សម្តេចតេជោ ហ៊ុន សែន នឹងថ្លែងសុន្ទរកថា បើកសន្និបាតប្រចាំឆ្នាំលើកទី៧៧ របស់ UN-ESCAP

តបតាមការអញ្ជើញរបស់លោកស្រី អាមីដា សាលស៊ីអាហ៍ អាលីសចាបាណា (Armida Salsiah Alisjahbana) អគ្គលេខាធិការរងអង្គការសហប្រជាជាតិ និងជាលេខាធិការប្រតិបត្តិរបស់ ESCAP នៅថ្ងៃទី២៦ ខែមេសា សម្តេចតេជោ ហ៊ុន សែន នាយករដ្ឋមន្ត្រីកម្ពុជានឹងអញ្ជើញថ្លែងសុទ្ទរកថាបើក សន្និបាតប្រចាំឆ្នាំរបស់គណៈកម្មការសេដ្ឋកិច្ច និងសង្គមអង្គការសហប្រជាជាតិ សម្រាប់តំបន់អាស៊ី និងប៉ាស៊ីហ្វិក (77th UN-ESCAP) ដែលនឹងប្រព្រឹត្តិទៅនៅទីក្រុងបាងកក។ 

សុន្ទរកថារបស់សម្តេចតេជោនាយករដ្ឋមន្រ្តី នឹងផ្តោតទៅលើទិដ្ឋភាពសំខាន់ៗមួយចំនួន រួមមាន ផលប៉ះពាល់នៃជំងឺកូវីដ-១៩ ទៅលើសេដ្ឋកិច្ចសកល ភាពចាំបាច់បន្ទាន់នៃវ៉ាក់សាំងបង្ការជំងឺកូវីដ១៩ និងផែនការស្តារឡើងវិញក្រោយវិបត្តិជំងឺកូវីដ-១៩។

បើតាមក្រសួងការបរទេស សន្និបាតប្រចាំឆ្នាំលើកទី៧៧ នោះ រៀបចំធ្វើឡើង ក្រោមមូលបទ “ការស្តារឡើងវិញក្រោយ​វិបត្តិ តាមរយៈកិច្ចសហ ប្រតិបត្តិការតំបន់ នៅក្នុងតំបន់អាស៊ី និងប៉ាស៊ីហ្វិក” នឹងពិភាក្សាអំពីរបៀបនានា ដើម្បីពង្រឹង បន្ថែមទៀតនូវកិច្ចសហប្រតិបត្តិការតំបន់និងការតភ្ជាប់កាន់តែប្រសើរឡើង និងដើម្បីកសាងភាពរឹងមាំ នៅក្នុងវិបត្តិផ្សេងៗ ដោយពិចារណាទៅលើជំងឺរាតត្បាតកូវីដ-១៩ និងការស្តារឡើងវិញសេដ្ឋកិច្ច-សង្គម ដែលរងផលប៉ះពាល់ពីជំងឺនេះ។

សន្និបាត ក៏នឹងពិនិត្យមើលឡើងវិញនូវការអនុវត្តរបៀបវារៈសម្រាប់ការអភិវឌ្ឍប្រកបដោយចីរភាពឆ្នាំ២០៣០ នៅក្នុងតំបន់អាស៊ី និងប៉ាស៊ីហ្វិក ផងដែរ។

លោកទេសរដ្ឋមន្រ្តី លី ធុច ប្រធានគណៈ កម្មការជាតិ ESCAP ក៏នឹងអញ្ជើញចូល រួមក្នុងសន្និបាតខាងលើនេះ តាមរយៈ​ប្រព័ន្ធវីដេអូ ផងដែរ៕

អត្ថបទ៖កោះកែវ