ថៃ បញ្ជូន F-16 ទៅល្បាត កៀក មីយ៉ាន់ម៉ា ព្រោះស្ថានការណ៍ កាន់តែមិនស្រួល

ដោយសារតែមើលឃើញស្ថានកាណ៍ កាន់តែមិនស្រួល និងការប្រយុទ្ធគ្នា ដ៏ក្តៅគគុក នៅខាងមីយ៉ាន់ម៉ា, ថៃ ក៏បានបញ្ជូនយន្តហោះចម្បាំង F-16 ទៅល្បាត ដែនអាកាស នៅជាប់ប្រទេសជិតខាងភាគខាងលិចរបស់ខ្លួន និងតាមដានការវិវឌ្ឍនៃសភាពការណ៍ យ៉ាងយកចិត្តទុកដាក់។

តាមការផ្សាយរបស់ Khaosod, កងទ័ពអាកាសថៃ បានបញ្ជូន F-16 ចំនួន ២គ្រឿង ទៅហោះល្បាតក្នុងដែនអាកាស លើស្រុក Phop Phra នៃខេត្ត Tak ស្របពេលការប្រយុទ្ធគ្នា នៅមីយ៉ាន់ម៉ា រវាងក្រុមឧទ្ទាមការ៉ែន (KNU) និងកងទ័ពរដ្ឋាភិបាលរបស់លោក មីន អ៊ុងឡាំង កាន់តែរាលដាល និងខ្លាំងទៅៗ។

រឿងនេះកើតឡើង បន្ទាប់ពីយន្តហោះចម្បាំង របស់កងទ័ពអាកាសមីយ៉ាន់ម៉ា បើកការវាយប្រហារតាមអាកាសយ៉ាង​ខ្លាំងក្លា ​ទៅលើមន្ទីរពេទ្យមួយកន្លែងរបស់ KNU។

ក្នុងប្រតិបត្តិការនោះ យន្តហោះចម្បាំងប្រភេទ Yak-130 និង MiG-29 បានទម្លាក់គ្រាប់បែកចំនួន​៩គ្រាប់ តម្រង់ទៅលើតំបន់មន្ទីរពេទ្យ និងសហគមន៍ដែលស្ថិតក្នុងក្រុង Bue So រដ្ឋការ៉ែន ដែលមានចម្ងាយត្រឹមតែ ៥០០ម៉ែត្រប៉ុណ្ណោះពីព្រំដែនប្រទេសថៃ។

ក្នុងនោះ មានគ្រាប់បែកមួយគ្រាប់បានធ្លាក់​ទៅ​លើទឹកដីថៃ ត្រង់តំបន់មាត់ទន្លេ Salween ក្បែរភូមិ Mae Sam Laep ខេត្ត Mae Hong Son។ ការផ្ទុះ​នៃគ្រាប់បែក បានបង្កឲ្យ​មានភាពភ័យស្លន់ស្លោដល់ប្រជាពលរដ្ឋថៃដែលរស់នៅក្បែរនោះយ៉ាងខ្លាំង រហូតធ្វើឲ្យ​ពួកគេនាំគ្នារត់ភៀសខ្លួនដើម្បីសុវត្ថិភាព៕

អត្ថបទ៖ សុខ សុវណ្ណ