កិច្ចពិភាក្សា២ថ្ងៃរវាង​រុស្ស៊ី-អ៊ុយក្រែន​​គ្មាន​លទ្ធផលផ្លែផ្កា ខណៈបញ្ហា​ទឹកដីរារាំងក្តីសង្ឃឹមនៃសន្តិភាព

កិច្ចពិភាក្សា​នា​ថ្ងៃទី​២​នៅទីក្រុងហ្សឺណែវ បានបញ្ចប់ទៅក្នុងរយៈពេលមិនដល់ពីរម៉ោងផងកាលពីថ្ងៃពុធទី១៨​​កុម្ភៈ ដោយមិនបាននាំមកនូវសន្តិភាព​​ឲ្យ​កាន់តែជិតសម្រាប់អ៊ុយក្រែនឡើយ ខណៈដែលគោលជំហររវាងរុស្ស៊ី និងសហរដ្ឋអាមេរិក នៅតែមានការខ្វែងគំនិតគ្នាយ៉ាងខ្លាំង នៅមុនថ្ងៃខួបលើកទីបួននៃសង្គ្រាម។

ប្រធានាធិបតី វ៉ូឡូឌីមៀរ ហ្សេលេនស្គី បានហៅកិច្ចពិភាក្សាជុំទីបីនេះថា «មានភាពលំបាក» ដោយលោកបានលើកឡើងថា វឌ្ឍនភាពមានកម្រិត ហើយបញ្ហានយោបាយដែលរសើបមិនត្រូវបានដោះស្រាយ​ឲ្យ​បានត្រឹមត្រូវនោះទេ ព្រមទាំងបានជំរុញ​ឲ្យ​មានការជំនួបមួយទៀតនៅក្នុងខែនេះ។

យ៉ាង​ណា​មិញ ទីក្រុងកៀវ​បាននិយាយថា ការពិភាក្សាទាំងនេះគឺ «មានខ្លឹមសារខ្លះ» ដោយផ្តោត​លើបញ្ហាមនុស្សធម៌ ដូចជា ការដោះដូរអ្នកទោស និងការដោះលែងជនស៊ីវិល។ ប្រភពការទូតអ៊ុយក្រែនមួយបានប្រាប់សារព័ត៌មាន BBC ថា មានវឌ្ឍនភាព​មួយ​ចំនួន​លើ «បញ្ហាយោធា» រួមទាំងទីតាំងខ្សែត្រៀមជួរមុខ និងការឃ្លាំមើលបទឈប់បាញ់។ ប៉ុន្តែទីក្រុងមូស្គូនៅតែប្រកាន់ជំហរតឹងរឹង​លើការទាមទារឲ្យ​អ៊ុយក្រែនប្រគល់ទឹកដី ២០ភាគរយដែលនៅសល់ក្នុងតំបន់ Donetsk ភាគខាងកើត។ ប្រធាន​ក្រុម​​ចរចារុស្ស៊ី លោក Vladimir Medinsky បានទទួលស្គាល់ថា ការចរចាមានភាពលំបាក ហើយបានអញ្ជើញ​ឲ្យ​មានការពិភាក្សាដោយសម្ងាត់ដោយមិនចាំបាច់​មានការសម្របសម្រួលពីសហរដ្ឋអាមេរិក។ ចំណែក​ឯ​បេសកជន​អាមេរិក លោក Steve Witkoff បាននិយាយថា ដំណើរការនេះបាននាំមកនូវ «វឌ្ឍនភាពដ៏មានអត្ថន័យ» ស្រប​ពេល​ដែល​ប្រធានាធិបតី ដូណាល់ ត្រាំ បានជំរុញ​ឲ្យ​ទីក្រុងកៀវ​​ឆាប់​ឈានទៅរកកិច្ចព្រមព្រៀង ដែលពាក់ព័ន្ធនឹងការធ្វើសម្បទានទឹកដីសំខាន់ៗ។

សូម​ជម្រាប​ថា បច្ចុប្បន្ន រុស្ស៊ីកំពុងកាន់កាប់ប្រហែល ២០ភាគរយនៃទឹកដីអ៊ុយក្រែន រួមទាំងតំបន់គ្រីមៀរផងដែរ ខណៈដែលការវាយប្រហារតាមអាកាសនាពេលថ្មីៗនេះលើហេដ្ឋារចនាសម្ព័ន្ធថាមពល បានធ្វើ​ឲ្យ​មនុស្សរាប់សែននាក់គ្មានកម្តៅ និងអគ្គិសនីប្រើប្រាស់ ក្នុងអំឡុងរដូវរងាដ៏ត្រជាក់ខ្លាំងបំផុត៕

ប្រែសម្រួល៖ ឈាង