ព័ត៌មានអន្ដរជាតិ

លោក ហ្សេលេនស្គី បង្ហាញកង្វល់ដ៏ធំ ក្រោយអាមេរិកបន្ថយទណ្ឌកម្មប្រេងរុស្ស៊ី

បានផុស

៣ ខែ មុន

នៅ

ថ្ងៃចន្ទ ២០ មេសា ២០២៦

ដោយ

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បានសម្តែងការព្រួយបារម្ភយ៉ាងខ្លាំងអំពីការបន្ធូរបន្ថយទណ្ឌកម្មរបស់សហរដ្ឋអាមេរិកលើប្រេងឆៅ និងផលិតផលប្រេងកាតរបស់ប្រទេសរុស្ស៊ី ដែលរងទណ្ឌកម្មដោយសារតែបើកការវាយប្រហារលើអ៊ុយក្រែនអស់រយៈពេលជាង៤ឆ្នាំ។ នេះបើយោងតាមការចុះផ្សាយ ពីទីភ្នាក់ងារសារព័ត៌មាន NHK ។

មេដឹកនាំអ៊ុយក្រែន បានសរសេរនៅក្នុងសារប្រព័ន្ធផ្សព្វផ្សាយសង្គមមួយកាលពីថ្ងៃអាទិត្យទី១៩មេសាថា «ការបន្តបន្ធូរបន្ថយទណ្ឌកម្មប្រឆាំងនឹងរុស្ស៊ី បានជំរុញឲ្យមានការយល់ច្រឡំចំពោះថ្នាក់ដឹកនាំរុស្ស៊ីថា ពួកគេអាចបន្តសង្គ្រាមបានទៅមុខទៀត»។

**លោក វ៉ូឡូឌីមៀរ ហ្សេលេនស្គី (រូបភាព៖Reuters)**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ្សេលេនស្គី បានព្រមានថា «រាល់ប្រាក់ដុល្លារដែលបានចំណាយសម្រាប់ប្រេងរបស់រុស្ស៊ី គឺជាប្រាក់សម្រាប់សង្គ្រាម ហើយប្រាក់រាប់ពាន់លានដុល្លារដែលពាក់ព័ន្ធ ត្រូវបានប្រើប្រាស់សម្រាប់ការវាយប្រហារដ៏សាហាវមកលើប្រទេសអ៊ុយក្រែនជាថ្មី»។

លោកបានបង្ហាញក្ដីកង្វល់បន្ថែមទៀតថា មាននាវាដឹកប្រេងជាង ១១០គ្រឿងដែលដឹកប្រេងរបស់រុស្ស៊ី បានបំពានទណ្ឌកម្មអន្តរជាតិដែលកំពុងស្ថិតនៅលើផ្ទៃសមុទ្រ ដោយដឹកប្រេងឆៅជាង ១២លានតោន ដោយសារតែការបន្ធូរបន្ថយទណ្ឌកម្ម ដែលនោះអាចត្រូវបានលក់ម្តងទៀតដោយគ្មានផលវិបាកអ្វីឡើយ។

ទោះជាយ៉ាងណាក៏ដោយ លោក ហ្សេលេនស្គី មិនបានលើកឡើងពីសហរដ្ឋអាមេរិកទេ ប៉ុន្តែរដ្ឋបាលរបស់ប្រធានាធិបតី ដូណាល់ ត្រាំ កាលពីថ្ងៃសុក្រ បានចេញការលើកលែងទណ្ឌកម្មរយៈពេលមួយខែ ដែលអនុញ្ញាតឲ្យប្រទេសនានាធ្វើប្រតិបត្តិការប្រេងឆៅ និងផលិតផលប្រេងកាតរបស់រុស្ស៊ីដែលកំពុងដឹកជញ្ជូននៅលើសមុទ្រ។

ទីក្រុងវ៉ាស៊ីនតោនបានដាក់ទណ្ឌកម្មឡើងវិញលើទំនិញទាំងនេះពីមុន បន្ទាប់ពីការលើកលែងដែលខ្លួនបានចេញកាលពីខែមីនាបានផុតកំណត់នៅខែមេសា។ ការលើកលែងនេះកើតឡើងនៅពេលដែលតម្លៃប្រេងឆៅកំពុងកើនឡើងដោយសារតែជម្លោះនៅមជ្ឈិមបូព៌ា។

ជាក់ស្ដែង ការបន្ធូរបន្ថយទណ្ឌកម្មចុងក្រោយនេះ ក៏នាំឲ្យមានការជំទាស់ពីប្រធានគណៈកម្មការអឺរ៉ុប លោកស្រី Ursula von der Leyen ដែលលើកឡើងថា ឥឡូវនេះមិនមែនជាពេលវេលាដើម្បីបន្ធូរបន្ថយទណ្ឌកម្មប្រឆាំងនឹងរុស្ស៊ីនោះទេ។ សូម្បីតែរដ្ឋមន្ត្រីក្រសួងហិរញ្ញវត្ថុបារាំង លោក Roland Lescure ក៏បានគូសបញ្ជាក់ថា រុស្ស៊ីមិនត្រូវអនុញ្ញាតឲ្យទទួលបានអត្ថប្រយោជន៍ពីអ្វីដែលកំពុងកើតឡើងនៅក្នុងប្រទេសអ៊ីរ៉ង់នោះទេ៕

អត្ថបទ៖ សាង ស្រីល័ក្ខ