រុស្ស៊ី​មិនគោរព​បទ​ឈប់បាញ់​ប្រកាស​ដោយ​អ៊ុយក្រែន​ទេ ជាមួយ​ការ​រំលោភ ១៨០០ លើក

យោងតាមការចេញផ្សាយរបស់​​ Yahoo កាលពីថ្ងៃពុធទី៦ ខែឧសភា ប្រធានាធិបតីអ៊ុយក្រែន វ៉ូឡូឌីមៀរ​ ហ្សេឡេនស្គី បាននិយាយថា រុស្ស៊ីបានព្រងើយកន្តើយចំពោះសំណើ​បទ​ឈប់បាញ់​របស់ទីក្រុងកៀវ ក្នុងការបញ្ឈប់អរិភាព ដោយលោករាយការណ៍ថា មានការរំលោភបំពានជាង ១,៨០០ លើក លើការប្រកាសបទឈប់បាញ់ជាឯកតោភាគីរបស់ភាគី​អ៊ុយក្រែន​ ដោយ​ចាប់ផ្តើម​ពី​ថ្ងៃទី​៦ខែ​ឧសភា​​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ្សេឡេនស្គី បានសរសេរនៅលើបណ្តាញសង្គម X ថា «គិតត្រឹមថ្ងៃនេះ យើងអាចបញ្ជាក់បានថា ភាគីខាងរុស្ស៊ីបានបង្កការរំខានដល់របបបទឈប់បាញ់ហើយ។ ដូច្នេះ ទីក្រុងកៀវ នឹងសម្រេចចិត្តអំពីរបៀបបន្តចំណាត់ការ ដោយផ្អែក​លើ​របាយការណ៍យោធា និងការស៊ើបការណ៍សម្ងាត់»។

អ៊ុយក្រែន បានប្រកាសបទឈប់បាញ់ដែលមានប្រសិទ្ធភាព ចាប់ពីពាក់កណ្តាលអធ្រាត្រថ្ងៃពុធ ហើយអំពាវនាវឲ្យរុស្ស៊ីចូលរួមផងដែរ។ ទោះជាយ៉ាងណាក៏ដោយ ទីក្រុងមូស្គូបានប្រកាសថា បទឈប់បាញ់ផ្ទាល់ខ្លួនរបស់ខ្លួននឹងចាប់ផ្តើមមានប្រសិទ្ធភាពនៅថ្ងៃសុក្រ ដើម្បីអបអរសាទរទិវាជ័យជម្នះ ថ្ងៃទី៩ ខែឧសភា ដែលជាការរំលឹកខួបនៃការទទួលជ័យជម្នះរបស់សហភាពសូវៀតលើពួកណាស៊ីអាល្លឺម៉ង់។

ដោយឡែក រដ្ឋមន្ត្រីការបរទេសអ៊ុយក្រែន លោក Andrii Sybiha កាលពីមុនចោទប្រកាន់ទីក្រុងម៉ូស្គូថា បានរំលោភ​លើ​បទ​ឈប់បាញ់​របស់ទីក្រុងកៀវ។ លោកបានសរសេរនៅលើបណ្តាញសង្គម X ថា ការវាយប្រហាររបស់រុស្ស៊ីដោយប្រើដ្រូនចំនួន ១០៨ គ្រឿង និងមីស៊ីលចំនួន ៣ គ្រាប់ បានបន្តកើតមានពេញមួយយប់ រួមទាំងមានការវាយប្រហារនៅពេលព្រឹកលើទីក្រុងខាកៀវ (Kharkiv) និងទីក្រុងហ្សាប៉ូរីហ្ស៊ីយ៉ា (Zaporizhzhia) ផងដែរ។

លោក Sybiha បានសរសេរទៀតថា ទីក្រុងម៉ូស្គូបានព្រងើយកន្តើយម្តងទៀត ចំពោះការអំពាវនាវដ៏សមហេតុផល និងយុត្តិធម៌ក្នុងការបញ្ឈប់អរិភាព ដែលគាំទ្រដោយរដ្ឋផ្សេងៗ និងអង្គការអន្តរជាតិ។ នេះសបញ្ជាក់ឲ្យឃើញថា រុស្ស៊ីបដិសេធសន្តិភាព ហើយការអំពាវនាវក្លែងក្លាយរបស់ខ្លួនសម្រាប់បទឈប់បាញ់នៅថ្ងៃទី៩ ខែឧសភា គឺមិនពាក់ព័ន្ធនឹងការទូតទាល់តែសោះ។ លោក ពូទីន គិតតែពីរឿងក្បួនព្យុហយាត្រាយោធាប៉ុណ្ណោះ មិនមែនជីវិតមនុស្សឡើយ។

យ៉ាងណាមិញ ទីភ្នាក់ងារសារព័ត៌មានរុស្ស៊ីបានរាយការណ៍ដែរថា ក្រសួងការពារជាតិរុស្ស៊ី បានស្ទាក់ចាប់ដ្រូនរបស់អ៊ុយក្រែនចំនួន ៥៣ គ្រឿង នៅលើទឹកដីរបស់ខ្លួន និងនៅលើឧបទ្វីបគ្រីមៀ ដែលខ្លួនបានកាត់បញ្ចូល។ គេមិនទាន់ច្បាស់នៅឡើយទេថា តើដ្រូនទាំងនោះត្រូវបានបាញ់ទម្លាក់មុនពេលការចាប់ផ្តើមបទឈប់បាញ់របស់លោក ហ្សេឡេនស្គី ឬយ៉ាងណានោះទេ៕

អត្ថបទ៖ សាង ស្រីល័ក្ខ