កងកម្លាំងប៉ាគីស្ថាន សម្លាប់ខ្មាន់កាំភ្លើង ១៤៥នាក់ ក្រោយ​ប្រយុទ្ធ​គ្នា​អស់​២ថ្ងៃ

កងកម្លាំងសន្តិសុខប៉ាគីស្ថាន បានបញ្ចប់ប្រតិបត្តិការវាយបកវិញរយៈពេល៤០​ម៉ោងកាលពីថ្ងៃអាទិត្យ ទី១ ខែកុម្ភៈ ឆ្នាំ២០២៦ ដោយបានរាយការណ៍ពីការសម្លាប់​ខ្មាន់កាំភ្លើងចំនួន ១៤៥​នាក់ បន្ទាប់ពី​មាន​ការវាយប្រហារជា​បន្ត​បន្ទាប់​​បានកើតឡើង​នៅ​ខេត្ត Balochistan។

យោង​តាម​រ៉យទ័រ អំពើហិង្សានេះបានចាប់ផ្តើមកាលពីថ្ងៃសុក្រ ដែលត្រូវបានបង្ក​ឡើង​ដោយក្រុម​កងទ័ពរំដោះ Balochistan (ឬ​ហៅ​ថា BLA) ដែលជាក្រុមខុសច្បាប់ ក្រោមយុទ្ធនាការមួយដែលមានឈ្មោះថា «ប្រតិបត្តិការ Herof (ឬព្យុះខ្មៅ)»។ ក្រុមឧទ្ទាមបានកំណត់គោលដៅលើទីតាំងសន្តិសុខ សាលារៀន និងផ្សារ ដែលបណ្តាល​ឲ្យ​មនុស្ស ៤៨​នាក់ស្លាប់ ក្នុងនោះមានបុគ្គលិកសន្តិសុខ ១៧​នាក់ និងជនស៊ីវិល ៣១នាក់។

អភិបាលខេត្ត លោក Sarfraz Bugti បានបញ្ជាក់ថា ក្រុមខ្មាន់កាំភ្លើងបានប្រើល្បិចបន្លំខ្លួន ដោយស្លៀកពាក់ជាជនស៊ីវិលដើម្បីជ្រៀតចូលទៅក្នុងទីក្រុង និងប្រើប្រាស់អ្នកស្រុកធ្វើជាខែលការពារខ្លួន។ ការវាយប្រហារបានរីករាលដាលពាសពេញស្រុកជាច្រើន រួមមាន Quetta, Gwadar, Mastung និង Noshki។ នៅតំបន់ Gwadar គ្រួសារមួយបានបាត់បង់សមាជិកជាស្ត្រី ៣​នាក់ និងកុមារ ៣​នាក់ ក្នុងអំឡុងពេលការបាញ់ប្រហារគ្នា។ កងទ័ពបានរាយការណ៍ថា ទោះបីជាក្រុមខ្មាន់កាំភ្លើងបានព្យាយាមដណ្តើមយកទីតាំងយុទ្ធសាស្ត្រ និងពន្ធនាគារ ដោយបានដោះលែងអ្នកទោស ៣០​នាក់នៅស្រុក Mastung ក៏ដោយ ក៏រាល់ការប៉ុនប៉ងកាន់កាប់ទឹកដីត្រូវបានវាយបក​ឲ្យដកថយវិញទាំងអស់។

ទំហំនៃប្រតិបត្តិការ «ព្យុះខ្មៅ» នេះ គឺជាការផ្ទុះឡើងនៃអំពើហិង្សាដ៏សាហាវបំផុតមួយក្នុងប្រវត្តិសាស្ត្ររបស់ខេត្ត​ Balochistan។ ខណៈពេលដែលក្រុម BLA អះអាងថាបានសម្លាប់ទាហាន ៨៤នាក់ កងទ័ពប៉ាគីស្ថានបានច្រានចោលតួលេខនេះដោយចាត់ទុកថាជាការបំប៉ោង និងបានចោទប្រកាន់ថាជនដៃដល់គឺជា «ក្រុមខ្មាន់កាំភ្លើងដែលគាំទ្រដោយឥណ្ឌា»។

ពាក់ព័ន្ធ​នឹង​រឿង​នេះ ប្រទេសឥណ្ឌាបានបដិសេធដាច់អហង្ការចំពោះការចោទប្រកាន់ ដោយជំរុញ​ឲ្យ​ទីក្រុងអ៊ីស្លាម៉ាបាត ផ្តោតលើការដោះស្រាយបញ្ហាក្នុងស្រុករបស់​ខ្លួន​​​វិញ​ល្អ​ជាង​​ទាក់ទិន​នឹង​ប្រជាជនបាឡូជី៕

ប្រែសម្រួល៖ ឈាង