រុស្ស៊ី ជំរុញឲ្យមានការគោរព​ជាសកល​​ចំពោះ​តួនាទី​​ថាមពលរបស់​ខ្លួន​ ក្រោយអាមេរិក​លើកលែងទណ្ឌកម្ម

អ្នកនាំពាក្យវិមានក្រឹមឡាំង លោក Dmitry Peskov កំពុងអំពាវនាវឲ្យមានការគោរពពីអន្តរជាតិចំពោះតួនាទីរបស់​រុស្ស៊ី​នៅក្នុងទីផ្សារថាមពលសកល បន្ទាប់ពីសហរដ្ឋអាមេរិកបានលើកលែងទណ្ឌកម្មលើប្រេងរបស់ទីក្រុងមូស្គូម្តងទៀត ដើម្បី​ដោះស្រាយ​វិបត្តិថាមពល​ក្នុងអំឡុង​ពេល​​ជម្លោះ​​នៅ​មជ្ឈិមបូព៌ា​ នាំដល់​ការ​បិទ​ច្រកហូរមូស​​ទំាងស្រុង​​។ នេះបើយោងតាមទីភ្នាក់ងារសារព័ត៌មាន Reuters បានចុះផ្សាយកាលពីថ្ងៃទី២០មេសា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់សន្និសីទប្រចាំថ្ងៃជាមួយអ្នកយកព័ត៌មាន លោក Peskov បាននិយាយថា «រុស្ស៊ីនៅតែជាតួអង្គផ្គត់ផ្គង់ដ៏សំខាន់ និងទទួលខុសត្រូវខ្លាំងនៅក្នុងទីផ្សារថាមពលសកល។ ជាក់ស្ដែង ទីផ្សារកំពុងឆ្លងកាត់ពេលវេលាដ៏លំបាកនៅពេលនេះ ហើយជាការពិតណាស់ បរិមាណរបស់រុស្ស៊ីពិបាកនឹងមើលរំលង ឬមិនអើពើណាស់»។

កាលពីខែមីនា ក្រសួងហិរញ្ញវត្ថុសហរដ្ឋអាមេរិក បានលើកលែងទណ្ឌកម្មលើផលិតផលប្រេង និងប្រេងកាតរបស់រុស្ស៊ី ក្នុងកិច្ចខិតខំប្រឹងប្រែងដើម្បីធ្វើឲ្យតម្លៃមានស្ថេរភាព។ វិធានការទាំងនេះត្រូវបានស្ដារឡើងវិញមួយរយៈខ្លី មុនពេលការលើកលែងថ្មីត្រូវបានប្រកាសកាលពីថ្ងៃសុក្រ។

ចលនានេះគឺជាផ្នែកមួយនៃកិច្ចខិតខំប្រឹងប្រែងរបស់រដ្ឋបាល ដើម្បីគ្រប់គ្រងតម្លៃថាមពលសកលដែលបានឡើងខ្ពស់ក្នុងអំឡុងពេលសង្គ្រាមអាមេរិក-អ៊ីស្រាអែលជាមួយអ៊ីរ៉ង់។ វាបានកើតឡើងបន្ទាប់ពីប្រទេសនានានៅអាស៊ី ដែលរងទុក្ខដោយសារវិបត្តិថាមពលសកល បានដាក់សម្ពាធលើទីក្រុងវ៉ាស៊ីនតោនឲ្យអនុញ្ញាតការផ្គត់ផ្គង់ជំនួសទៅដល់ទីផ្សារ។

ទោះជាបែបនេះក្ដី ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បានសម្តែងការព្រួយបារម្ភយ៉ាងខ្លាំងនៅលើបណ្តាញសង្គមនាប៉ុន្មានថ្ងៃនេះថា ការបន្តបន្ធូរបន្ថយទណ្ឌកម្មប្រឆាំងនឹងរុស្ស៊ី បានជំរុញឲ្យមានការយល់ច្រឡំចំពោះថ្នាក់ដឹកនាំរុស្ស៊ីថា ពួកគេអាចបន្តសង្គ្រាមបានទៅមុខទៀត៕

អត្ថបទ៖ សាង ស្រីល័ក្ខ

លោក ហ្សេលេនស្គី បង្ហាញ​កង្វល់ដ៏ធំ ក្រោយអាមេរិកបន្ថយទណ្ឌកម្មប្រេងរុស្ស៊ី