ព័ត៌មានអន្ដរជាតិ

ចាប់តាំងពីដើមខែមីនា ដល់ឥលូវ អ៊ីស្រាអែលសម្លាប់ពលរដ្ឋលីបង់ ៣ ៥២៦នាក់ និងរបួសជាង១ម៉ឺននាក់

បានផុស

២ ថ្ងៃ មុន

នៅ

ថ្ងៃសុក្រ ៥ មិថុនា ២០២៦

ដោយ

យោងតាមរបាយការណ៍របស់ក្រសួងសុខាភិបាលលីបង់ ឱ្យដឹងកាលពីថ្ងៃទី៤ ខែមិថុនា ឆ្នាំ២០២៦ ថា ចំនួនមនុស្សស្លាប់ដោយសារការវាយប្រហាររបស់អ៊ីស្រាអែលលើប្រទេសលីបង់ ចាប់តាំងពីថ្ងៃទី០២ ខែមីនា បានកើនឡើងដល់ ៣ ៥២៦នាក់ ក្នុងពេលជាមួយគ្នា មនុស្ស ១០ ៧៣៣ នាក់ផ្សេងទៀត រងរបួស។

កាលពីថ្ងៃទី២៨ ខែកុម្ភៈ សហរដ្ឋអាមេរិក និងអ៊ីស្រាអែលបានចាប់ផ្តើមប្រតិបត្តិការយោធាប្រឆាំងនឹងអ៊ីរ៉ង់ និងធ្វើការវាយប្រហារលើទីក្រុងជាច្រើន។

អ៊ីស្រាអែលវាយប្រហារចូលលីបង់។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិបត្តិការនេះនាំឱ្យមានភាពតានតឹងការកើនឡើង នៅមជ្ឈិមបូព៌ា ទាញប្រទេសនៅឈូងសមុទ្រពែរ្សចូលទៅក្នុងជម្លោះ ក៏ដូចជាការបិទច្រកសមុទ្រ Hormuz ។

បន្ទាប់ពីក្រុមហេសបូឡាបានចូលរួមជាមួយសង្គ្រាមអ៊ីរ៉ង់ដោយការបាញ់រ៉ុក្កែតនិងដ្រូនទៅលើអ៊ីស្រាអែល បន្ទាប់មកកងកម្លាំងការពារអ៊ីស្រាអែល (IDF) បានធ្វើការវាយប្រហារ នៅភាគខាងត្បូងប្រទេសលីបង់ និងជាយក្រុងភាគខាងត្បូងនៃទីក្រុងបេរូត។

អ៊ីស្រាអែលក៏បានពង្រីកប្រតិបត្តិការតាមដីគោក នៅភាគខាងត្បូងប្រទេសលីបង់ថែមទៀត។

ប្រធានាធិបតីសហរដ្ឋអាមេរិក លោក ដូណាល់ ត្រាំ លើកឡើងកាលពីថ្ងៃទី១៦ ខែមេសា ថា អ៊ីស្រាអែលនិងលីបង់ បានយល់ព្រមលើបទឈប់បាញ់រយៈពេល១០ថ្ងៃ ដោយចាប់ផ្តើមនៅម៉ោង ១៧:០០ នាទី រសៀល។

នៅថ្ងៃទី២៤ ខែមេសា លោក ត្រាំ បញ្ជាក់ថា បទឈប់បាញ់នឹងត្រូវបន្តរយៈពេលបីសប្តាហ៍។

នៅពាក់កណ្តាលខែឧសភា អ្នកនាំពាក្យក្រសួងការបរទេសអាមេរិកបង្ហោះលើបណ្តាញសង្គម X ថា បទឈប់បាញ់រវាងលីបង់និងអ៊ីស្រាអែលនឹងត្រូវបន្តរយៈពេល ៤៥ថ្ងៃ។

នៅថ្ងៃទី៤ ខែមិថុនា ក្រសួងការបរទេសអាមេរិកបញ្ជាក់ម្តងទៀតថា អ៊ីស្រាអែលនិងលីបង់ យល់ព្រមពិភាក្សាគ្នានៅទីក្រុងវ៉ាស៊ីនតោនកាលពីថ្ងៃទី២-៣ ខែមិថុនា ឈានដល់កិច្ចព្រមព្រៀងមួយ ដើម្បីអនុវត្តលក្ខខណ្ឌនៃបទឈប់បាញ់៕

សម្រួល៖ ណឺ មិនា