រំលង​អ្នកជំនាញសន្តិសុខជាតិ លោក ត្រាំ តែង​តាំង​ជំនួយ​ការ​ផ្នែក​​ធុរកិច្ច​ ឲ្យដឹកនាំស្ថាប័ន​ស៊ើបការណ៍សម្ងាត់

ប្រធានាធិបតី​សហរដ្ឋ​អាមេរិក លោក ដូណាល់ ត្រាំ បានតែងតាំង​ប្រធាន​ទី​​​ភ្នាក់ងារ​​​​ហិរញ្ញប្បទាន​​​លំនៅឋាន​សហព័ន្ធ​ ( Federal Housing Finance Agency) លោក Bill Pulte ឲ្យធ្វើជាស្តីទីប្រធាន​​ទីភ្នាក់ងារ​ស៊ើបការណ៍សម្ងាត់ជាតិ​​ (DNI) និងជាអ្នកត្រួតពិនិត្យលើទីភ្នាក់ងារស៊ើបការណ៍សម្ងាត់របស់រដ្ឋាភិបាល ចំនួន ១៨ ដើម្បីជំនួសតំណែងលោកស្រី Tulsi Gabbard ដែល​បាន​លា​​ឈប់​​​​ដោយ​ប្រើមូល​ហេតុថែ​​ប្តី​​ដែលឆ្លង​ជំងឺ​​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន BBC​ របស់​អង់គ្លេស បាន​ផ្សាយ​ថា លោក ត្រាំ បានប្រកាសពីការតែងតាំង លោក Pulte ដ៏គួឲ្យភ្ញាក់ផ្អើលនេះកាលពីថ្ងៃអង្គារទី២ ខែមិថុនា នៅលើបណ្តាញសង្គម Truth Social។ លោក Pulte បច្ចុប្បន្នជានាយកនៃទីភ្នាក់ងារ​ផ្តល់​ហិរញ្ញប្បទាន​លើ​​វិស័យ​​លំនៅឋានសហព័ន្ធ (FHFA) និងជាប្រធានក្រុមហ៊ុនផ្តល់កម្ចីទិញផ្ទះខ្នាត​​យក្ស Fannie Mae និង Freddie Mac។

មេដឹកនាំអាមេរិក វ័យ ៧៩ឆ្នាំរូបនេះ បានថ្លែងថា លោក Pulte «មានបទពិសោធន៍យ៉ាងជ្រាលជ្រៅក្នុងការចាត់ចែងកិច្ចការដែលងាយរងគ្រោះបំផុតនៅអាមេរិក ដូចជាសុវត្ថិភាពនិងភាពរឹងមាំនៃទីផ្សារ និងការគ្រប់គ្រងទឹកប្រាក់ជាង ១០ ទ្រីលានដុល្លារនៅក្រុមហ៊ុន Fannie Mae/Freddie Mac ដែលជាការកើនឡើងយ៉ាងខ្លាំងបើធៀបនឹងរយៈពេល ១២ ខែមុន»។

លោក ត្រាំ បានបញ្ជាក់ថា លោក Pulte នឹងបន្តរក្សាតំណែងចាស់ៗរបស់លោកដដែល សូម្បីតែនៅក្នុងពេលដែលលោកមកបំពេញការងារជំនួសលោកស្រី Gabbard ដែលបានលាឈប់ពីតំណែងកាលពីខែមុន បន្ទាប់ពីទម្លាយថាស្វាមីរបស់លោកស្រីត្រូវបានរកឃើញថាមានជំងឺមហារីក។

តួនាទីបច្ចុប្បន្នរបស់លោក Pulte គឺធានាភាពរឹងមាំនៃទីផ្សារកម្ចីទិញផ្ទះ ប៉ុន្តែលោកបានប្រែក្លាយខ្លួនទៅជាអ្នកនាំពាក្យដ៏មានឥទ្ធិពលម្នាក់ ដែលតែងតែចេញមុខវាយប្រហារលើដៃគូនយោបាយទាំងឡាយណាដែលប្រធានាធិបតីបក្សសាធារណរដ្ឋរូបនេះមិនពេញចិត្ត។ ភាគច្រើនលោកបានតម្រង់គោលដៅលើគូប្រជែងក្នុងស្រុករបស់ ត្រាំ ដោយក្នុងនោះលោកបានវាយប្រហារលើប្រធានធនាគារកណ្តាលអាមេរិក លោក Jerome Powell ចំពោះការមិនព្រមកាត់បន្ថយអត្រាការប្រាក់គោលឲ្យបានខ្លាំងក្លាដូចអ្វីដែលប្រធានាធិបតីចង់បាន។

ទោះជាយ៉ាងណាក៏ដោយ គេមិនទាន់ដឹងច្បាស់ថា លោក Pulte មានជំនាញ ឬបទពិសោធន៍ខាងសន្តិសុខជាតិកម្រិតណានោះទេ ប៉ុន្តែលោកគឺជាភ្ញៀវប្រចាំម្នាក់នៅលើយន្តហោះ Air Force One រាល់ពេលដែលលោក ត្រាំ ធ្វើដំណើរទៅកាន់លំនៅដ្ឋាន Mar-a-Lago របស់លោកនៅឯឆ្នេរ Palm Beach រដ្ឋផ្លរីដា។

តាមរយៈការជ្រើសរើសនេះ លោក ត្រាំ ដែលតែងតែមានការសង្ស័យលើទីភ្នាក់ងារស៊ើបការណ៍សម្ងាត់ជាតិជាយូរមកហើយនោះ កំពុងតែរំលងបុគ្គលិកដែលមានបទពិសោធន៍ក្នុងកិច្ចការស៊ើបការណ៍សម្ងាត់ និងសន្តិសុខជាតិដ៏រសើប ដោយបង្វែរមកជ្រើសរើសជំនួយការដ៏ស្មោះស្ម័គ្រម្នាក់ ដែលបានកសាងអាជីពនៅក្នុងវិស័យឧស្សាហកម្មសាងសង់ផ្ទះ និងមានប្រវត្តិប្រើប្រាស់បណ្តាញសង្គមបែបវាយប្រហារនិងតតាំង។

ដោយឡែក ក្រុមអ្នកតាក់តែងច្បាប់បក្សប្រជាធិបតេយ្យ បានចេញមុខថ្កោលទោសភ្លាមៗ ចំពោះការសម្រេចចិត្តតែងតាំងលោក Pulte ទៅក្នុងតួនាទីស៊ើបការណ៍សម្ងាត់កំពូលនេះ។ ជាក់ស្ដែង សមាជិកព្រឹទ្ធសភាលោក Mark Warner ដែលជាមន្ត្រីជាន់ខ្ពស់បក្សប្រជាធិបតេយ្យនៅក្នុងគណៈកម្មាធិការស៊ើបការណ៍សម្ងាត់នៃព្រឹទ្ធសភា បានលើកថា ជំនួសឲ្យការជ្រើសរើសអ្នកជំនាញសន្តិសុខជាតិដែលទទួលបានការគោរព និងមានសមត្ថភាពផ្តល់ការវិនិច្ឆ័យដោយឯករាជ្យ ប្រធានាធិបតីបែរជាជ្រើសរើសមន្ត្រីម្នាក់ ដែលបានបង្ហាញមិនត្រឹមតែការស្ម័គ្រចិត្តនោះទេ ប៉ុន្តែគឺភាពខ្នះខ្នែងក្នុងការប្រើប្រាស់អំណាចរដ្ឋាភិបាល ដើម្បីធ្វើការសងសឹកខាងនយោបាយទៅវិញ៕

អត្ថបទ ៖ សាង ស្រីល័ក្ខ