ព័ត៌មានអន្ដរជាតិ

WHO ព្រួយបារម្ភខ្លាំងអំពីលទ្ធភាពនៃការវាយប្រហារលើរោងចក្រនុយក្លេអែរអ៊ីរ៉ង់ដែលនឹងបង្កគ្រោះថ្នាក់ដល់មនុស្សរាប់ជំនាន់

បានផុស

២ ខែ មុន

នៅ

ថ្ងៃចន្ទ ៦ មេសា ២០២៦

ដោយ

នាយកអង្គការសុខភាពពិភពលោក (WHO) លោក Tedros Adhanom Ghebreyesus សម្តែងការព្រួយបារម្ភពីគ្រោះថ្នាក់នៃរោងចក្រនុយក្លេអ៊ែរក្នុងប្រទេសអ៊ីរ៉ង់ ដោយសារការវាយប្រហាររបស់សហរដ្ឋអាមេរិកនិងអ៊ីស្រាអែល។

យោងតាមសារព័ត៌មាន ABC News ផ្សាយថ្ងៃទី៥ ខែមេសា ឆ្នាំ២០២៦ ការបង្ហោះមួយនៅលើបណ្តាញសង្គម X លោក Tedros Adhanom Ghebreyesus និយាយថា៖ « ខ្ញុំចូលរួមជាមួយទីភ្នាក់ងារថាមពលអាតូមិកអន្តរជាតិ (IAEA) ក្នុងការបង្កើននៃការជូនដំណឹងពីសុវត្ថិភាពនៃរោងចក្រនុយក្លេអ៊ែរនៅក្នុងប្រទេសអ៊ីរ៉ង់។ ឧប្បត្តិហេតុចុងក្រោយបំផុតដែលពាក់ព័ន្ធនឹងរោងចក្រថាមពលនុយក្លេអ៊ែរនៅទីក្រុង Bushehr គឺជាការរំលឹកយ៉ាងច្បាស់មួយថា បញ្ហានេះអាចបង្កឱ្យមានគ្រោះថ្នាក់នុយក្លេអ៊ែរ បណ្តាលឱ្យប៉ះពាល់ដល់សុខភាព ជាពិសេសបំផ្លិចបំផ្លាញមនុស្សជំនាន់ក្រោយៗទៀត»។

លោកបន្តថា៖ « ថ្ងៃនីមួយៗនៃជម្លោះកំពុងកើនឡើង បង្កជាហានិភ័យនិងការគំរាមកំហែងកាន់តែខ្លាំងឡើង។ យើងត្រូវតែបន្ថយភាពតានតឹងចាប់ពីឥឡូវនេះ។ ចំណែកការជ្រើសរើសយកសន្តិភាពគឺជាថ្នាំដ៏ល្អបំផុត»។

នាយកអង្គការសុខភាពពិភពលោក លោក Tedros Adhanom Ghebreyesus ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែក ភ្នាក់ងារ IAEA និយាយថា បុគ្គលិកការពារនៅទីតាំងនុយក្លេអ៊ែរត្រូវបានសម្លាប់ដោយបំណែកគ្រាប់រំសេវ ហើយអគារមួយនៅនឹងកន្លែងរងផលប៉ះពាល់ដោយរលកឆក់និងបំណែក។

ការបង្ហោះមួយរបស់ IAEA លើបណ្តាញសង្គម X ថា៖ « យើងទទួលដំណឹងពីសារព័ត៌មានរដ្ឋអ៊ីរ៉ង់ថា គ្រាប់រំសេវមួយបានវាយប្រហារនៅជិតបរិវេណរោងចក្រនុយក្លេអែរនៃក្រុង Bushehr NPP នៅព្រឹកនេះ(ថ្ងៃទី៥ ខែមេសា) វាជាឧប្បត្តិហេតុដដែលលើកទី ៤ ក្នុងរយៈពេលប៉ុន្មានសប្តាហ៍ថ្មីៗ»។

ភ្នាក់ងារ IAEA បន្តថា៖ « បុគ្គលិកការពាររូបវន្តម្នាក់នៅទីតាំងនោះត្រូវបានសម្លាប់ដោយបំណែកគ្រាប់រំសេវ ហើយអគារមួយនៅនឹងកន្លែងត្រូវរងផលប៉ះពាល់ដោយរលកឆក់ តែវាមិនមានការកើនឡើងនៃកម្រិតវិទ្យុសកម្មនោះទេ»។

មិនតែប៉ុណ្ណោះ លោក Rafael Mariano Grossi អគ្គនាយកនៃ IAEA សម្តែងការព្រួយបារម្ភយ៉ាងខ្លាំងអំពីឧប្បត្តិហេតុដែលបានរាយការណ៍ខាងលើ។

លោកបន្តអំពាវនាវម្តងហើយម្តងទៀត ទទូចឱ្យភាគីទាំងអស់អត់ធ្មត់ផ្នែកយោធាជាអតិបរមា ដើម្បីជៀសវាងហានិភ័យនៃគ្រោះថ្នាក់នុយក្លេអ៊ែរ៕

ប្រែសម្រួល៖ ណឺ មិនា