ចិន រំពឹងថា ពលរដ្ឋ នឹងធ្វើដំណើរទៅមកជិត១០ពាន់លានដង អំឡុងបុណ្យចូលឆ្នាំថ្មី

ជារៀងរាល់ឆ្នាំឲ្យតែដល់រដូវបុណ្យចូលឆ្នាំថ្មី ប្រជាជនចិនរាប់ពាន់លាននាក់ បានធ្វើដំណើរទៅស្រុកកំណើត ដែលជាអ្វីត្រូវបានគេមើលឃើញថា ជាការធ្វើដំណើរក្នុងស្រុកទ្រង់ទ្រាយធំបំផុតលើពិភពលោក។

តាមការផ្សាយរបស់ VN Express នៅថ្ងៃចន្ទទី១៦ខែកុម្ភៈ, ឆ្នាំនេះ ចិនរំពឹងថា នឹងមានពលរដ្ឋធ្វើដំណើរក្នុងស្រុកទៅមករហូតដល់ ៩.៥ ពាន់លានដង អំឡុងពេល៤០ថ្ងៃនៃរដូវកាល «Xuanyun» ឬការធ្វើដំណើរក្នុងឱកាសបុណ្យចូលឆ្នាំចិន។

បើធៀបនឹងឆ្នាំមុន តួលេខនេះគឺមានការកើនឡើង បើធៀបនឹងពលរដ្ឋធ្វើដំណើរ៩.០២ពាន់លានដង កាលពីឆ្នាំ២០២៥ ដែលឆ្លុះបញ្ចាំងពីតម្រូវការធ្វើដំណើរ និងការកម្សាន្តកាន់តែខ្លាំងរបស់ប្រជាជនចិន។

មូលហេតុមួយដែលជំរុញឲ្យពលរដ្ឋចិន ធ្វើដំណើរច្រើនជាងឆ្នាំទៅ គឺព្រះតែថ្ងៃឈប់សម្រាកវែងជាងមុន ពោលគឺឆ្នាំនេះ រដ្ឋាភិបាលទីក្រុងប៉េកាំង បានពង្រីកថ្ងៃឈប់សម្រាកផ្លូវការរហូតដល់ ៩ ថ្ងៃ (ចាប់ពីថ្ងៃទី ១៥ ដល់ ២៣ ខែកុម្ភៈ) ដែលនេះផ្តល់ឱកាសឲ្យប្រជាជនមានពេលច្រើនក្នុងការធ្វើដំណើរទៅស្រុកកំណើត ឬដើរកម្សាន្ត។

ពាក់ព័ន្ធមធ្យោបាយធ្វើដំណើរវិញ រថយន្តផ្ទាល់ខ្លួន គឺជាមធ្យោបាយពេញនិយមបំផុត ស្មើនឹង ៨០% នៃតួលេខសរុប ខណៈផ្លូវដែក ត្រូវគេរំពឹងថានឹងមានអ្នកដំណើរប្រហែល ៥៤០ លានដង ចំណែកផ្លូវអាកាស រំពឹងថានឹងមានអ្នកដំណើរប្រហែល ៩៥ លានដង៕

អត្ថបទ៖ សុខ សុវណ្ណ