សម្ដេច ហ៊ុន​ សែន ទទួលស្គាល់ការមិនបានត្រៀមសម្រាប់ការប្រយុទ្ធ ដោយសារជឿលើថៃពេក

អតីតនាយករដ្ឋមន្ត្រី សម្ដេចតេជោ ហ៊ុន សែន នៅថ្ងៃអង្គារនេះ បានប្រកាសទទួលស្គាល់ចំពោះការមិនបានត្រៀមលក្ខណៈគ្រប់ជ្រុងជ្រោយផ្នែកយោធា ដើម្បីការពារជាតិ នៅពេលមានសង្គ្រាម ដោយសារជឿទុកចិត្តលើប្រទេសថៃពេក។ សម្ដេចតេជោ បានសុំការអភ័យទោសពីពលរដ្ឋចំពោះការមិនបានត្រៀមខ្លួននេះ។

សម្ដេចតេជោ បាននិយាយដោយចំហថា៖ «ក្នុងឋានៈ​ជា​អតីត​នាយករដ្ឋមន្ត្រី ខ្ញុំ​មាន​ការ​ទទួល​ខុស​ត្រូវ​មួយ ​ដោយ​សុំ​អភ័យ​ទោស​ពី​សំណាក់ប្រជាពលរដ្ឋនៅ​ទូទាំង​ប្រទេស អំពី​ការ​ដែល​ខ្ញុំ​ជឿ​ទុកចិត្ត​គេ​ពេក ដោយ​ខ្វះការ​ត្រៀម​រៀបចំឱ្យបាន​គ្រប់គ្រាន់​សម្រាប់​អ្នក​បន្ត​វេន»។ ជុំវិញបញ្ហានេះ ​សម្ដេច ថា មិន​មែន​ជា​កំហុស​របស់​នាយករដ្ឋមន្ត្រី​បច្ចុប្បន្ន គឺសម្ដេចធិបតី ហ៊ុន ម៉ាណែត នោះទេ។

ពីវេទិកាជួបពលរដ្ឋភៀសសឹកដែលកំពុងស្នាក់នៅមណ្ឌលភៀសសឹកបណ្ដោះអាសន្ន ក្នុងឃុំស្លក្រាម ស្រុកស្វាយចេក ខេត្តបន្ទាយមានជ័យ សម្តេចតេជោ ហ៊ុន សែន ថ្លែងថា ក្នុងពេលដែលសម្ដេចកាន់តំណែងជានាយករដ្ឋមន្ត្រី ដែលមានអំណាចពេញលេញ គឺមិនបានត្រៀមរៀបចំណាមួយសម្រាប់ការប្រយុទ្ធនោះទេ។

«នេះជាកំហុសរបស់ខ្ញុំ មិនមែនជាកំហុសនាយករដ្ឋមន្ត្រីបច្ចុប្បន្នទេ ជាកំហុសរបស់ខ្ញុំ ដែលខ្ញុំខ្វះការត្រៀមរៀបចំខ្លួន ដើម្បីការប្រយុទ្ធមួយ»។ សម្ដេចតេជោ បានមានប្រសាសន៍បន្ថែមយ៉ាងដូច្នេះ។

ម្យ៉ាង សម្ដេចតេជោ ថា រាជរដ្ឋាភិបាល ចង់សន្យំថវិកាសម្រាប់ការចំណាយទៅលើការកសាងហេដ្ឋារចនាសម្ព័ន្ធ ដូចជាស្ពាន ថ្នល់ សាលារៀន មន្ទីរពេទ្យ ហើយជាពិសេសជាអាទិភាពចម្បងបំផុតគឺលើវិស័យអប់រំ និងសុខាភិបាល។ ខណៈដែលសម្ដេច ​​បាន​គិត​ថា នឹង​មិនមាន​សង្គ្រាមបែបនេះជាមួយប្រទេសជិតខាង​កើតឡើង ដែលរីកពេញបណ្ដោយព្រំដែននោះទេ។

ទោះជាយ៉ាងណា សម្ដេចតេជោ បញ្ជាក់ជាថ្មីពីជំហររបស់កម្ពុជា ដែលនៅតែរក្សាសិទ្ធិទាមទារមកវិញដែនអធិបតេយ្យជាតិ និងបូរណភាពទឹកដី ដែលថៃបានកំពុងកាប់កាន់ដោយខុសច្បាប់ តាមរយៈការប្រើនូវកម្លាំងឈ្លានពានចូលជ្រៅក្នុងទឹកដីរបស់កម្ពុជា។ សម្ដេច បានប្រកាសនៅចំពោះមុខពលរដ្ឋភៀសសឹក ថា «ដីរបស់យើង យើងត្រូវទាមទារត្រឡប់មកវិញ»៕

ដោយ៖ ធឿន វ៉ាន់សុង