បារីជិត ៥ពាន់កញ្ចប់ ដែលនាំឆ្លងដែនចេញពីកម្ពុជា ត្រូវទាហានថៃចាប់បាន

បារីជាច្រើនប្រភេទ ចំនួន ៤.៦៤០ កញ្ចប់ ដែលធ្លាប់លួចឆ្លងដែនចេញពីកម្ពុជាចូលទៅក្នុងទឹកដីថៃ ត្រូវបានទាហានឈុតខ្មៅថៃចាប់បាន ដែលជាញឹកញាប់ទំនិញបារីប្រភេទនេះគឺនៅតែបន្តហូរចេញពីកម្ពុជា បានយ៉ាងរលូនដល់គេមិនដឹងថាតើជនល្មើសជានរណា ហើយមានខ្នងប៉ុណ្ណា បានជាបន្តនាំចេញតាមច្រករបៀងចូលទៅក្នុងប្រទេសថៃឥតឈប់ឈរ បើទោះបីជាមានការចាប់ជាញឹកញាប់ក៏ដោយ។

យោងតាមការផ្សាយរបស់គេហទំព័រប្រទេសថៃបានបញ្ជាក់ថា នៅរសៀលថ្ងៃទី ៣០ ខែមករា ឆ្នាំ២០២៦ កម្លាំងកងរយលេខ ១២០៧ និងកម្លាំងយោធាការពារព្រំដែនលេខ ១២ របស់ថៃបានធ្វើការបង្ហោះដ្រូនដើម្បីល្បាតតាមបន្ទាត់ព្រំដែនក៏បានប្រទះឃើញរថយន្តមួយគ្រឿង ដែលកំពុងឈប់សុំចតនៅក្នុងចំការអំពៅ ក្បែរអូរព្រំដែន នៅត្រង់ចំណុច ភូមិណងព្រឺ ឃុំផានសឹក ស្រុកអារញ្ញប្រាថេត ខេត្តស្រះកែវ។

នៅពេលកម្លាំងថ្មើជើងបានចុះទៅដល់ហើយក៏បានពិនិត្យឃើញថា នៅគូទរថយន្តមានការ៉ុងចំនួន ៨ ការ៉ុង ដែលក្នុងនោះមានបារីបរទេសជាច្រើនម៉ាកសរុបចំនួន ៤ ៦៤០ កញ្ចប់ ស្លាកលេខរថយន្តចំនួន ២ ផ្ទាំង និងទំនិញផ្សេងៗមួយចំនួនទៀត។

អ្នកបើកបររថយន្តជាជនជាតិថៃ រស់នៅខេត្តស៊ីសាកេត ដោយគេបានសារភាពថា បារីទាំងនេះគឺរូបគេជាអ្នកស៊ីឈ្នួលដឹកដោយទទួលមកតាមច្រកមួយក្នុងទឹកដីណងព្រឺ ដែលប្រឈមនឹងស្រុកម៉ាឡៃ ខេត្តបន្ទាយមានជ័យ ។

បច្ចុប្បន្នអ្នកបើកបររថយន្ត រួមជាមួយនឹងវត្ថុតាងល្មើសច្បាប់ ត្រូវបានកម្លាំងយោធាឈុតខ្មៅថៃ បញ្ជូនទៅកាន់ស្នាក់ការគយនិងរដ្ឋាករ ក្នុងខេត្តស្រះកែវដើម្បីពិនិត្យ សាកសួរបន្ត និងអនុវត្តទៅតាមនីតិវិធីច្បាប់ ៕

អត្ថបទ ៖ សោ និយមរ័ត្ន