យដឹងថា សន្ទស្សន៍ទំនុកចិត្តទេសចរណ៍ថៃក្នុងត្រីមាសទី ៤ នៃឆ្នាំ ២០២៥ បានបន្ត​ធ្លាក់ចុះ​គួរឱ្យកត់សម្គាល់ ​ដោយសារតែទឹកជំនន់ដ៏មហន្តរាយនៅ​ភាគខាងត្បូង ជម្លោះព្រំដែនថៃ-កម្ពុជា និងកំណើនប្រាក់បាត​។ នេះបើតាមការចុះផ្សាយរបស់កាសែតបាងកកប៉ុស្តិ៍ នៅថ្ងៃពុធនេះ។

ការធ្លាក់ចុះនេះ បង្ហាញពីភាពយឺតយ៉ាវនៃការងើបឡើងវិញ​នៃ​វិស័យទេសចរណ៍ថៃ ដែល​ប្រឈមនឹង​បញ្ហាជាបន្តបន្ទាប់គ្នាកាលពីឆ្នាំមុន ហើយបង្ក​ឱ្យ​បរិមាណភ្ញៀវទេសចរអន្តរជាតិ​ធ្លាក់ចុះរាប់លាន​នាក់។

ប្រធាន TCT លោក Chai Arunanondchai បាន​និយាយថា​ ឆ្នាំ២០២៥ គឺជាឆ្នាំដ៏លំបាកមួយ ទោះបីជាមានភាពប្រសើរឡើងក្នុងរដូវ​ខ្ពស់ក៏ដោយ។

ការស្ទង់មតិរបស់ TCT លើប្រតិបត្តិករទេសចរណ៍​ចំនួន ៧៤០ ​ចន្លោះថ្ងៃទី១០ ខែវិច្ឆិកា ដល់ថ្ងៃទី១០ ខែធ្នូ បានបង្ហាញ​ថា សន្ទស្សន៍ទំនុកចិត្តទេសចរណ៍​បានធ្លាក់ចុះដល់ ៧២ ពិន្ទុ ធៀបនឹង​ ៧៥ ពិន្ទុ ក្នុងត្រីមាសទី ៤ ដូចគ្នា​កាលពីឆ្នាំ ២០២៤។ ​ទោះបី ៧២ ពិន្ទុ បង្ហាញពីភាពប្រសើរឡើង ធៀបនឹង​ការធ្លាក់ចុះដល់ ៦៦ ពិន្ទុ នៅត្រីមាសទី ៣ ឆ្នាំ ២០២៥ ក្ដី ប៉ុន្តែវានៅតែទាបជាងឆ្ងាយ ធៀបនឹង​កម្រិតស្ដង់ដារ ១០០ ពិន្ទុ ​ដែល TCT បានកត់ត្រាមុនវិបត្តិកូវីដ១៩។

សន្ទុះនៅរដូវខ្ពស់ គោលនយោបាយជួយចំណាយពលរដ្ឋក្នុងស្រុកពេលធ្វើដំណើរកម្សាន្ត និងកម្មវិធីធំៗជាច្រើន នៅតែមិនអាចប៉ះប៉ូវផលប៉ះពាល់ពីបញ្ហាអវិជ្ជមាន​ផ្សេងៗ​​ ដូចជាទឹកជំនន់ធ្ងន់ធ្ងរនៅតំបន់ភាគខាងត្បូងប្រទេស ដែលធ្វើឱ្យ​ភ្ញៀវទេសចរពីម៉ាឡេស៊ីធ្លាក់ចុះស្ទើរតែស្រុងនៅចុងឆ្នាំ។ ​

TCT បាន​លើកឡើងផងដែរ ជម្លោះព្រំដែនជាមួយ​កម្ពុជា ដែលផ្ទុះឡើងជាថ្មីនៅដើមខែធ្នូ ក៏ជួយទម្លាក់ទំនុកចិត្ត​ក្នុងចំណោមភ្ញៀវទេសចរបរទេសផងដែរ ខណៈការឡើងថ្លៃប្រាក់បាត ធ្វើឱ្យភ្ញៀវទេសចរផ្លាស់ប្ដូរទិសដៅទៅប្រទេសប្រកួតប្រជែងផ្សេងៗទៀត ដូចជាវៀតណាម​ និងជប៉ុន ជាដើម។

សម្រាប់ត្រីមាសទី១ ដើមឆ្នាំ ២០២៦ នេះ TCT បានព្យាករថា សន្ទស្សន៍ទំនុកចិត្តទេសចរណ៍នឹងកើនឡើងដល់ ៨០ ពិន្ទុ ដោយ​រំពឹងទទួលភ្ញៀវចំនួន ៩,៣ លាននាក់ ដែលភាគច្រើន​ជំរុញដោយភ្ញៀវទេសចរអឺរ៉ុប និងថ្ងៃឈប់សម្រាកបុណ្យចូលឆ្នាំចិន។

​យ៉ាងណាមិញ​ ទេសចរណ៍ថៃនៅតែប្រឈមហានិភ័យ​ក្នុងរយៈពេលនេះរួមមាន ផ្សែងអ័ព្ទ PM2.5 ជម្លោះភូមិសាស្ត្រនយោបាយ សេដ្ឋកិច្ចយឺតយ៉ាវរបស់​ចិន និង​កំណើន​ថ្លៃសេវា និងការធ្វើដំណើរ។

TCT បានស្នើឱ្យ​ថៃផ្តោតលើផ្នែកទេសចរណ៍ដែលចំណាយខ្ពស់នៅក្នុងប្រទេសចិន ខណៈ​ធ្វើពិពិធកម្មគោលដៅរបស់ខ្លួនឆ្ពោះទៅរកទីផ្សារផ្សេងទៀតដូចជា អឺរ៉ុប ឥណ្ឌា កូរ៉េខាងត្បូង និងមជ្ឈិមបូព៌ា ជាដើម​។

ដោយឡែក ក្រុម​ប្រឹក្សាក៏​​បានកត់សម្គាល់ផងដែរ​ថា ទេសចរណ៍ក្នុងស្រុកត្រូវបានរារាំងដោយបំណុលគ្រួសារខ្ពស់ ដែលបង្ខំឱ្យប្រជាជនក្នុងស្រុកកាត់បន្ថយចំនួនដំណើរកម្សាន្ត​។

សម្រាប់ឆ្នាំ ២០២៦ នេះ TCT បានព្យាករ​ភ្ញៀវទេសចរអន្តរជាតិ​ ៣៤ លាននាក់​ ដែលតិចជាងគោលដៅរបស់អាជ្ញាធរទេសចរណ៍ថៃ​ ៣៦,៧ លាននាក់។

គួររំឭកថា កាលពីឆ្នាំ ២០២៥ ថៃទទួលភ្ញៀវទេសចរណ៍អន្តរជាតិ​ ៣២,៩ លាននាក់ ដោយធ្លាក់ចុះប្រមាណ ៧,២៣% ធៀបនឹង​ឆ្នាំ ២០២៤ ដែលធ្វើឱ្យ​វាក្លាយជាការធ្លាក់ចុះភ្ញៀវជាលើកដំបូងក្រោយសម័យកូវីដ១៩ ដោយសារតែបញ្ហាផ្សេងៗ រាប់តាំងពីកង្វល់សុវត្ថិភាព ទឹកជំនន់ គ្រោះរញ្ជួយដី ជម្លោះប្រដាប់អាវុធនៅព្រំដែនជាមួយកម្ពុជា​ កំណើនប្រកួតប្រជែងពីវៀតណាម និងម៉ាឡេស៊ី និងភាពស្រពេចស្រពិលនៃសេដ្ឋកិច្ចសកលជាដើម៕