វិសាខា អភិវឌ្ឍ ថ្នាល​​យុវជនស្តង់ដាដូចនៅ អឺរ៉ុប ទើប​ក្រុម​ពួកគេខ្លាំងគ្រប់កម្រិត

ក្លិបបាល់ទាត់ វិសខា កំពុងទទួលបានភាពជោគជ័យខ្លាំង ជាមួយការបណ្តុះយុវជនថ្នាលគ្រប់កម្រិត។ យ៉ាងណា ភាពជោគជ័យទាំងនេះ ហាក់មិនមែនជារឿងចៃដន្យនោះទេ ដោយសារពួកគេបានរៀបចំក្រុមយុវជនរបស់ខ្លួន ដោយចក្ខុវិស័យច្បាស់លាស់ និងមានហេដ្ឋារចនាសម្ព័ន្ធកម្រិតស្តង់ដា មិនចាញ់នៅប្រទេសអភិវឌ្ឍ។

បច្ចុប្បន្នមាន វិសាខា មានមជ្ឍមណ្ឌលហ្វឹកហាត់ដ៏ធំមួយ ដែលមានទំហំសរុប ៤ ហិកតា នៅតាមបណ្តោយផ្លូវឈ្នះៗ ក្នុងខណ្ឌពោធិ៍សែនជ័យ រាជធានីភ្នំពេញ។ មជ្ឈមណ្ឌលហ្វឹកហាត់នេះ បានបម្រើការដល់ការហ្វឹកហាត់របស់ក្រុមយុវជន ៣ កម្រិតមាន U14, U16 និង U18 និងក្រុមយុវនារី ១ កម្រិត រួមជាមួយក្រុមធំផងដែរ។

មជ្ឍមណ្ឌលហ្វឹកហាត់ វិសខា មានទីលានហ្វឹកហាត់ចំនួន ៤ រួមមានទីលានស្មៅធម្មជាតិ ៣ និងស្មៅសិប្បនិម្មិត ១។ ក្រៅពីទីលានហ្វឹកហាត់ គឺនៅទីនេះមានទាំងកន្លែងហាត់ប្រាណពង្រឹងកាយសម្បទា កន្លែងអាហារដ្ឋាន បន្ទប់ប្រជុំ បន្ទប់គ្រូបង្វឹកធ្វើការ បន្ទប់របស់កីឡាករកម្សាន្ត​ បន្ទប់រៀនសូត្រ បន្ទប់សមាធិ និងថ្វាយបង្គុំសម្រាប់​អ្នក​កាន់សាសនាឥស្លាមផ្សេង​ៗ។

លោក ហុក សុចិត្រា អគ្គលេខាធិការក្លិប​បាល់ទាត់​ វិសាខា បានប្រាប់ «កម្ពុជាថ្មី» ថា យុវជនរបស់ក្លិប វិសាខា គ្រប់កម្រិត គឺទទួលបានការមើលថែទាំដោយក្លិប ទាំង​អាហារ​ហូបចុក ស្នាក់នៅ និងរៀនសូត្រ។ ក្លិបបានរៀបចំឱ្យយុវជនស្នាក់ជុំគ្នានៅកីឡដ្ឋាន វិសខា ហើយនៅពេលហ្វឹកហាត់ គឺត្រូវមកហ្វឹកហាត់នៅមជ្ឈមណ្ឌលហ្វឹកហាត់នេះ។

លោកបានបន្ថែម ថា ក្រៅពីការហ្វឹកហាត់របស់យុវជនក្លិបផ្ទាល់​ក្លិប វិសាខា ក៏មានសាលាបាល់ទាត់ ដើម្បីបង្វឹកដល់កុមារ ដែលស្រឡាញ់បាល់ទាត់ចាប់ពីអាយុ ៦ ឆ្នាំឡើងទៅផងដែរ ដោយការហ្វឹកហាត់តម្រូវឱ្យបង់លុយសម្រាប់អ្នកមានលទ្ធភាព។ ការហ្វឹកហាត់ គឺត្រូវបង្វឹកដោយគ្រូជំនាញ ដែលជាអតីតកីឡាករជម្រើសជាតិ។

អតីតខ្សែប្រយុទ្ធជម្រើសជាតិ កម្ពុជា រូបនេះ​បានបន្ត​ថា ក្លិប​វិសាខា គ្រោងនឹងធ្វើមជ្ឍមណ្ឌលហ្វឹកហាត់មួយទៀតក្នុងពេលឆាប់ៗខាងមុខ ដែលមានទីតាំងនៅស្រុកកំចាយមារ ខេត្ត​ព្រៃវែង។

តាមរយៈការបណ្តុះបណ្តាលយុវជន ដែលមានភាពស្តង់ដា​បែបនេះ អ្នកគាំទ្រច្បាស់ជាដឹងហើយ ថា នៅឆ្នាំ ២០២៦ នេះ វិសខា បានឈ្នះពានយុវជនគ្រប់កម្រិត ដែលបានរៀបចំដោយសហព័ន្ធ CPL រួមមាន ពាន​យុវជន​អាយុក្រោម ១៤ ឆ្នាំ ពានលីគ​យុវជន​អាយុក្រោម ១៦ ​ឆ្នាំ លីគ​យុវជន​អាយុក្រោម ១៨ ឆ្នាំ និង ពានលីគ​អភិវឌ្ឍ។

អត្ថបទ៖ សេម កុសល