EU ប្តេជ្ញាអនុវត្តកម្ចី​៩០ពាន់លានអឺរ៉ូ​ឲ្យ​អ៊ុយក្រែន ទោះបីមានការរារាំងពីហុងគ្រី

ប្រធានគណៈកម្មការអឺរ៉ុប លោកស្រី Ursula von der Leyen បានបញ្ជាក់ថា សហភាពអឺរ៉ុបនឹងស្វែងរកមធ្យោបាយដើម្បីអនុវត្តកិច្ចព្រមព្រៀងផ្តល់កម្ចីចំនួន ៩០ពាន់លានអឺរ៉ូដល់ប្រទេសអ៊ុយក្រែន បើទោះបីជាប្រទេសហុងគ្រីបានរារាំងជំហាននីតិវិធីមួយចំនួនក៏ដោយ។ នេះ​បើ​យោង​តាម​ការ​ចុះ​ផ្សាយរបស់​សារព័ត៌មាន European Pravda កាល​ពីថ្ងៃទី​២៤​ខែ​កុម្ភៈ​ឆ្នាំ​២០២៦។

ថ្លែងក្នុងសន្និសីទសារព័ត៌មានមួយនៅទីក្រុងកៀវ លោកស្រីបានសង្កត់ធ្ងន់ថា ដោយសារកម្ចីនេះត្រូវបានយល់ព្រមដោយមេដឹកនាំនៃរដ្ឋសមាជិកទាំង​២៧​រួចហើយនោះ សហភាពអឺរ៉ុបនឹងធានា​ឲ្យ​បាននូវការអនុវត្តសម្រេចនេះ «តាមមធ្យោបាយណាមួយមិនខាន»។

កាលពីថ្ងៃអង្គារ ក្រុមប្រឹក្សាកិច្ចការទូទៅរបស់សហភាពអឺរ៉ុបបានអនុម័តឯកសារចំនួនពីរ ដើម្បីបន្តការងារបច្ចេកទេសលើការផ្តល់ប្រាក់កម្ចីសម្រាប់ឆ្នាំ​២០២៦-២០២៧ ប៉ុន្តែច្បាប់ចាំបាច់សម្រាប់ការបញ្ចេញថវិកានៅតែត្រូវបានរារាំងដោយហុងគ្រី។ ទោះជាយ៉ាងណាក៏ដោយ លោកស្រីប្រធានគណៈកម្មការអឺរ៉ុបបានបន្ថែមថា បច្ចុប្បន្នមាន «ជម្រើសផ្សេងៗគ្នាជាច្រើនដែលអាចប្រើប្រាស់បាន ហើយពួកគេនឹងប្រើប្រាស់ជម្រើសទាំងនោះ» ដើម្បីសម្រេចការងារនេះ។

សូម​ជម្រាប​ថា ប្រទេសហុងគ្រីកំពុងគំរាមប្រើសិទ្ធិវេតូ ដើម្បីរារាំងកញ្ចប់កម្ចី​របស់សហភាពអឺរ៉ុបសម្រាប់អ៊ុយក្រែន លុះត្រាតែការដឹកជញ្ជូនប្រេងតាមបំពង់ Druzhba របស់រុស្ស៊ីត្រូវបានតភ្ជាប់ឡើងវិញ។ រដ្ឋមន្ត្រីការបរទេសហុងគ្រី លោក Péter Szijjártó បានចោទប្រកាន់អ៊ុយក្រែនថាបានគំរាម​​ប្រទេសលោក តាមរយៈការបញ្ឈប់ការដឹកជញ្ជូនប្រេង ដើម្បីធ្វើ​ឲ្យ​តម្លៃប្រេងឡើងថ្លៃមុនការបោះឆ្នោតជាតិ​របស់​ហុង​គ្រី​នា​ខែ​មេសា​ខាង​មុខ ដែលលោកអះអាងថាជាការរំលោភលើកិច្ចព្រមព្រៀងរវាង EU និងអ៊ុយក្រែន។ លោក​​បាន​សង្កត់​ធ្ងន់​ថា ​ហុងគ្រីនឹងប្រឆាំងនឹងកញ្ចប់ថវិកានេះ រហូតទាល់តែការដឹកជញ្ជូនប្រេងដំណើរការធម្មតា​វិញ។

ជាការឆ្លើយតប ក្រសួងការបរទេសអ៊ុយក្រែនបានទាត់ចោល​ការ​ចោទ​ប្រកាន់​របស់​ហុងគ្រី ដោយចាត់ទុកសកម្មភាព​នេះ​ថាជាការបង្កហេតុ និងខ្វះការទទួលខុសត្រូវ។ ទីក្រុងកៀវបានបញ្ជាក់ថា ការរអាក់រអួលនេះបណ្តាលមកពីការវាយប្រហារប្រចាំថ្ងៃរបស់រុស្ស៊ីលើហេដ្ឋារចនាសម្ព័ន្ធថាមពល និង​​ការជួសជុលកំពុងបន្តធ្វើឡើងយ៉ាងលំបាក ហើយ​អ៊ុយក្រែន​បានផ្តល់ព័ត៌មានអំពីការជួសជុលទៅ​ឲ្យហុងគ្រី និងស្លូវ៉ាគីរួចហើយ៕

ប្រែសម្រួល៖ ឈាង